ຍົກສູງປະສິດທິຜົນການຮ່ວມມືໃນທຸກຂົງເຂດ
ທີ່ການພົບປະ, ທ່ານປະທານປະເທດ ເລືອງເກື່ອງ ສະແດງຄວາມເຊື່ອໝັ້ນວ່າ ການຢ້ຽມຢາມຈະປະກອບສ່ວນເພີ່ມທະວີການພົວພັນສາມັກຄີ, ມິດຕະພາບແບບພິເສດ ແລະການຮ່ວມມືຮອບດ້ານລະຫວ່າງສອງປະເທດ ຫວຽດນາມ-ກູບາ. ພ້ອມທັງຢືນຢັນຄວາມຕັດສິນໃຈຂອງການນຳຫວຽດນາມ ປາດຖະໜາຢາກຍົກສູງປະສິດທິຜົນການພົວພັນຮ່ວມມືກັບປະເທດກູບາ ອ້າຍນ້ອງ ໃນທຸກຂົງເຂດກວ່າອີກ, ພິເສດແມ່ນດ້ານເສດຖະກິດ, ການຄ້າ ແລະການລົງທຶນ, ເສີມຂະຫຍາຍສູງສຸດທ່າແຮງຂອງທັງສອງຝ່າຍໃຫ້ເໝາະສົມກັບສາຍພົວພັນແບບພິເສດ ຫວຽດນາມ-ກູບາ ໃນສະພາບທີ່ສອງປະເທດສະເຫຼີມສະຫຼອງ 65 ປີແຫ່ງວັນສ້າງຕັ້ງການພົວພັນທາງການທູດ (2-12-1960 / 2-12-2025).
    |
 |
|
ທ່ານ Esteban Lazo Hernandez, ປະທານສະພາແຫ່ງຊາດ ອໍານາດການປົກຄອງປະຊາຊົນ, ປະທານສະພາແຫ່ງລັດກູບາ ແລະທ່ານ ເລືອງເກື່ອງ ປະທານປະເທດຫວຽດນາມ. ພາບ: qdnd.vn |
ສ່ວນທ່ານ Esteban Lazo Hernández ສະແດງຄວາມສະເທືອນໃຈຕໍ່ອາລົມຈິດຂອງພັກ, ລັດ ແລະປະຊາຊົນຫວຽດນາມ ທີ່ມີຕໍ່ປະຊາຊົນກູບາ ຜ່ານລາຍການບໍລິຈາກຂົນຂວາຍສະໜັບສະໜູນປະຊາຊົນກູບາ “65 ປີແຫ່ງສາຍຈິດມິດໃຈ ຫວຽດນາມ-ກູບາ”, ຖືວ່ານີ້ແມ່ນສິ່ງທີ່ສະແດງໃຫ້ເຫັນຄວາມມີຊີວິດຊີວາຂອງມູນເຊື້ອສາມັກຄີ, ມິດຕະພາບ, ບໍລິສຸດຜຸດຜ່ອງ, ສັດຊື່ບໍລິສຸດລະຫວ່າງສອງປະເທດ. ທ່ານ Esteban Lazo Hernández ຢືນຢັນວ່າ ກູບາ ຍາມໃດກໍ່ນັບຖືຢ່າງສູງຈົດຈໍາ ແລະຕີລາຄາສູງອາລົມຈິດຄວາມສາມັກຄີ, ການຮ່ວມເດີນທາງ, ສະໜັບສະໜູນຢ່າງຈິງໃຈ ແລະໜູນຊ່ວຍຢ່າງແທດຈິງຂອງພັກ, ລັດ, ສະພາແຫ່ງຊາດ ແລະປະຊາຊົນຫວຽດນາມ ທີ່ມີຕໍ່ກູບາ ໃນໄລຍະຜ່ານມາ.
|
|
 |
|
ທ່ານ Esteban Lazo Hernandez, ປະທານສະພາແຫ່ງຊາດ ອໍານາດການປົກຄອງປະຊາຊົນ, ປະທານສະພາແຫ່ງລັດກູບາ ພົບປະກັບທ່ານ ເລືອງເກື່ອງ ປະທານປະເທດຫວຽດນາມ. ພາບ: qdnd.vn |
ທ່ານປະທານປະເທດ ເລືອງເກື່ອງ ເນັ້ນໜັກວ່າ ລັດຖະບານຫວຽດນາມ ພ້ອມທີ່ຈະແບ່ງປັນບົດຮຽນ, ຊຸກຍູ້ການຮ່ວມມືຫຼາຍດ້ານກັບກູບາ, ເປັນຕົ້ນແມ່ນໃນຂົງເຂດທີ່ສອງຝ່າຍມີຄວາມສົນໃຈ, ປະກອບສ່ວນເຂົ້າໃນສະຖຽນລະພາບ ແລະການພັດທະນາຂອງສອງປະເທດ ໃນໄລຍະປະຈຸບັນ, ພິເສດແມ່ນການແບ່ງປັນປະສົບການ ແລະບົດຮຽນທີ່ຫວຽດນາມ ບັນລຸໄດ້ໃນໄລຍະເກືອບ 40 ປີແຫ່ງການປະຕິບັດນະໂຍບາຍປ່ຽນແປງໃໝ່, ການເຊື່ອມໂຍງເຂົ້າກັບສາກົນຢ່າງເລິກເຊິ່ງກວ້າງຂວາງ.
ທ່ານ Esteban Lazo Hernández ຢືນຢັນວ່າ ສະພາແຫ່ງຊາດກູບາ ຈະສືບຕໍ່ຮ່ວມມືຢ່າງແໜ້ນແຟ້ນໃນການເພີ່ມທະວີການຢ້ຽມຢາມ ແລະການພົບປະຂັ້ນສູງກັບສະພາແຫ່ງຊາດຫວຽດນາມ, ຊຸກຍູ້ການພົບປະແລກປ່ຽນຮ່ວມມືລະຫວ່າງບັນດາທ້ອງຖິ່ນ ແລະ ລະຫວ່າງສອງກຸ່ມສະມາຊິກລັດຖະສະພາມິດຕະພາບ; ຜັນຂະຫຍາຍໝາກຜົນກອງປະຊຸມ ຄັ້ງທີ 2 ຄະນະກຳມະການຮ່ວມມືລະຫວ່າງລັດຖະສະພາ ຫວຽດນາມ-ກູບາ; ສ້າງເງື່ອນໄຂສະດວກໃຫ້ແກ່ວິສາຫະກິດຫວຽດນາມ ເຄື່ອນໄຫວຢູ່ ກູບາ; ຍູ້ແຮງການໂຄສະນາໃນປະຊາຊົນ ແລະສຶກສາອົບຮົມລຸ້ນໜຸ່ມສອງປະເທດສືບຕໍ່ສືບທອດມູນເຊື້ອການພົວພັນລະຫວ່າງສອງປະເທດ. ທ່ານປະທານສະພາແຫ່ງຊາດ ກູບາ ຢືນຢັນວ່າ ກູບາ ປາດຖະໜາຢາກທາບທາມຄວາມເຫັນ, ຮຽນຮູ້ປະສົບການປ່ຽນແປງໃໝ່, ພັດທະນາປະເທດຂອງຫວຽດນາມ, ເປັນແບບຢ່າງໃຫ້ກູບາ ແລະໂລກ, ເພື່ອໃຫ້ກູບາ ສາມາດຜ່ານຜ່າຄວາມຫຍຸ້ງຍາກໃນປະຈຸບັນ ແລະບັນລຸໄດ້ບັນດາຜົນງານ ທີ່ຫວຽດນາມ ບັນລຸໄດ້.
ເພີ່ມທະວີການແລກປ່ຽນບົດຮຽນລະຫວ່າງສອງສະພາແຫ່ງຊາດ
ວັນດຽວກັນ, ຢູ່ຫໍສະພາແຫ່ງຊາດ, ທ່ານ ເຈິ່ນແທັງເໝິນ ປະທານສະພາແຫ່ງຊາດຫວຽດນາມ ໄດ້ເປັນປະທານພິທີຕ້ອນຮັບ ແລະພົບປະສອງຝ່າຍກັບທ່ານ Esteban Lazo Hernandez, ປະທານສະພາແຫ່ງຊາດ ອໍານາດການປົກຄອງປະຊາຊົນ, ປະທານສະພາແຫ່ງລັດກູບາ.
|
|
 |
|
ທ່ານ ເຈິ່ນແທັງເໝິນ ປະທານສະພາແຫ່ງຊາດຫວຽດນາມ ແລະທ່ານ Esteban Lazo Hernandez, ປະທານສະພາແຫ່ງຊາດ ອໍານາດການປົກຄອງປະຊາຊົນ, ປະທານສະພາແຫ່ງລັດກູບາ. ພາບ: qdnd.vn |
ທີ່ການພົບປະ, ປະທານສະພາແຫ່ງຊາດສອງປະເທດ ເຫັນດີເປັນເອກະພາບວ່າໃນໄລຍະຈະມາເຖິງ, ຈະສືບຕໍ່ໜູນຊ່ວຍເພີ່ມທະວີການແລກປ່ຽນຄະນະຜູ້ແທນທຸກຂັ້ນ, ຮັກສາກົນໄກຮ່ວມມືລະຫວ່າງສອງພັກ, ສອງລັດຖະບານ, ສອງສະພາແຫ່ງຊາດ ແລະກົນໄກການເມືອງ-ການທູດ, ເສດຖະກິດ-ການຄ້າ ແລະການປ້ອງກັນຊາດສອງຝ່າຍເປັນປະຈໍາ. ສອງຝ່າຍກໍ່ເຫັນດີເປັນເອກະພາບຈະສືບຕໍ່ສົມທົບກັນຊຸກຍູ້ການຜັນຂະຫຍາຍນະໂຍບາຍດ້ານກົດໝາຍຢ່າງມີປະສິດທິຜົນເພື່ອໜູນຊ່ວຍວິສາຫະກິດ, ເພີ່ມທະວີການລົງທຶນເຂົ້າໃນບັນດາຂົງເຂດທີ່ເໝາະສົມກັບຄວາມຕ້ອງການ, ເງື່ອນໄຂ ແລະກໍາລັງຄວາມສາມາດຂອງແຕ່ລະປະເທດ; ສ້າງເງື່ອນໄຂ ແລະຕິດຕາມກວດກາຜັນຂະຫຍາຍໂຄງການຮ່ວມມືຈຸດສຸມທີ່ໄດ້ຕົກລົງ...
|
|
 |
|
ບັນຍາກາດທີ່ການພົບປະສອງຝ່າຍ. ພາບ: qdnd.vn |
ສອງຝ່າຍເຫັນດີເປັນເອກະພາບເພີ່ມທະວີການແລກປ່ຽນບົດຮຽນລະຫວ່າງສອງປະເທດ ແລະສອງສະພາແຫ່ງຊາດກ່ຽວກັບວຽກງານສ້າງກົດໝາຍ, ຜັນຂະຫຍາຍນະໂຍບາຍຊີ້ຂາດໃຫຍ່ຂອງພັກ ໃນສັງກາດໃໝ່, ກະກຽມ ແລະຜັນຂະຫຍາຍກອງປະຊຸມໃຫຍ່ພັກຂອງຫວຽດນາມ ແລະກູບາ ໃນປີ 2026 ຢ່າງມີປະສິດທິຜົນ; ແບ່ງປັນບົດຮຽນ, ສົ່ງເສີມການພັດທະນາຂອງວິສາຫະກິດ, ດຶງດູດການລົງທຶນຈາກຕ່າງປະເທດ, ການຄຸ້ມຄອງການເງິນ, ພັດທະນາການຜະລິດກະສິກຳ, ການນຳໃຊ້ວິທະຍາສາດ-ເຕັກໂນໂລຢີ, ການຫັນເປັນດີຈີຕອນ ແລະຂົງເຂດອື່ນໆ ເຊິ່ງສອງຝ່າຍມີຄວາມສົນໃຈ, ຜ່ານນັ້ນປະກອບສ່ວນປັບປຸງ, ຫັນເປັນຫຼາຍຮູບຫຼາຍແບບ ແລະຍົກສູງປະສິດທິຜົນການພົວພັນຮ່ວມມືຮອບດ້ານ ຫວຽດນາມ-ກູບາ...
ປະທານສະພາແຫ່ງຊາດສອງປະເທດ ກໍ່ແລກປ່ຽນກ່ຽວກັບບັນຫາສາກົນ ແລະພາກພື້ນທີ່ຕ່າງຝ່າຍຕ່າງມີຄວາມສົນໃຈ, ເຫັນດີເປັນເອກະພາບສືບຕໍ່ປຶກສາຫາລື, ສົມທົບກັນຢ່າງແໜ້ນແຟ້ນ ແລະໜູນຊ່ວຍເຊິ່ງກັນ ແລະກັນຢູ່ບັນດາອົງການຈັດຕັ້ງສາກົນ ແລະເວທີປາໄສຫຼາຍຝ່າຍ ເຊິ່ງ ສະພາແຫ່ງຊາດສອງປະເທດເປັນສະມາຊິກ, ເປັນຕົ້ນແມ່ນຢູ່ສະມັດຊາໃຫຍ່ສະຫະພັນລັດຖະສະພາສາກົນ.
* ຕອນຄໍ່າວັນດຽວກັນ, ທ່ານປະທານສະພາແຫ່ງຊາດ ເຈິ່ນແທັງເໝິນ ໄດ້ເປັນເຈົ້າພາບຈັດງານລ້ຽງຕ້ອນຮັບທ່ານປະທານສະພາແຫ່ງຊາດ Esteban Lazo Hernández ພ້ອມດ້ວຍຄະນະຜູ້ແທນກູບາ ເນື່ອງໃນໂອກາດມາຢ້ຽມຢາມຫວຽດນາມ ຢ່າງເປັນທາງການ.
ໂດຍ: ເຈິ່ນຮວ່ຽນ