ທ່ານ ເຈິ່ນແທັງເໝີ໊ນ ປະທານສະພາແຫ່ງຊາດຢ້ຽມຢາມ, ມອບຂອງຂວັນບຸນເຕັດໃຫ້ພໍ່ແມ່ປະຊາຊົນ, ນັກຮົບຢູ່ເມືອງເກ່ົາງາງ, ແຂວງຈ່າວິງ

ທ່ານ ເຈິ່ນແທັງເໝີ໊ນ ປະທານສະພາແຫ່ງຊາດ ກ່າວຄໍາເຫັນ. ພາບ: vov.vn

ຕາງໜ້າການນໍາພັກ, ລັດ, ທ່ານ ເຈິ່ນແທັງເໝີ໊ນ ປະທານສະພາແຫ່ງຊາດ ຮັບຮູ້ບັນດາໝາກຜົນ ເຊິ່ງແຂວງຈ່າວິງ, ເມືອງເກົ່າງາງ, ຕາແສງ ມິ໊ລອງ, ພິເສດແມ່ນຄ້າຍທະຫານຊາຍແດນ ມິ໊ລອງ ບັນລຸໄດ້ໃນການພັດທະນາເສດຖະກິດ-ສັງຄົມ, ຮັບປະກັນການປ້ອງກັນຊາດ-ປ້ອງກັນຄວາມສະຫງົບ, ກໍ່ສ້າງລະບົບການເມືອງໃນໄລຍະຜ່ານມາ.

ປະທານສະພາແຫ່ງຊາດ ຊີ້ແຈ້ງວ່າປີ 2025 ແມ່ນປີທີ່ມີຄວາມໝາຍສໍາຄັນພິເສດ, ມີຫຼາຍວັນສະເຫຼີມສະຫຼອງໃຫຍ່, ມີຄວາມໝາຍຂອງ ປະເທດ, ຂອງຊາດ. ທ່ານ ເຈິ່ນແທັງເໝີ໊ນ ປະທານສະພາແຫ່ງຊາດ ສະເໜີໃຫ້ແຂວງ ຈ່າວິງ, ເມືອງເກົ່າງາງ, ຕາແສງ ມິ໊ລອງ ຕັດສິນໃຈສູ້ຊົນແຂ່ງຂັນປະຕິບັດສໍາເລັດມະຕິກອງປະຊຸມໃຫຍ່ພັກທົ່ວປະເທດ ຄັ້ງທີ XIII, ປະຕິບັດສຳເລັດບັນດາຄາດໝາຍຂອງແຜນການພັດທະນາເສດຖະກິດ-ສັງຄົມ ໄລຍະ 5 ປີ 2021-2025.

ທ່ານປະທານສະພາແຫ່ງຊາດ ສະເໜີຄ້າຍທະຫານຊາຍແດນມິ໊ລອງ ເພີ່ມທະວີການສົມທົບກັນກັບອໍານາດການປົກຄອງ, ແນວໂຮມອົງການຈັດຕັ້ງມະຫາຊົນທ້ອງຖິ່ນ ເພື່ອໃກ້ຊິດຕິດແທດກັບປະຊາຊົນ, ແກ້ໄຂແນວຄິດຈິດໃຈ, ຄວາມປາດຖະໜາຂອງປະຊາຊົນ.

ທ່ານ ເຈິ່ນແທັງເໝີ໊ນ ປະທານສະພາແຫ່ງຊາດ ມອບຂອງຂວັນໃຫ້ພະນັກງານ, ນັກຮົບ, ນາຍທະຫານ ແລະຄອບຄົວນະໂຍບາຍ, ທຸກຍາກ. ພາບ: vov.vn

ປະທານສະພາແຫ່ງຊາດຫວັງວ່າ ບັນດາຄອບຄົວນະໂຍບາຍ, ຄອບຄົວທຸກຍາກ, ຄົນທຸກຍາກຜ່ານຜ່າຄວາມຫຍຸ້ງຍາກ: “ບັນດາຄອບຄົວ ນະໂຍບາຍ, ຄອບຄົວທຸກຍາກສືບຕໍ່ບືນຕົວຂຶ້ນສູ້ຊົນເພື່ອພົ້ນອອກຈາກຄວາມທຸກຍາກ, ຕັ້ງໜ້າອອກແຮງງານ, ຜະລິດດໍາເນີນທຸລະກິດເພື່ອປັບປຸງຊີວິດທາງດ້ານຈິດໃຈ ແລະວັດຖຸຂອງແຕ່ລະຄອບຄົວ. ປີ 2025 ແມ່ນປີຫວຽດນາມ ສູ້ຊົນລົບລ້າງເຮືອນຊົ່ວຄາວຕາມແຜນນະໂຍບາຍຂອງລັດຖະບານ, ຄະນະກໍາມະການສູນກາງແນວໂຮມປະເທດຊາດຫວຽດນາມ. ລັດຖະບານກໍ່ມີບັນດາລາຍການກ່ຽວກັບການພັດທະນາເສດຖະກິດຢູ່ເຂດພໍ່ແມ່ປະຊາຊົນຊົນເຜົ່າຊົນສ່ວນໜ້ອຍ. ພວກເຮົາຕັ້ງໜ້າຜັນຂະຫຍາຍພ້ອມກັບລາຍການຫຼຸດຜ່ອນຄວາມທຸກຍາກ, ລາຍການຊົນນະບົດໃໝ່ເພື່ອໃຫ້ຊີວິດຂອງບັນດາຄອບຄົວນະໂຍບາຍ, ຄົນທຸກຍາກໄດ້ຍົກສູງຂຶ້ນ”.

ໂດຍ: ໄຊນີດາ