ເອກອັກຄະລັດຖະທູດລາວ ປະຈຳ ຈີນ ອວຍພອນເນື່ອງໃນໂອກາດສະເຫຼີມສະຫຼອງ 80 ປີແຫ່ງການປະຕິວັດເດືອນສິງຫາ ປະສົບຜົນສໍາເລັດ ແລະວັນຊາດ ສສ ຫວຽດນາມ

ທ່ານ ສົມພອນ ສີຈະເລີນ ເອກອັກຄະລັດຖະທູດລາວ ປະຈໍາ ຈີນ ມອບກະຕ່າດອກໄມ້ອວຍພອນທ່ານເອກອັກຄະລັດຖະທູດ ຟ້າມແທັງບິ່ງ. ພາບ: nhandan.vn

ທ່ານເອກອັກຄະລັດຖະທູດລາວ ສົມພອນ ສີຈະເລີນ ສະແດງຄວາມຊົມເຊີຍຜົນງານອັນໃຫຍ່ຫຼວງ ເຊິ່ງພັກ, ລັດ ແລະປະຊາຊົນຫວຽດນາມ ບັນລຸໄດ້ໃນໄລຍະທາງ 80 ປີແຫ່ງການຕໍ່ສູ້ຍາດເອົາເອກະລາດ, ສ້າງສາ ແລະພັດທະນາປະເທດຊາດ.

ທ່ານເອກອັກຄະລັດຖະທູດ ສົມພອນ ສີຈະເລີນ ຢືນຢັນວ່າ ສອງພັກ, ສອງລັດ, ສອງຊາດ ແລະປະຊາຊົນສອງປະເທດຍາມໃດກໍ່ຄຽງບ່າຄຽງໄຫຼ່, ສະໜັບສະໜູນ ແລະຊ່ວຍເຫຼືອເຊິ່ງກັນ ແລະກັນຢ່າງສຸດຈິດສຸດໃຈໃນໄລຍະຕໍ່ສູ້ປົດປ່ອຍປະເທດຊາດໃນເມື່ອກ່ອນ ແລະໄລຍະສ້າງສາ, ພັດທະນາປະເທດຊາດ ໃນປະຈຸບັນ.

ທ່ານເອກອັກຄະລັດຖະທູດ ຟ້າມແທັງບິ່ງ ແລະທ່ານເອກອັກຄະລັດຖະທູດ ສົມພອນ ສີຈະເລີນ ຖ່າຍຮູບເປັນທີ່ລະນຶກພ້ອມກັບພະນັກງານສະຖານທູດຫວຽດນາມ ແລະລາວ. ພາບ: nhandan.vn

ທ່ານເອກອັກຄະລັດຖະທູດລາວ ຕີລາຄາສູງ ແລະຂອບໃຈການຊ່ວຍເຫຼືອອັນໃຫຍ່ຫຼວງຂອງຫວຽດນາມ  ໄດ້ ແລະກໍາລັງປະກອບສ່ວນສຳຄັນເຂົ້າໃນການພັດທະນາເສດຖະກິດ-ສັງຄົມຂອງລາວ; ທ່ານຖືວ່າ ຮູບແບບການກໍ່ສ້າງ ແລະພັດທະນາຂອງຫວຽດນາມ ໃນສັງກາດໃໝ່ແມ່ນບົດຮຽນອັນລ້ຳຄ່າໃຫ້ລາວ.

ທ່ານເອກອັກຄະລັດຖະທູດ ຟ້າມແທັງບິ່ງ ຢືນຢັນວ່າ ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະການຮ່ວມມືຮອບດ້ານ ຫວຽດນາມ-ລາວ ຈະສືບຕໍ່ໄດ້ຮັບການຮັກສາ ແລະເສີມຂະຫຍາຍໂດຍຄົນລຸ້ນຫຼັງຂອງສອງປະເທດ. ຕີລາຄາສູງການພັດທະນາຢ່າງແຂງແຮງ ແລະແທດຈິງຂອງການພົວພັນລະຫວ່າງສອງປະເທດໃນທຸກຂົງເຂດ, ທ່ານເອກອັກຄະລັດຖະທູດ ຟ້າມແທັງບິ່ງ ເນັ້ນໜັກວ່າ ການພັດທະນາຢ່າງໝັ້ນຄົງຂອງລາວ ແມ່ນສຳຄັນທີ່ສຸດສໍາລັບຫວຽດນາມ ແລະຢືນຢັນວ່າ ຫວຽດນາມ ຈະສືບຕໍ່ຮ່ວມເດີນທາງພ້ອມກັບລາວ ໃນກິດຈະການພັດທະນາເສດຖະກິດ-ສັງຄົມ.

ສອງຝ່າຍເຫັນດີເປັນເອກະສັນເພີ່ມທະວີການສົມທົບກັນ, ແລກປ່ຽນລະຫວ່າງສະຖານທູດຂອງສອງປະເທດ ປະຈຳ ຈີນ ເພື່ອແນໃສ່ປະກອບສ່ວນເຂົ້າໃນການພັດທະນາລວມຂອງການພົວພັນຫວຽດນາມ-ລາວ.

ໂດຍ: ທູຈາງ