ນັກຂ່າວ: ສະຖານທີ່ວາງສະແດງຂອງຂະແໜງອຸດສາຫະກຳ ແລະການຄ້າ ໄດ້ຕັ້ງຄວາມຫວັງໄວ້ວ່າ ຈະແມ່ນໜຶ່ງໃນບັນດາຈຸດເດັ່ນຂອງງານວາງສະແດງແຫ່ງຊາດຄັ້ງນີ້. ບັນດາວັດຖຸພັນ ແລະຜົນງານດີເດັ່ນອັນໃດແດ່ທີ່ໄດ້ນຳມາແນະນໍາຢູ່ເຫດການ, ຂໍຮຽນທ່ານນາງ?
ທ່ານນາງ ດັ້ງທິຫງອກທູ: ເຂດວາງສະແດງຂອງກະຊວງອຸດສາຫະກຳ ແລະການຄ້າຫວຽດນາມ ດ້ວຍຫົວຂໍ້ວ່າ “80 ປີຂະແໜງການອຸດສາຫະກຳ ແລະການຄ້າ ເຕີບໃຫຍ່ເຂັ້ມແຂງໄປພ້ອມກັບປະເທດ”, ໄດ້ຈັດເປັນ 5 ຂົງເຂດຄື: ເຂດສະເຫຼີມສະຫຼອງ; ເຂດປະຫວັດສາດ 80 ປີຂະແໜງການອຸດສາຫະກໍາ ແລະການຄ້າ; ເຂດຜົນງານ ແລະຂີດໝາຍ; ເຂດອຸດສາຫະກຳ ແລະການຄ້າ ໃນສັງກາດບືນຕົວຂຶ້ນ ແລະເຂດປະສົບການ, ການພົວພັນ. ເພື່ອວາດພາບໃຫ້ເຫັນຂະບວນວິວັດການພັດທະນາຂອງຂະແໜງຢ່າງສົມບູນແບບ, ພວກຂ້າພະເຈົ້າໄດ້ເລືອກເອົາບັນດາເອກະສານ, ວັດຖຸພັນທີ່ພົ້ນເດັ່ນທີ່ສຸດ.
    |
 |
|
ທ່ານນາງ ດັ້ງທິຫງອກທູ, ຫົວໜ້າບັນນາທິການ ວາລະສານອຸດສາຫະກໍາ ແລະການຄ້າຫວຽດນາມ ລາຍງານຕໍ່ທ່ານ ຫງວຽນຮົ່ງຢຽນ ລັດຖະມົນຕີກະຊວງອຸດສາຫະກໍາ ແລະການຄ້າ ກ່ຽວກັບຄວາມຄືບໜ້າ, ຄຸນນະພາບການຜັນຂະຫຍາຍ, ຈັດຕັ້ງງານວາງສະແດງຂອງກະຊວງ. ພາບ: ວັນເທືອງ |
ໃນນັ້ນ, ມີຄວາມຕື້ນຕັນໃຈທີ່ສຸດແມ່ນຊຸດໂສ້ງເສື້ອຂອງໂຮງງານຕັດຫຍິບເລກ 10 (ປະຈຸບັນແມ່ນບໍລິສັດໃຫຍ່ຫຸ້ນສ່ວນຕັດຫຍິບເລກ 10),... ຂ້າພະເຈົ້າ ເຊື່ອໝັ້ນວ່າ ບໍ່ວ່າຜູ້ໃດທີ່ຢືນເບິ່ງວັດຖຸພັນທີ່ສັກສິດນີ້ກໍ່ຈະຮູ້ສຶກຕື້ນຕັນໃຈ. ຄຽງຂ້າງນັ້ນ, ງານວາງສະແດງຍັງໄດ້ແນະນໍາວັດຖຸພັນອັນລໍ້າຄ່າປະເພດຕ່າງໆ, ເປັນຕົ້ນແມ່ນສະບັບສຳເນົາຊື້ເຄື່ອງຂອງພະແນກການຄ້າພາກໃຕ້ປີ 1954, ໄດ້ຂຽນລະອຽດກ່ຽວກັບບັນດາປະເພດກຸ້ງແຫ້ງ, ລາຄາ ແລະປະລິມານເກັບຊື້-ເປັນພະຍານຫຼັກຖານໃຫ້ແກ່ການປະກອບເງິນເລັກໆນ້ອຍໆໃຫ້ແກ່ການຕໍ່ຕ້ານ. ນອກຈາກນັ້ນ ຍັງມີໃບບິນປະກອບທຶນກໍ່ສ້າງໂຮງງານຕໍ່າຫູກ 8-3, ປຶ້ມບັນທຶກຂອງກໍາມະກອນໂຮງງານ Supe ຟົດຟ໋າດ ເລິມທາວ ກ່ອນວັນເຂົ້າເປັນທະຫານໄປສູ້ຮົບຢູ່ພາກໃຕ້...
ພິເສດ, ເປັນຄັ້ງທຳອິດ, ລະບົບເອກະສານນິຕິກຳທີ່ສຳຄັນເກືອບຄົບຖ້ວນກ່ຽວກັບຂະບວນການສ້າງຕັ້ງກະຊວງອຸດສາຫະກຳ ແລະການຄ້າ ແລະບັນດາອົງການທີ່ເປັນຕົ້ນກຳເນີດກໍ່ໄດ້ແນະນໍາ. ເອກະສານແຕ່ລະສະບັບແມ່ນຂີດໝາຍຮັບຮູ້ບາດກ້າວເຕີບໂຕຂອງຂະແໜງການ, ພ້ອມທັງສ່ອງແສງຢ່າງຈະແຈ້ງສະພາບການປະຫວັດສາດ, ໜ້າທີ່ການເມືອງ ແລະສິ່ງທ້າທາຍ ເຊິ່ງຂະແໜງການໄດ້ຜ່ານຜ່າມາໃນ 8 ທົດສະວັດ. ໄປຄຽງຄູ່ກັນນັ້ນແມ່ນລະບົບຂໍ້ມູນ ແລະຮູບພາບກ່ຽວກັບກິດຈະກຳ, ຜົນງານທີ່ພົ້ນເດັ່ນໃນຂົງເຂດອຸດສາຫະກຳ, ພະລັງງານ, ການຄ້າ, ການເຊື່ອມໂຍງເສດຖະກິດເຂົ້າກັບສາກົນ...
ນັກຂ່າວ: ຮຽນທ່ານນາງ, ດ້ວຍຂໍ້ມູນຈຳນວນຫຼາຍຄືແນວນັ້ນ, ງານວາງສະແດງຈະຈັດຕັ້ງ, ສະແດງຕາມວິທີທາງແນວໃດ?
ທ່ານນາງ ດັ້ງທິຫງອກທູ: ນີ້ແມ່ນສິ່ງທ້າທາຍໃຫຍ່ທີ່ບັນດາການນຳກະຊວງອຸດສາຫະກຳ ແລະການຄ້າໄດ້ມອບໝາຍໃຫ້ພວກຂ້າພະເຈົ້າ. ສະນັ້ນ, ນອກຈາກການສະແດງແບບດັ້ງເດີມແລ້ວ, ພວກຂ້າພະເຈົ້າ ຍັງໄດ້ນໍາໃຊ້ຫຼາຍວິທີທີ່ທັນສະໄໝ, ໂດຍສະເພາະແມ່ນເຕັກໂນໂລຢີດີຈີຕອນ. ເລື່ອງຫັນເປັນດີຈີຕອນໄດ້ອຳນວຍຄວາມສະດວກໃຫ້ມະຫາຊົນເຂົ້າເຖິງຢ່າງຄົບຖ້ວນ, ລະອຽດ ແລະເຫັນກັບຕາກວ່າ. ຂໍ້ມູນທັງໝົດຈະໄດ້ສ້າງເປັນວິດີໂອສາຍຢູ່ຈໍໃຫຍ່ ຫຼື ຢູ່ໜ້າຈໍສໍາຜັດ ເພື່ອໃຫ້ເຂົາເຈົ້າເປັນເຈົ້າການເລືອກເບິ່ງເອົາ. ບັນດາຮູບສະແດງກ່ຽວກັບການເຕີບໂຕ, ລະບົບຈໍາໜ່າຍ, ເຕັກໂນໂລຢີຜະລິດໄດ້ສ້າງເປັນວິດີໂອ 3D, ສາຍດ້ວຍລະບົບ hologram ຫຼື ຮູບເງົາສາລະຄະດີ. ອີງໃສ່ສິ່ງດັ່ງກ່າວນັ້ນ, ມະຫາຊົນສາມາດຮັບຮູ້ຂໍ້ມູນແບບມີຊີວິດຊີວາ, ດຶງດູດກວ່າ.
ນັກຂ່າວ: ຜ່ານການວາງສະແດງ, ຖັນແຖວປະຕິບັດຢາກສົ່ງສານຫຍັງແດ່ຕໍ່ຜູ້ທີ່ມາຊົມ, ຂໍຮຽນທ່ານ?
ທ່ານນາງ ດັ້ງທິຫງອກທູ: 80 ປີແຫ່ງການພັດທະນາ, ຂະແໜງອຸດສາຫະກຳ ແລະການຄ້າໄດ້ກຳເນີດເກີດຂຶ້ນ ແລະປັບປຸງສອງເສົາຄໍ້າອຸດສາຫະກໍາ ແລະການຄ້າ, ສ້າງພື້ນຖານໂຄງລ່າງເສດຖະກິດ-ເຕັກນິກອັນສໍາຄັນໃຫ້ແກ່ກິດຈະການສ້າງສາປະເທດຊາດ. ໃນທຸກໄລຍະ, ບັນດາບັນຫາຫຼັກແຫຼ່ງຂອງຂະແໜງ ຍາມໃດກໍ່ຕິດພັນກັບຊາຕາກຳຊົນຊາດ, ດ້ວຍປະຫວັດສາດການປະຕິວັດຂອງປະເທດ. ຂະແໜງໄດ້ພິສູດໃຫ້ເຫັນບົດບາດ ແມ່ນເສົາຄໍ້າໜຶ່ງຂອງພື້ນຖານເສດຖະກິດ, ນໍາໜ້າໃນການພັດທະນາຜະລິດ, ດໍາເນີນທຸລະກິດ, ປ່ຽນແປງໃໝ່ກົນໄກຄຸ້ມຄອງ, ເປັນເຈົ້າການ ແລະຕັ້ງໜ້າເຊື່ອມໂຍງເຂົ້າກັບສາກົນ.
ງານວາງສະແດງຄັ້ງນີ້ມີຄວາມໝາຍສຳຄັນພິເສດໃນການເສີມຂະຫຍາຍມູນເຊື້ອອັນສະຫງ່າງາມ, ແມ່ນກິດຈະກຳເຄື່ອນໄຫວທີ່ແທດຈິງ ເພື່ອສະເຫຼີມສະຫຼອງວັນຊາດຄົບຮອບ 80 ປີ, ພ້ອມທັງ ກໍປະກອບສ່ວນຮັກສາຄວາມຊົງຈຳຂອງຂະແໜງອຸດສາຫະກຳ ແລະການຄ້າໃຫ້ແກ່ຄົນລຸ້ນຫຼັງ. ນີ້ແມ່ນການຕອບບຸນແທນຄຸນຕໍ່ກັບລຸ້ນອ້າຍ ແລະກໍ່ແມ່ນຄວາມຫວັງເຂົ້າໃນການສືບທອດຢ່າງແຂງແຮງຂອງລຸ້ນປະຈຸບັນ. 3 ເດືອນທີ່ກະກຽມງານວາງສະແດງແມ່ນການເດີນທາງທີ່ເຕັມໄປດ້ວຍຄວາມຮູ້ສຶກສໍາລັບພວກຂ້າພະເຈົ້າ. ເພາະວ່າຢູ່ເບື້ອງຫຼັງຮູບພາບ ແລະວັດຖຸພັນແຕ່ລະອັນແມ່ນເລື່ອງເລົ່າກ່ຽວກັບຄົນຢ່າງລະອຽດ, ກ່ຽວກັບການເສຍສະຫຼະ, ການອຸທິດຕົນແບບມິດງຽບຂອງພະນັກງານ, ກໍາມະກອນຂອງຂະແໜງອຸດສາຫະກໍາ ແລະການຄ້າຫຼາຍລຸ້ນຄົນໃຫ້ແກ່ປະເທດຊາດ. ນັ້ນກໍ່ແມ່ນການສະແດງທີ່ມີຊີວິດຊີວາຂອງຂະແໜງເສດຖະກິດໜຶ່ງທີ່ໄດ້, ພວມ ແລະຈະສືບຕໍ່ແມ່ນເສົາຄໍ້າໃນການພັດທະນາຂອງປະເທດຊາດ.
ພວກຂ້າພະເຈົ້າ ຫວັງວ່າ ທຸກຄົນທີ່ມາງານວາງສະແດງຄັ້ງນີ້ ພິເສດແມ່ນພະນັກງານ, ລັດຖະກອນ ແລະພາລະກອນຂະແໜງອຸດສາຫະກຳ ແລະການຄ້າ, ຈະມີຄວາມໝັ້້ນໃຈ ແລະກໍາລັງແຮງຈາກມູນເຊື້ອຕື່ມອີກ ເພື່ອຂຽນຕໍ່ໜ້າປະຫວັດສາດທີ່ສະຫງ່າງາມຂອງຊາດ.
ໂດຍ: ໄຊນີດາ