ນາຍົກລັດຖະມົນຕີ ຟ້າມມິງຈິ໊ງ ຮັບປະທານອາຫານເຊົ້າກັບນາຍົກລັດຖະມົນຕີ ລາວ ແລະກໍາປູເຈຍ
ກປ.ອອນໄລ - ເນື່ອງໃນໂອກາດເຂົ້າຮ່ວມກອງປະຊຸມສຸດຍອດອາຊຽນ ຄັ້ງທີ 47 ແລະບັນດາກອງປະຊຸມຂັ້ນສູງທີ່ກ່ຽວຂ້ອງ ຢູ່ນະຄອນຫຼວງກົວລາລຳເປີ, ປະເທດມາເລເຊຍ, ໃນຕອນເຊົ້າວັນທີ 27 ຕຸລາ, ທ່ານ ຟ້າມມິງຈິ໊ງ ນາຍົກລັດຖະມົນຕີ ໄດ້ຮັບປະທານອາຫານເຊົ້າກັບ ທ່ານ Hun Manet ນາຍົກລັດຖະມົນຕີກຳປູເຈຍ ແລະທ່ານ ສອນໄຊ ສີພັນດອນ ນາຍົກລັດຖະມົນຕີລາວ.
ທີ່ການເຮັດວຽກ, ທ່ານ ຟ້າມມິງຈິ໊ງ ນາຍົກລັດຖະມົນຕີ ໄດ້ຊົມເຊີຍຜົນງານອັນຍິ່ງໃຫຍ່ ແລະຮອບດ້ານທີ່ລາວ ແລະ ກຳປູເຈຍ ບັນລຸໄດ້ໃນໄລຍະຜ່ານມາ.
ໃນບັນຍາກາດທີ່ເຕັມໄປດ້ວຍໄມຕີຈິດມິດຕະພາບ, ເປີດອົກເປີດໃຈ, ສາມນາຍົກລັດຖະມົນຕີ ໄດ້ແລກປ່ຽນກ່ຽວກັບຂົງເຂດການຮ່ວມມືຮ່ວມ ແລະບັນດາບັນຫາສາກົນ ແລະພາກພື້ນທີ່ຕ່າງຝ່າຍຕ່າງມີຄວາມສົນໃຈ; ແບ່ງປັນວ່າ ທັງສາມປະເທດລ້ວນແຕ່ພວມມານະພະຍາຍາມຜ່ານຜ່າສິ່ງທ້າທາຍເຖິງຄວາມໝັ້ນຄົງ, ການເມືອງ ແລະການພັດທະນາເສດຖະກິດ-ສັງຄົມ ທີ່ເກີດຈາກການຜັນແປຂອງສະຖານະການໂລກ ແລະພາກພື້ນ; ຮັບຮູ້ວ່າ ການພົວພັນສອງຝ່າຍ ແລະການພົວພັນລະຫວ່າງສາມປະເທດໃນໄລຍະຜ່ານມາມີບາດກ້າວພັດທະນາຢ່າງແທດຈິງ.
    |
 |
|
ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ພ້ອມກັບທ່ານ Hun Manet ນາຍົກລັດຖະມົນຕີກຳປູເຈຍ ແລະທ່ານ ສອນໄຊ ສີພັນດອນ ນາຍົກລັດຖະມົນຕີລາວ. ພາບ: ສໍານັກຂ່າວສານຫວຽດນາມ. |
ສາມນາຍົກລັດຖະມົນຕີ ເຫັນດີເປັນເອກະພາບຕີລາຄາວ່າ ໃນໄລຍະຜ່ານມາ ການພົວພັນລະຫວ່າງ ຫວຽດນາມ - ກໍາປູເຈຍ - ລາວ ສືບຕໍ່ພັດທະນາຢ່າງດີງາມ, ຮັກສາຄວາມໄວ້ເນື້ອເຊື່ອໃຈທາງດ້ານການເມືອງສູງ ແລະການຮ່ວມມືຢ່າງແໜ້ນແຟ້ນໃນທຸກຂົງເຂດ. ທັງສາມປະເທດໄດ້ແລກປ່ຽນຄະນະຜູ້ແທນຂັ້ນສູງຢ່າງເປັນປະຈຳ, ກົນໄກການຮ່ວມມືເສີມຂະຫຍາຍປະສິດທິຜົນ, ການຮ່ວມມືດ້ານການປ້ອງກັນຊາດ, ປ້ອງກັນຄວາມສະຫງົບນັບມື້ນັບຕິດພັນກັນ ແລະເຂົ້າສູ່ລວງເລິກ.
ສາມນາຍົກລັດຖະມົນຕີ ໄດ້ເນັ້ນໜັກວ່າ ໃນສະພາບການຂອງໂລກ ແລະພາກພື້ນໃນປະຈຸບັນ, ການຮັກສາ ແລະເສີມຂະຫຍາຍມູນເຊື້ອແຫ່ງຄວາມສາມັກຄີ, ຄວາມສະໜິດຕິດພັນລະຫວ່າງ ຫວຽດນາມ - ກໍາປູເຈຍ - ລາວ ຍິ່ງກາຍເປັນສິ່ງຈໍາເປັນ ແລະສຳຄັນ. ດ້ວຍຈິດໃຈດັ່ງກ່າວ, ທັງສາມຝ່າຍໄດ້ເຫັນດີເປັນເອກະພາບຈະສືບຕໍ່ຮັກສາການຢ້ຽມຢາມ, ການພົບປະສາມຝ່າຍໃນທຸກຊ່ອງທາງ, ທຸກຂັ້ນ, ໃນສະເພາະໜ້າແມ່ນການພົບປະລະຫວ່າງສາມລັດຖະມົນຕີປ້ອງກັນປະເທດ, ຕໍາຫຼວດ ແລະການຕ່າງປະເທດ, ພ້ອມທັງ, ເພີ່ມທະວີບັນດາຮູບການໂຄສະນາເຜີຍແຜ່ກ່ຽວກັບຜົນງານການຮ່ວມມື ແລະຄຸນຄ່າທາງປະຫວັດສາດຂອງສາຍພົວພັນສາມັກຄີມິດຕະພາບ.
ສາມນາຍົກລັດຖະມົນຕີ ຍັງໄດ້ເຫັນດີເປັນເອກະພາບຈະທາບທາມຄວາມເຫັນເຊິ່ງກັນ ແລະກັນກ່ຽວກັບບັນຫາສາກົນ, ພາກພື້ນທີ່ຕ່າງຝ່າຍຕ່າງມີຄວາມສົມໃຈ; ບັນຫາທີ່ກ່ຽວຂ້ອງເຖິງການພົວພັນສອງຝ່າຍ ແລະລະຫວ່າງສາມຝ່າຍ; ສົມທົບກັນເພື່ອກະກຽມແກ່ເຫດການໃຫຍ່ຂອງແຕ່ລະປະເທດໃນໄລຍະຈະມາເຖິງໃຫ້ເປັນຢ່າງດີ.
ໂດຍ: ຈາງຫງວຽນ