ນັກຂ່າວ: ຂໍຮຽນທ່ານປະທານສະພາແຫ່ງຊາດ, ໃນແຕ່ລະໄລຍະປະຫວັດສາດ, ອັນໃດແມ່ນການເຄື່ອນໄຫວພົວພັນຕ່າງປະເທດທີ່ພົ້ນເດັ່ນຂອງສະພາແຫ່ງຊາດ, ສ້າງຂີດໝາຍພິເສດ, ປະກອບສ່ວນຍົກສູງຖານະບົດບາດ, ທີ່ຕັ້ງ, ອິດທິພົນຊື່ສຽງຂອງຫວຽດນາມ ໃນເວທີສາກົນໃນຕະຫຼອດ 80 ປີຜ່ານມາ?

ທ່ານ ເຈິ່ນແທງເໝິ໊ນ ປະທານສະພາແຫ່ງຊາດ ຫວຽດນາມ: ໃນຕະຫຼອດໄລຍະ 80 ປີແຫ່ງການສ້າງຕັ້ງ ແລະພັດທະນາ, ພາຍໃຕ້ການນຳພາຂອງພັກ, ສະພາແຫ່ງຊາດຫວຽດນາມ ໄດ້ຮັບການພັດທະນາຢ່າງບໍ່ຢຸດຢັ້ງ. ການທູດລັດຖະສະພາໄດ້ກາຍເປັນຊ່ອງທາງສຳຄັນ, ເພີ່ມເຕີມໃຫ້ແກ່ການພົວພັນຕ່າງປະເທດຂອງພັກ ແລະການທູດຂອງລັດ, ສ້າງກຳລັງແຮງສັງລວມໃຫ້ແກ່ພື້ນຖານການທູດຫວຽດນາມ ທັນສະໄໝ ແລະຍົກສູງຖານະບົດບາດ, ທີ່ຕັ້ງສາກົນຂອງຫວຽດນາມ.

ປະຫວັດແຫ່ງການເຄື່ອນໄຫວພົວພັນຕ່າງປະເທດຂອງສະພາແຫ່ງຊາດ ຕິດພັນກັບກິດຈະການປົກປັກຮັກສາ ແລະກໍ່ສ້າງອໍານາດການປົກຄອງການປະຕິວັດຂອງປະເທດສາທາລະນະລັດ ປະຊາທິປະໄຕ ຫວຽດນາມ. ໃນໄລຍະປີ 1945-1975, ບັນດາການເຄື່ອນໄຫວພົວພັນຕ່າງປະເທດຂອງສະພາແຫ່ງຊາດ ເຕັມໄປດ້ວຍຂີດໝາຍແຫ່ງການປະຕິວັດ. ໃນໄລຍະປີ 1975-1986, ສະພາແຫ່ງຊາດຊຸດທີ VI ເຊິ່ງແມ່ນສະພາແຫ່ງຊາດຊຸດທຳອິດຂອງຫວຽດນາມ ທີ່ເປັນເອກະພາບ, ໄດ້ຕັດສິນໃຈມີແຜນນະໂຍບາຍເຂົ້າຮ່ວມສະຫະພັນລັດຖະສະພາສາກົນ (IPU), ແລະມາຮອດເດືອນ ເມສາ 1979 ໄດ້ເຂົ້າເປັນສະມາຊິກຂອງ IPU.

leftcenterrightdel
ທ່ານ ເຈິ່ນແທງເໝິ໊ນ ປະທານສະພາແຫ່ງຊາດຫວຽດນາມ ແລະຄະນະຜູ້ແທນຂັ້ນສູງຫວຽດນາມ ເຂົ້າຮ່ວມພິທີໄຂກອງປະຊຸມບັນດາປະທານສະພາແຫ່ງຊາດໂລກ ຄັ້ງທີ 6 ຢູ່ເຊີແນວ, ປະເທດສະວິດ, ໃນວັນທີ 29 ກໍລະກົດ 2025. ພາບ: qdnd.vn

ພາຍຫຼັງປະເທດກ້າວເຂົ້າສູ່ກິດຈະການປ່ຽນແປງໃໝ່, ການເຄື່ອນໄຫວພົວພັນຕ່າງປະເທດຂອງສະພາແຫ່ງຊາດສືບຕໍ່ໄດ້ຮັບການຍູ້ແຮງ, ປັບປຸງ ແລະເປີດກວ້າງ, ປະກອບສ່ວນເສີມຂະຫຍາຍຖານະບົດບາດ, ທີ່ຕັ້ງຂອງສະພາແຫ່ງຊາດຫວຽດນາມ ໃນເວທີປາໄສສາກົນ. ມາຮອດປະຈຸບັນ, ສະພາແຫ່ງຊາດຫວຽດນາມ ໄດ້ສ້າງຕັ້ງການພົວພັນລັດຖະສະພາກັບ 140 ກວ່າປະເທດໃນໂລກ, ໄດ້ເປັນສະມາຊິກຂອງບັນດາອົງການລັດຖະສະພາສາກົນ ແລະພາກພື້ນເກືອບທັງໝົດ ຄື: IPU, AIPA, APPF, APF... ໃນດ້ານຫຼາຍຝ່າຍ, ຂີດໝາຍທີ່ພົ້ນເດັ່ນຂອງສະພາແຫ່ງຊາດຫວຽດນາມ ໃນໄລຍະຜ່ານມາແມ່ນການເປັນປະທານບັນດາກອງປະຊຸມຫຼາຍຝ່າຍສຳຄັນ, ທີ່ມີລະດັບສາກົນ ແລະພາກພື້ນ ຄື: IPU 132 (2015), APPF-26 (2018), AIPA 41 (2020), ກອງປະຊຸມສະມາຊິກລັດຖະສະພາໜຸ່ມທົ່ວໂລກ IPU (2023), ກອງປະຊຸມຄະນະບໍລິຫານງານ APF, …

ບັນດາການເຄື່ອນໄຫວພົວພັນຕ່າງປະເທດສະພາແຫ່ງຊາດ, ພ້ອມກັບການພົວພັນຕ່າງປະເທດຂອງພັກ, ການທູດຂອງລັດ, ການທູດປະຊາຊົນໄດ້ເສີມຂະຫຍາຍແຕ່ລະທ່າແຮງສະເພາະຢ່າງສຸດຂີດ, ເຮັດໃຫ້ການພົວພັນຕ່າງປະເທດລະຫວ່າງຫວຽດນາມ ກັບບັນດາຄູ່ຮ່ວມມືເປັນຫຼາຍຮູບຫຼາຍແບບ ແລະເລິກເຊິ່ງກວ່າອີກ, ສ້າງກາລະໂອກາດຊຸກຍູ້ການຮ່ວມມືໃນຫຼາຍຂົງເຂດສຳຄັນຄື: ເສດຖະກິດ, ວັດທະນະທຳ, ການສຶກສາ...

ນັກຂ່າວ: ຂໍຮຽນທ່ານປະທານສະພາແຫ່ງຊາດ, ການເຂົ້າຮ່ວມ ແລະການເປັນເຈົ້າການປະກອບສ່ວນຢູ່ເວທີປາໄສລັດຖະສະພາສາກົນ ແລະພາກພື້ນ ຄື IPU, APPF, AIPA... ໄດ້ຊ່ວຍໃຫ້ຫວຽດນາມ ສ້າງຂີດໝາຍ ແລະຊຸກຍູ້ຜົນປະໂຫຍດຂອງຊາດຄືແນວໃດ?

ທ່ານ ເຈິ່ນແທງເໝິ໊ນ ປະທານສະພາແຫ່ງຊາດຫວຽດນາມ: ຂີດໝາຍຂອງສະພາແຫ່ງຊາດຫວຽດນາມ ໄດ້ສະແດງໃຫ້ເຫັນຢ່າງຈະແຈ້ງຢູ່ໃນການເປັນເຈົ້າການ, ຄວາມຮັບຜິດຊອບຂອງຫວຽດນາມ ໃນຂະບວນການເຂົ້າຮ່ວມການສົນທະນາ, ສ້າງຄວາມເຫັນດີເຫັນພ້ອມກໍ່ຄືສະເໜີຂໍ້ລິເລີ່ມ. ສິ່ງດັ່ງກ່າວ ໄດ້ປະກອບສ່ວນຍົກສູງຖານະບົດບາດ, ທີ່ຕັ້ງ, ພາບພົດຂອງສະພາແຫ່ງຊາດຫວຽດນາມ ເວົ້າສະເພາະ ແລະຫວຽດນາມ ເວົ້າລວມ ໃນປະຊາຄົມສາກົນ.

ຄຽງຂ້າງນັ້ນ, ນີ້ກໍ່ແມ່ນຊ່ອງທາງສຳຄັນ ເພື່ອໃຫ້ຫວຽດນາມ ຊຸກຍູ້ ແລະປົກປັກຮັກສາຜົນປະໂຫຍດຂອງຊາດ.

ບໍ່ຢຸດຢູ່ພຽງແຕ່ເລື່ອງ “ເຂົ້າຮ່ວມ” ເທົ່ານັ້ນ, ສະພາແຫ່ງຊາດຫວຽດນາມ ຍັງໄດ້ດໍາລົງບົດບາດເປັນເຈົ້າພາບຫຼາຍຄັ້ງ. ຜົນສຳເລັດໃນການເປັນເຈົ້າພາບຈັດຕັ້ງ, ບໍລິຫານບັນດາເຫດການລະຫວ່າງລັດຖະສະພາສາກົນ ແລະພາກພື້ນ... ໄດ້ຢືນຢັນກໍາລັງຄວາມສາມາດ, ຄຸນທາດ ແລະຄວາມເປັນເຈົ້າການເຊື່ອມໂຍງຂອງຫວຽດນາມ.

ນັກຂ່າວ: ຂໍທ່ານປະທານສະພາແຫ່ງຊາດ ໃຫ້ຮູ້ບົດບາດ ແລະການປະກອບສ່ວນຂອງສະພາແຫ່ງຊາດ ໃນວຽກງານນິຕິບັນຍັດ, ຕິດຕາມກວດກາສູງສຸດກ່ຽວກັບການພົວພັນຕ່າງປະເທດ (ຜ່ານການໃຫ້ສັດຕະຍາບັນສົນທິສັນຍາສາກົນ, ສ້າງລະບຽບກົດໝາຍໃນຂົງເຂດພົວພັນຕ່າງປະເທດ, ຕິດຕາມກວດກາການເຄື່ອນໄຫວພົວພັນຕ່າງປະເທດ...) ໄດ້ສະແດງອອກຄືແນວໃດ?

ທ່ານ ເຈິ່ນແທງເໝິ໊ນ ປະທານສະພາແຫ່ງຊາດຫວຽດນາມ: ສະພາແຫ່ງຊາດຫວຽດນາມ ໃນຖານະເປັນອົງການອຳນາດລັດສູງສຸດ ໄດ້ສະແດງໃຫ້ເຫັນຢ່າງຈະແຈ້ງເຖິງບົດບາດ ແລະການປະກອບສ່ວນສຳຄັນໃນວຽກງານນິຕິບັນຍັດ, ການຕິດຕາມກວດກາການພົວພັນຕ່າງປະເທດສູງສຸດ. ກ່ອນອື່ນໝົດ, ໃນຂົງເຂດນິຕິບັນຍັດ, ສະພາແຫ່ງຊາດໄດ້ປະກາດໃຊ້, ປັບປຸງ, ສ້າງຂໍ້ກຳນົດກົດໝາຍທີ່ກ່ຽວຂ້ອງເຖິງວຽກງານການພົວພັນຕ່າງປະເທດ, ຮັບປະກັນຄວາມຄົບຊຸດ, ເປັນເອກະພາບ, ສ້າງພື້ນຖານນິຕິກຳຢ່າງໜັກແໜ້ນໃຫ້ແກ່ການຜັນຂະຫຍາຍແນວທາງການພົວພັນຕ່າງປະເທດຂອງພັກ ແລະລັດ.

ທີສອງ, ສະພາແຫ່ງຊາດໄດ້ພິຈະລະນາ, ໃຫ້ສັດຕະຍາບັນສັນຍາສໍາຄັນຫຼາຍສະບັບ, ມີຄວາມໝາຍຍຸດທະສາດ.

ພ້ອມກັນນັ້ນ, ສະພາແຫ່ງຊາດກໍ່ແມ່ນຂົວຕໍ່ນຳເອົາຄຳໝັ້ນສັນຍາສາກົນເຂົ້າສູ່ຊີວິດດ້ານນິຕິກໍາຢູ່ພາຍໃນປະເທດ, ສ້າງກອບກົດໝາຍຢ່າງຄົບຊຸດເພື່ອໃຫ້ຫວຽດນາມ ປະຕິບັດບັນດາຂໍ້ຕົກລົງສາກົນຢ່າງມີປະສິດທິຜົນ, ຮັບໃຊ້ການພັດທະນາແບບຍືນຍົງ. ຄຽງຂ້າງນັ້ນ, ການຕິດຕາມກວດກາສູງສຸດຂອງສະພາແຫ່ງຊາດຕໍ່ກັບການເຄື່ອນໄຫວພົວພັນຕ່າງປະເທດກໍ່ໄດ້ຮັບການຜັນຂະຫຍາຍນັບມື້ນັບມີປະສິດທິຜົນ...

ນັກຂ່າວ: ຂໍທ່ານປະທານສະພາແຫ່ງຊາດ ໃຫ້ຮູ້ສະພາບການຢູ່ພາຍໃນ ແລະຕ່າງປະເທດໃນປະຈຸບັນ ແລະໃນໄລຍະຈະມາເຖິງ ໄດ້ວາງອອກຄວາມຮຽກຮ້ອງຕ້ອງການຫຍັງແດ່ ກ່ຽວກັບການພົວພັນຕ່າງປະເທດສະພາແຫ່ງຊາດ?

ທ່ານ ເຈິ່ນແທງເໝິ໊ນ ປະທານສະພາແຫ່ງຊາດຫວຽດນາມ: ໃນໂລກ, ການແຂ່ງຂັນຍຸດທະສາດລະຫວ່າງບັນດາປະເທດໃຫຍ່ນັບມື້ນັບຮຸນແຮງຂຶ້ນ, ມີທ່າອ່ຽງຫຼາຍຂົ້ວ ແລະຫຼາຍໃຈກາງໄດ້ເກີດຂຶ້ນຢ່າງຈະແຈ້ງ, ບັນດາບັນຫາທົ່ວໂລກ ເຊັ່ນ: ການປ່ຽນແປງຂອງດິນຟ້າອາກາດ, ຄວາມໝັ້ນຄົງດ້ານພະລັງງານ, ຄວາມໝັ້ນຄົງດ້ານສະບຽງອາຫານ, ການຫັນເປັນດີຈີຕອນ... ຮຽກຮ້ອງໃຫ້ມີການຮ່ວມມືຢ່າງແໜ້ນແຟ້ນ ແລະມີຄວາມຮັບຜິດຊອບຈາກປະຊາຄົມສາກົນ. ໃນຂະນະນັ້ນ, ພາກພື້ນອາຊີ-ປາຊີຟິກ ແລະອາຊີຕາເວັນອອກສ່ຽງໃຕ້ສືບຕໍ່ມີການຜັນແປຢ່າງສັບສົນ, ສະຫຼັບກັນທັງການຮ່ວມມື ແລະການແກ່ງແຍ້ງຍາດຊິງ.

ຢູ່ພາຍໃນປະເທດ, ພາຍຫຼັງເກືອບ 40 ປີແຫ່ງການປ່ຽນແປງໃໝ່, ຫວຽດນາມ ບັນລຸໄດ້ຜົນງານຫຼາຍຢ່າງ, ແຕ່ຄວາມຮຽກຮ້ອງຕ້ອງການພັດທະນາຢ່າງວ່ອງໄວ, ຍືນຍົງ, ການປົກປັກຮັກສາອະທິປະໄຕ ໄດ້ວາງອອກໜ້າທີ່ໃໝ່ໃຫ້ແກ່ການພົວພັນຕ່າງປະເທດສະພາແຫ່ງຊາດ.

ເປົ້າໝາຍກວມລວມແມ່ນຮັກສາສະພາບແວດລ້ອມແຫ່ງສັນຕິພາບ, ສະຖຽນລະພາບ, ການພັດທະນາປະເທດຊາດ; ຢຶດໝັ້ນປົກປັກຮັກສາເອກະລາດ, ອະທິປະໄຕ ແລະຜົນປະໂຫຍດຫຼັກແຫຼ່ງ. ການພົວພັນຕ່າງປະເທດຂອງສະພາແຫ່ງຊາດ ຕ້ອງສືບຕໍ່ເສີມຂະຫຍາຍບົດບາດ, ເພີ່ມທະວີການຮ່ວມມືລັດຖະສະພາຫຼາຍຝ່າຍ, ສອງຝ່າຍກັບບັນດາຄູ່ຮ່ວມມືທີ່ສຳຄັນ, ຍົກສູງຄຸນນະພາບນິຕິບັນຍັດ, ການໃຫ້ສັດຕະຍາບັນ, ການຕິດຕາມກວດກາ ສົນທິສັນຍາສາກົນ.

ນັກຂ່າວ: ຕໍ່ໜ້າຄວາມຮຽກຮ້ອງຕ້ອງການດັ່ງກ່າວ, ອັນໃດເປັນຈຸດສຸມຂອງການພົວພັນຕ່າງປະເທດສະພາແຫ່ງຊາດໃນສັງກາດໃໝ່? ໃນສະພາບການຫັນເປັນດີຈີຕອນ ແລະສະພາບແວດລ້ອມສາກົນທີ່ມີການຫັນປ່ຽນຢ່າງວ່ອງໄວ, ສະພາແຫ່ງຊາດຄວນປ່ຽນແປງໃໝ່ວິທີການເຄື່ອນໄຫວການພົວພັນຕ່າງປະເທດ, ນຳໃຊ້ເຕັກໂນໂລຊີ ແລະຍົກສູງກຳລັງຄວາມສາມາດຂອງຖັນແຖວຄືແນວໃດ ເພື່ອສືບຕໍ່ຢືນຢັນບົດບາດນຳໜ້າຂອງຕົນ, ຮຽນທ່ານປະທານສະພາແຫ່ງຊາດ?

ທ່ານ ເຈິ່ນແທງເໝິ໊ນ ປະທານສະພາແຫ່ງຊາດຫວຽດນາມ: ຕໍ່ໜ້າຄວາມຮຽກຮ້ອງຕ້ອງການໃໝ່ຂອງສະພາບການພາຍໃນ ແລະສາກົນ, ຈຸດສຸມແມ່ນຢືນຢັນບົດບາດເປັນເຈົ້າການ, ຕັ້ງໜ້າ, ມີຄວາມຮັບຜິດຊອບ, ປະຕິບັດແນວທາງພົວພັນຕ່າງປະເທດເອກະລາດ, ເປັນເຈົ້າການ, ຫັນເປັນຫຼາຍຝ່າຍ, ຫຼາຍຮູບຫຼາຍແບບ.

ສະພາແຫ່ງຊາດຕ້ອງປ່ຽນແປງວິທີການເຄື່ອນໄຫວ, ເພີ່ມທະວີການນຳໃຊ້ເຕັກໂນໂລຊີຂໍ້ມູນຂ່າວສານ, ເປີດກວ້າງການສົນທະນາທາງອອນລາຍ, ຍົກສູງປະສິດທິຜົນການພົບປະແລກປ່ຽນລັດຖະສະພາ. ພ້ອມກັນນັ້ນ, ກໍ່ຕ້ອງກໍ່ສ້າງຖັນແຖວພະນັກງານການທູດລັດຖະສະພາໃຫ້ເປັນມືອາຊີບ,  ມີຄຸນທາດ, ເກັ່ງພາສາຕ່າງປະເທດ ແລະເຕັກໂນໂລຢີ, ມີຄວາມຮູ້ຄວາມເຂົ້າໃຈກົດໝາຍສາກົນ.

ນັກຂ່າວ: ເນື່ອງໃນໂອກາດວັນສ້າງຕັ້ງຂະແໜງການທູດ ຄົບຮອບ 80 ປີ, ທ່ານປະທານສະພາແຫ່ງຊາດ ມີສານຫຍັງແດ່ ຕໍ່ກັບຂະແໜງການ, ຮຽນທ່ານປະທານສະພາແຫ່ງຊາດ?

ທ່ານ ເຈິ່ນແທງເໝິ໊ນ ປະທານສະພາແຫ່ງຊາດຫວຽດນາມ: ເນື່ອງໃນໂອກາດສະເຫຼີມສະຫຼອງ 80 ປີແຫ່ງວັນສ້າງຕັ້ງຂະແໜງການການທູດ, ຂ້າພະເຈົ້າ ຂໍສົ່ງຄຳອວຍພອນອັນດີງາມມາຍັງພະນັກງານ, ລັດຖະກອນ, ຜູ້ອອກແຮງງານໃນຂະແໜງການທູດ ແລະພະນັກງານທີ່ເຂົ້າຮ່ວມວຽກງານການພົວພັນຕ່າງປະເທດ.

ເມື່ອຫວນຄືນໄລຍະທາງ 80 ປີ, ຂະແໜງການທູດຫວຽດນາມ ໄດ້ຜ່ານຜ່າສິ່ງທ້າທາຍຫຼາຍຢ່າງ, ໄດ້ເຕີບໃຫຍ່ຂະຫຍາຍຕົວຢ່າງບໍ່ຢຸດຢັ້ງໄປພ້ອມກັບປະເທດຊາດ ເພື່ອໃຫ້ບັນລຸໄດ້ບັນດາຜົນງານ ຄືໃນປະຈຸບັນ.

ຂ້າພະເຈົ້າ ເຊື່ອໝັ້ນວ່າ, ຂະແໜງການທູດຈະສືບຕໍ່ປ່ຽນແປງໃໝ່ຢ່າງແຂງແຮງ, ເສີມຂະຫຍາຍມູນເຊື້ອອັນສະຫງ່າລາສີ ແລະ  ບົດບາດນຳໜ້າ, ສຳຄັນ ແລະເປັນປະຈຳຂອງການພົວພັນຕ່າງປະເທດ...

ນັກຂ່າວ: ຂໍຂອບໃຈ ທ່ານປະທານສະພາແຫ່ງຊາດ!

ໂດຍ: ທະນາພອນ