ປັບປຸງ, ເພີ່ມທະວີສາຍພົວພັນສາມັກຄີແບບພິເສດ ຫວຽດນາມ-ລາວ
ກປ.ອອນໄລ - ວັນທີ 12 ມັງກອນ, ຢູ່ສຳນັກງານສູນກາງພັກ, ທ່ານ ໂຕເລິມ ເລຂາທິການໃຫຍ່ ໄດ້ໃຫ້ການຕ້ອນຮັບຄະນະຜູ້ແທນຂັ້ນສູງກະຊວງປ້ອງກັນຄວາມສະຫງົບລາວ ນໍາໂດຍທ່ານພົນເອກ ວິໄລ ຫຼ້າຄໍາຟອງ, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນຄວາມສະຫງົບລາວ ພວມມີການຢ້ຽມຢາມ ແລະເຮັດວຽກຢູ່ຫວຽດນາມ.
    |
 |
|
ທ່ານ ໂຕເລິມ ເລຂາທິການໃຫຍ່ ຕ້ອນຮັບທ່ານພົນເອກ ວິໄລ ຫຼ້າຄໍາຟອງ, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນຄວາມສະຫງົບລາວ. ພາບ: ກວາງກຽນ |
ທີ່ການຕ້ອນຮັບ, ທ່ານເລຂາທິການໃຫຍ່ ໂຕເລິມ ໄດ້ຕີລາຄາສູງການຮ່ວມມືຢ່າງແໜ້ນແຟ້ນ ແລະມີປະສິດທິຜົນລະຫວ່າງກະຊວງຕຳຫຼວດຫວຽດນາມ ແລະກະຊວງປ້ອງກັນຄວາມສະຫງົບລາວ, ສົມກັບແມ່ນໜຶ່ງໃນບັນດາເສົາຄໍ້າໃນການພົວພັນລະຫວ່າງສອງປະເທດ, ປະກອບສ່ວນຮັກສາຄວາມສະຫງົບ, ຄວາມເປັນລະບຽບຮຽບຮ້ອຍ, ຄວາມປອດໄພໃນສັງຄົມຂອງແຕ່ລະປະເທດ. ທ່ານເລຂາທິການໃຫຍ່ ໂຕເລິມ ສະເໜີວ່າ ໃນໄລຍະຈະມາເຖິງ, ກະຊວງຕຳຫຼວດຫວຽດນາມ ແລະກະຊວງປ້ອງກັນຄວາມສະຫງົບລາວ ຄວນສືບຕໍ່ເສີມຂະຫຍາຍມູນເຊື້ອອັນດີງາມ, ເພີ່ມທະວີການໜູນຊ່ວຍ, ຊ່ວຍເຫຼືອເຊິ່ງກັນ ແລະກັນ, ສົມທົບກັນຢ່າງແໜ້ນແຟ້ນ, ເພີ່ມທະວີການແລກປ່ຽນຂໍ້ມູນຂ່າວສານ, ບົດຮຽນວຽກງານ, ກໍາແໜ້ນສະພາບການ, ສົມທົບກັນຕໍ່ສູ້ຢ່າງມີປະສິດທິຜົນຕໍ່ການເຄື່ອນໄຫວຕ້ານ ແລະມ້າງເພທຳລາຍຂອງອິດທິກໍາລັງປໍລະປັກ... ສອງຝ່າຍເດັດດ່ຽວ, ຍຶດໝັ້ນບໍ່ໃຫ້ອິດທິກໍາລັງປໍລະປັກສວຍໃຊ້ຜືນແຜ່ນດິນຂອງປະເທດນີ້ເພື່ອຕ້ານກັບປະເທດອື່ນ.
|
|
 |
|
ທ່ານ ໂຕເລິມ ເລຂາທິການໃຫຍ່ ແລະທ່ານພົນເອກ ວິໄລ ຫຼ້າຄໍາຟອງ, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນຄວາມສະຫງົບລາວ. ພາບ: ກວາງກຽນ |
ສ່ວນທ່ານພົນເອກ ວິໄລ ຫຼ້າຄໍາຟອງ ໄດ້ສະແດງຄວາມຂອບໃຈທ່ານເລຂາທິການໃຫຍ່ ໂຕເລິມ ທີ່ໄດ້ສະຫຼະເວລາຕ້ອນຮັບຄະນະຜູ້ແທນ; ພ້ອມທັງໄດ້ແຈ້ງໃຫ້ທ່ານເລຂາທິການໃຫຍ່ ໂຕເລິມ ຮັບຊາບກ່ຽວກັບສະພາບການໃນໄລຍະມໍ່ໆມານີ້ຢູ່ລາວ, ການປະຕິບັດມະຕິກອງປະຊຸມໃຫຍ່ ຄັ້ງທີ XI, ສະພາບການຮ່ວມມືລະຫວ່າງກະຊວງຕຳຫຼວດຫວຽດນາມ ແລະກະຊວງປ້ອງກັນຄວາມສະຫງົບລາວ; ສະແດງຄວາມຂອບອົກຂອບໃຈຕໍ່ ການຕີລາຄາອັນດີງາມກ່ຽວກັບການພົວພັນລະຫວ່າງສອງພັກ, ສອງລັດ ແລະການພົວພັນຮ່ວມມືລະຫວ່າງກະຊວງຕຳຫຼວດຫວຽດນາມ ແລະກະຊວງປ້ອງກັນຄວາມສະຫງົບລາວ; ຢືນຢັນວ່າ ກະຊວງປ້ອງກັນຄວາມສະຫງົບລາວ ຈະສືບຕໍ່ເສີມຂະຫຍາຍມູນເຊື້ອ, ສົມທົບກັນຢ່າງແໜ້ນແຟ້ນກັບກະຊວງຕຳຫຼວດຫວຽດນາມ ໃນການຮັກສາຄວາມສະຫງົບແຫ່ງຊາດ, ຮັກສາຄວາມເປັນລະບຽບຮຽບຮ້ອຍ, ຄວາມປອດໄພໃນສັງຄົມໃນ ທຸກສະພາບການ, ປະກອບສ່ວນປັບປຸງ ແລະເພີ່ມທະວີສາຍພົວພັນແບບພິເສດ ລາວ-ຫວຽດນາມ.
ຕອນເຊົ້າວັນດຽວກັນ, ຢູ່ຮ່າໂນ້ຍ, ທ່ານພົນເອກ ເລືອງຕາມກວາງ, ລັດຖະມົນຕີກະຊວງຕຳຫຼວດຫວຽດນາມ ແລະທ່ານພົນເອກ ວິໄລ ຫຼ້າຄໍາຟອງ ໄດ້ເປັນປະທານຮ່ວມກອງປະຊຸມສະຫຼຸບວຽກງານຜັນຂະຫຍາຍແຜນການຮ່ວມມືປີ 2024 ລະຫວ່າງກະຊວງຕຳຫຼວດຫວຽດນາມ ແລະກະຊວງປ້ອງກັນຄວາມສະຫງົບລາວ.
ໂດຍ: ເຈິ່ນຮວ່ຽນ