ເຮັດໃຫ້ການພົວພັນຮ່ວມມືຫຼາຍດ້ານລະຫວ່າງຫວຽດນາມ ແລະໂປໂລຍ ເລິກເຊິ່ງຂຶ້ນຕື່ມ

ທີ່ການຕ້ອນຮັບ, ທ່ານ ຟ້າມກວາງງອັກ ໄດ້ສະແດງຄວາມຍິນດີຕ້ອນຮັບ ແລະຊົມເຊີຍທ່ານ Krzysztof Gawkowski ພ້ອມຄະນະ ມາຢ້ຽມຢາມ ແລະເຮັດວຽກຢູ່ແຂວງນິງບິ່ງ.

ທ່ານ ຟ້າມກວາງງອັກ, ຮອງເລຂາພັກແຂວງ, ປະທານຄະນະກໍາມະການປະຊາຊົນແຂວງນິງບິ່ງ ແລກປ່ຽນກັບທ່ານ Krzysztof Gawkowski ຮອງນາຍົກລັດຖະມົນຕີ, ລັດຖະມົນຕີກະຊວງເຕັກນິກດີຈີຕອນໂປໂລຍ. ພາບ: ສໍານັກຂ່າວສານຫວຽດນາມ

ດ້ວຍຄວາມຕັດສິນໃຈ ແລະການກໍານົດທິດຍຸດທະສາດກ່ຽວກັບການຫັນເປັນດີຈີຕອນ, ແຂວງນິງບິ່ງ ໄດ້ຮັບຄວາມໄວ້ວາງໃຈຈາກກະຊວງວິທະຍາສາດ ແລະເຕັກໂນໂລຊີ ເຊື່ອໝັ້ນຄັດເລືອກສົມທົບກັນຈັດຕ້ັງສັບປະດາດີຈີຕອນສາກົນຫວຽດນາມ 2025 (Vietnam International Digital Week - VIDW 2025) ແຕ່ວັນທີ 27 ຫາ ວັນທີ 29 ຕຸລາ 2025.

ທ່ານ ຟ້າມກວາງງອັກ ສະເໜີທ່ານຮອງນາຍົກລັດຖະມົນຕີ, ລັດຖະມົນຕີກະຊວງເຕັກນິກດີຈີຕອນໂປໂລຍ ພ້ອມດ້ວຍຄະນະ ເອົາໃຈໃສ່ແນະນໍາບັນດາທ້ອງຖິ່ນຂອງໂປໂລຍ ທີ່ມີຈຸດຄ້າຍຄືກັນກັບແຂວງນິງບິ່ງ ເພື່ອຊຸກຍູ້ການສ້າງຕັ້ງສາຍພົວພັນຮ່ວມມືມິດຕະພາບຂັ້ນທ້ອງຖິ່ນ.

ທ່ານ ຟ້າມກວາງງອັກ ເຊື່ອໝັ້ນວ່າ ດ້ວຍການສະໜັບສະໜູນຂອງທ່ານຮອງນາຍົກລັດຖະມົນຕີ, ລັດຖະມົນຕີກະຊວງເຕັກນິກດີຈີຕອນໂປເລີຍ ແລະຄະນະ, ບັນດາກົນໄກຮ່ວມມືຂັ້ນທ້ອງຖິ່ນລະຫວ່າງສອງປະເທດຈະນຳມາເຊິ່ງໝາກຜົນໂດຍໄວ, ຊຸກຍູ້ ແລະພັດທະນາສາຍພົວພັນຫວຽດນາມ-ໂປໂລຍ.

ທ່ານ Krzysztof Gawkowski ຖືວ່າ ລະຫວ່າງແຂວງນິງບິ່ງ ກັບບັນດາທ້ອງຖິ່ນຂອງໂປໂລຍ ຍັງມີຄວາມສາມາດບົ່ມຊ້ອນຫຼາຍຢ່າງເພື່ອຊຸກຍູ້ການຮ່ວມມືມິດຕະພາບໃນທຸກຂົງເຂດ, ຄື: ພັດທະນາເສດຖະກິດ-ສັງຄົມ, ເຕັກໂນໂລຊີ, ໂທລະຄົມມະນາຄົມ. ທ່ານ ຫວັງວ່າ ວິສາຫະກິດສອງຝ່າຍຈະມີຫຼາຍໂອກາດພົບປະແລກປ່ຽນ, ຮ່ວມມືໃນໄລຍະຈະມາເຖິງ.

ຢັ້ງຢືນການຢ້ຽມຢາມ, ເຮັດວຽກຄັ້ງນີ້ຈະເປັນປະຖົມປັດໄຈເພື່ອພັດທະນາສາຍພົວພັນລະຫວ່າງບັນດາທ້ອງຖິ່ນຂອງໂປໂລຍ ກັບແຂວງນິງບິ່ງ, ທ່ານ Krzysztof Gawkowski ຈະມານະພະຍາຍາມໜູນຊ່ວຍຊຸກຍູ້ການສ້າງຕ້ັງການພົວພັນຮ່ວມມືມິດຕະພາບຂັ້ນທ້ອງຖິ່ນ, ຜ່ານນັ້ນປະກອບສ່ວນຊຸກຍູ້ການພົວພັນຮ່ວມມືລະຫວ່າງໂປໂລຍ ກັບຫວຽດນາມ ນັບມື້ນັບພັດທະນາຢ່າງແຂງແຮງ, ມີປະສິດທິຜົນ ແລະແທດຈິງ.

ໂດຍ: ໄຊນີດາ