ທ່ານ ເລືອງເກືອງ ປະທານປະເທດຫວຽດນາມ ພົບປະສອງຝ່າຍກັບການນຳ ຈີເລ

ຫວຽດນາມ ແລະ ຈີເລ ມຸ່ງໄປເຖິງການຍົກລະດັບການພົວພັນ

ທີ່ການພົບປະສອງຝ່າຍ, ການນຳສອງທ່ານໄດ້ສະແດງຄວາມປິຕິຊົມຊື່ນຕໍ່ການພົວພັນລະຫວ່າງສອງປະເທດນັບມື້ນັບພັດທະນາໂດຍຜ່ານການຮັກສາການຢ້ຽມຢາມ ແລະການພົບປະຂັ້ນສູງ, ໃນທຸກຊ່ອງທາງພັກ, ລັດ, ສະພາແຫ່ງຊາດ ແລະ ທ້ອງຖິ່ນ; ຜັນຂະຫຍາຍກົນໄກຮ່ວມມືທີ່ມີຢູ່ແລ້ວຢ່າງມີປະສິດທິຜົນ. ສອງຝ່າຍຮັບຮູ້ວ່າ ການພົວພັນດ້ານເສດຖະກິດ, ການຄ້າສືບຕໍ່ໄດ້ຮັບການປັບປຸງໃນສະພາບເສດຖະກິດທົ່ວໂລກ ປະສົບກັບສິ່ງທ້າທາຍຫຼາຍຢ່າງ. ຈີເລ ເປັນຄູ່ຮ່ວມມືການຄ້າໃຫຍ່ອັນດັບ 4 ຂອງຫວຽດນາມ ຢູ່ພາກພື້ນອາເມລິກາລາຕິນ ແລະຫວຽດນາມ ເປັນຄູ່ຮ່ວມມືການຄ້າໃຫຍ່ທີ່ສຸດຂອງຈີເລ ໃນອາຊຽນ. ການນຳສອງທ່ານ ໄດ້ຕີລາຄາສູງຕໍ່ເລື່ອງ ຫວຽດນາມ ເປີດຫ້ອງການທີ່ປຶກສາທູດປ້ອງກັນຊາດ ປະຈໍາ ຈີເລ, ຜ່ານນັ້ນປະກອບສ່ວນຊຸກຍູ້ການຮ່ວມມືດ້ານປ້ອງກັນຊາດລະຫວ່າງສອງປະເທດໃນໄລຍະຈະມາເຖິງ. ສອງຝ່າຍໄດ້ຕີລາຄາສູງການພົວພັນຮ່ວມມືຢ່າງແໜ້ນແຟ້ນ ແລະມີປະສິດທິຜົນລະຫວ່າງສອງປະເທດຢູ່ບັນດາອົງການຈັດຕັ້ງສາກົນ ແລະເວທີປາໄສລະຫວ່າງພາກພື້ນ.

ທ່ານ Gabriel Boric Font ປະທານາທິບໍດີຈີເລ ເປັນປະທານພິທີຕ້ອນຮັບທ່ານ ເລືອງເກືອງ ປະທານປະເທດພ້ອມດ້ວຍຄະນະຜູ້ແທນຂັ້ນສູງຫວຽດນາມ ຢ້ຽມຢາມ ສາທາລະນະລັດ ຈີເລ ຢ່າງເປັນທາງການ. ພາບ: qdnd.vn

ການນຳສອງທ່ານເຫັນດີເປັນເອກະສັນສືບຕໍ່ສຸມໃສ່ຊກຍູ້ການຮ່ວມມືໃນຂົງເຂດ ເຊິ່ງສອງຝ່າຍມີທ່າແຮງ, ຄື: ການຄ້າເສລີ, ກະສິກຳ, ພັດທະນາແບບຍືນຍົງ, ພະລັງງານທົດແທນ, ວິທະຍາສາດ, ການສຶກສາ, ການທ່ອງທ່ຽວ, ການປ້ອງກັນຊາດ,  ປ້ອງກັນຄວາມສະຫງົບ...; ຕັ້ງໜ້າເຈລະຈາ ແລະ ລົງນາມໃນເອກະສານການຮ່ວມມືສອງຝ່າຍ ເພື່ອແນໃສ່ປັບປຸງກອບນິຕິກໍາໃຫ້ສົມບູນແບບ ໃຫ້ການພົວພັນສອງປະເທດພັດທະນາແບບຍືນຍົງ; ສ້າງເງື່ອນໄຂສະດວກໃຫ້ປະຊາຄົມວິສາຫະກິດສອງປະເທດເພີ່ມທະວີການແລກປ່ຽນ, ຮ່ວມມື, ດໍາເນີນທຸລະກິດເພື່ອຍົກສູງວົງເງິນການຄ້າສອງຝ່າຍໃຫ້ສົມກັບຄວາມສາມາດບົ່ມຊ້ອນຂອງສອງປະເທດ. ການນຳສອງທ່ານໄດ້ເຫັນດີເພີ່ມທະວີການສົມທົບກັນ, ຮ່ວມມື ແລະສະໜັບສະໜູນເຊິ່ງກັນ ແລະ ກັນຢູ່ອົງການຈັດຕັ້ງສາກົນ, ເວທີປາໄສຫຼາຍຝ່າຍ ແລະ ລະຫວ່າງພາກພື້ນ.

ທ່ານ ເລືອງເກືອງ ປະທານປະເທດຫວຽດນາມ ແລະທ່ານ Gabriel Boric Font ປະທານາທິບໍດີ ຈີເລ. ພາບ: ສໍານັກຂ່າວສານຫວຽດນາມ

ແບ່ງປັນກ່ຽວກັບວິໄສທັດແຫ່ງການພັດທະນາຂອງສອງປະເທດ, ສະໜັບສະໜູນບັນດາຄຸນຄ່າກ່ຽວກັບການຄ້າເສລີ, ການຮ່ວມມືພ້ອມກັນພັດທະນາ, ຕ່າງຝ່າຍຕ່າງມີຜົນປະໂຫຍດ ແລະ ບົນພື້ນຖານຄວາມສາມາດບົ່ມຊ້ອນການຮ່ວມມື, ການນຳສອງທ່ານໄດ້ເຫັນດີມອບໃຫ້ບັນດາກະຊວງ, ຂະແໜງການຂອງສອງປະເທດ ດໍາເນີນການແລກປ່ຽນ, ກວດກາຄືນ, ອັບເດັດ ແລະ ພິຈາລະນາເລື່ອງຍົກລະດັບຂອບເຂດການພົວພັນໃນໄລຍະຈະມາເຖິງ ເພື່ອແນໃສ່ເສີມຂະຫຍາຍຄວາມສາມາດບ່ົມຊ້ອນການຮ່ວມມືສອງຝ່າຍ.

ການນຳສອງປະເທດຍັງໄດ້ແລກປ່ຽນຢ່າງເລິກເຊິ່ງກວ້າງຂວາງ ແລະແບ່ງປັນຫຼັກໝັ້ນຕໍ່ບັນຫາພາກພື້ນ ແລະສາກົນທີ່ຕ່າງຝ່າຍຕ່າງມີຄວາມສົນໃຈ. ກ່ຽວກັບບັນຫາທະເລຕາເວັນອອກ, ສອງຝ່າຍໄດ້ເຫັນດີເປັນເອກະພາບ ໂດຍຖືວ່າ ການຂັດແຍ້ງດ້ານອະທິປະໄຕ ແລະຜືນແຜ່ນດິນຄວນໄດ້ຮັບການແກ້ໄຂໂດຍສັນຕິວິທີ, ບົນພື້ນຖານເຄົາລົບກົດໝາຍສາກົນ, ພິເສດແມ່ນກົດບັດສະຫະປະຊາຊາດ ແລະສົນທິສັນຍາຂອງສະຫະປະຊາຊາດ ກ່ຽວກັບກົດໝາຍວ່າດ້ວຍທະເລ ປີ 1982 (UNCLOS 1982).

ທ່ານ ເລືອງເກືອງ ປະທານປະເທດຫວຽດນາມ ແລະທ່ານ Gabriel Boric Font ປະທານາທິບໍດີ ຈີເລ ເປັນສັກຂີພິຍານພິທີລົງນາມໃນບົດບັນທຶກຊ່ວຍຈໍາ ວ່າດ້ວຍການຮ່ວມມືດ້ານປ້ອງກັນຊາດລະຫວ່າງກະຊວງປ້ອງກັນປະເທດຫວຽດນາມ ແລະກະຊວງປ້ອງກັນປະເທດຈີເລ.  ພາບ: qdnd.vn

ພາຍຫຼັງການພົບປະສອງຝ່າຍ, ການນຳສອງທ່ານ ໄດ້ເປັນສັກຂີພິຍານພິທີລົງນາມຖະແຫຼງການຮ່ວມ ຫວຽດນາມ - ຈີເລ ລະຫວ່າງລັດຖະມົນຕີການຕ່າງປະເທດສອງປະເທດ, ບົດບັນທຶກຊ່ວຍຈໍາວ່າດ້ວຍການຮ່ວມມືດ້ານປ້ອງກັນຊາດ ລະຫວ່າງກະຊວງປ້ອງກັນປະເທດສອງປະເທດ ແລະບັນດາເອກະສານຮ່ວມມືໃນຂົງເຂດກະສິກຳ, ວັດທະນະທຳ; ສົ່ງເສີມການຄ້າ...

ເພີ່ມທະວີການພົວພັນລັດຖະສະພາແມ່ນເສົາຄ້ຳສຳຄັນ

* ຕອນເຊົ້າວັນທີ 11 ພະຈິກ (ຕາມເວລາທ້ອງຖິ່ນ), ໃນຂອບເຂດການຢ້ຽມຢາມສາທາລະນະລັດ ຈີເລ ຢ່າງເປັນທາງການ, ທ່ານ ເລືອງເກືອງ ປະທານປະເທດຫວຽດນາມ ມີການພົບປະກັບທ່ານ José García Ruminot ປະທານສະພາສູງ ຈີເລ.

ທີ່ການພົບປະ, ທ່ານ José García Ruminot ໄດ້ເນັ້ນໜັກເຖິງຄວາມໝາຍ ແລະ ຄວາມສຳຄັນຂອງການຢ້ຽມຢາມ; ຢືນຢັນວ່າ ການຢ້ຽມຢາມຂອງທ່ານປະທານປະເທດຫວຽດນາມ ຈະສ້າງກຳລັງໜູນເຮັດໃຫ້ການພົວພັນລະຫວ່າງສອງປະເທດ ເລິກເຊິ່ງກວ່າອີກ ແລະຍົກລະດັບການພົວພັນຄູ່ຮ່ວມມືຮອບດ້ານລະຫວ່າງສອງປະເທດໃນທຸກຊ່ອງທາງລັດ, ລັດຖະສະພາ ແລະ ການທູດປະຊາຊົນ.

ທ່ານປະທານປະເທດ  ຢືນຢັນວ່າ ໃນການຜັນຂະຫຍາຍແນວທາງພົວພັນຕ່າງປະເທດທີ່ເປັນເອກະລາດ, ເປັນເຈົ້າຕົນເອງ, ຫັນການພົວພັນເປັນຫຼາຍຮູບຫຼາຍແບບ ແລະຫຼາຍຝ່າຍ, ເປັນເຈົ້າການເຊື່ອມໂຍງເຂົ້າກັບສາກົນ, ຫວຽດນາມ ຍາມໃດກໍ່ຖືເປັນສຳຄັນການພັດທະນາສາຍພົວພັນມິດຕະພາບ ແລະການຮ່ວມມືໃນທຸກດ້ານກັບບັນດາປະເທດອາເມລິກາລາຕິນ, ໃນນັ້ນ ຈີເລ ມີທີ່ຕັ້ງສໍາຄັນ. ຫວຽດນາມ ຍາມໃດກໍ່ຈົດຈຳນ້ຳໃຈສາມັກຄີ ແລະການສະໜັບສະໜູນອັນລ້ຳຄ່າຂອງປະຊາຊົນ ຈີເລ ທີ່ມີຕໍ່ຫວຽດນາມ ໃນການຕໍ່ສູ້ຍາດເອົາເອກະລາດແຫ່ງຊາດ ແລະ ທ້ອນໂຮມປະເທດຊາດເປັນເອກະພາບໃນເມື່ອກ່ອນ ກໍຄືໃນກິດຈະການພັດທະນາຂອງປະເທດ ໃນປະຈຸບັນ.

ທ່ານ ເລືອງເກືອງ ປະທານປະເທດຫວຽດນາມ ພົບປະກັບທ່ານ José García Ruminot ປະທານສະພາສູງ ຈີເລ. ພາບ: qdnd.vn

ທ່ານ José García Ruminot ຕີລາຄາວ່າ ການພົວພັນສອງຝ່າຍເວົ້າລວມ ແລະການພົວພັນລັດຖະສະພາລະຫວ່າງສອງປະເທດໃນໄລຍະຜ່ານມາສືບຕໍ່ພັດທະນາຢ່າງແຂງແຮງ, ແທດຈິງ ແລະມີປະສິດທິຜົນໃນທຸກຂົງເຂດ; ສະແດງຄວາມປິຕິຊົມຊື່ນຕໍ່ເລື່ອງວົງເງິນການຄ້າສອງສົ້ນສືບຕໍ່ແມ່ນຈຸດພົ້ນເດັ່ນໃນການພົວພັນສອງຝ່າຍ.

ທ່ານປະທານປະເທດ  ຢືນຢັນວ່າ ການເພີ່ມທະວີການພົວພັນລັດຖະສະພາແມ່ນໜຶ່ງໃນບັນດາເສົາຄ້ຳສຳຄັນຂອງການທູດສອງປະເທດ, ປະກອບສ່ວນຊຸກຍູ້ການພົວພັນ ຫວຽດນາມ - ຈີເລ ເວົ້າລວມ ກໍຄືໃນການສ້າງຕັ້ງ ແລະຜັນຂະຫຍາຍກອບນິຕິກໍາທີ່ສະດວກລະຫວ່າງສອງປະເທດເວົ້າສະເພາະ; ສະເໜີໃຫ້ສະພາແຫ່ງຊາດຂອງສອງປະເທດເພີ່ມທະວີການຮ່ວມມື ແລະເສີມຂະຫຍາຍບົດບາດໃນການສະໜັບສະໜູນຜ່ານຂໍ້ລິເລີ່ມ, ຂໍ້ຕົກລົງ ແລະສັນຍາຮ່ວມມືທີ່ໄດ້ລົງນາມລະຫວ່າງລັດຖະບານ, ກະຊວງ, ຂະແໜງການ ແລະທ້ອງຖິ່ນຂອງສອງປະເທດ ເພື່ອແນໃສ່ປັບປຸງຂອບເຂດການຮ່ວມມືສອງຝ່າຍໃຫ້ສົມບູນແບບ, ຜ່ານນັ້ນປະກອບສ່ວນປັບປຸງ ແລະພັດທະນາສາຍພົວພັນຄູ່ຮ່ວມມືຮອບດ້ານ ຫວຽດນາມ - ຈີເລ ໃຫ້ດີກ່ວາອີກ.

* ຕອນເຊົ້າວັນດຽວກັນ, ໃນຂອບເຂດການຢ້ຽມຢາມສາທາລະນະລັດຈີເລ ຢ່າງເປັນທາງການ,  ທ່ານ ເລືອງເກືອງ ປະທານປະເທດຫວຽດນາມ ໄດ້ມີການພົບປະກັບທ່ານນາງ Karol Cariola ປະທານສະພາຕໍ່າ ທັງເປັນປະທານກຸ່ມສະມາຊິກລັດຖະສະພາ ຈີເລ- ຫວຽດນາມ.

ການນຳສອງທ່ານ ຕີລາຄາວ່າ ໃນໄລຍະຜ່ານມາ, ການພົວພັນລະຫວ່າງລັດຖະສະພາຂອງສອງປະເທດໄດ້ພັດທະນາຢ່າງຕັ້ງໜ້າ, ໂດຍຜ່ານການແລກປ່ຽນການຢ້ຽມຢາມ ແລະການພົບປະສອງຝ່າຍຢູ່ນອກກອງປະຊຸມຫຼາຍຝ່າຍ, ແມ່ນພະຍານຫຼັກຖານທີ່ຈະແຈ້ງກ່ຽວກັບການພົວພັນອັນດີງາມລະຫວ່າງອົງການນິຕິບັນຍັດຂອງສອງປະເທດ.

ທ່ານ ເລືອງເກືອງ ປະທານປະເທດຫວຽດນາມ ພົບປະກັບທ່ານນາງ Karol Cariola ປະທານສະພາຕໍ່າ ຈີເລ. ພາບ: qdnd.vn

ທ່ານນາງ Karol Cariola ເຫັນດີວ່າ ໃນໄລຍະຈະມາເຖິງ, ຈະສືບຕໍ່ຊຸກຍູ້ເພີ່ມທະວີການຮ່ວມມືລະຫວ່າງສະພາແຫ່ງຊາດສອງປະເທດໃນການແລກປ່ຽນຂົງເຂດນິຕິບັນຍັດ, ຕິດຕາມກວດກາ  ແລະຕັດສິນບັນຫາສຳຄັນຂອງປະເທດ; ຍູ້ແຮງການຮ່ວມມືລະຫວ່າງບັນດາອົງການວິຊາສະເພາະຂອງສະພາແຫ່ງຊາດສອງປະເທດໃນການບໍາລຸງສ້າງ, ຍົກສູງລະດັບຄວາມສາມາດຂອງພະນັກງານ, ແລກປ່ຽນບົດຮຽນປະສົບການໃນການຄົ້ນຄວ້າ, ເປັນເສນາທິການ, ສັງລວມ ແລະການຈັດຕັ້ງຮັບໃຊ້ການເຄື່ອນໄຫວຂອງລັດຖະສະພາ; ສືບຕໍ່ເສີມຂະຫຍາຍກົນໄກປະສານງານ ຢູ່ເວທີປາໄສຫຼາຍຝ່າຍ, ສະໜັບສະໜູນຫຼັກໝັ້ນຂອງກັນໃນບັນຫາພາກພື້ນ ແລະ ສາກົນທີ່ຕ່າງຝ່າຍຕ່າງມີຄວາມສົນໃຈ.

ສອງຝ່າຍຍັງໄດ້ແລກປ່ຽນ, ແບ່ງປັນຫຼັກໝັ້ນກ່ຽວກັບຫຼາຍບັນຫາພາກພື້ນ ແລະ ສາກົນທີ່ຕ່າງຝ່າຍຕ່າງມີຄວາມສົນໃຈ. ກ່ຽວກັບບັນຫາທະເລຕາເວັນອອກ, ທ່ານນາງ Karol Cariola ເຫັນດີວ່າ ການຂັດແຍ້ງດ້ານອະທິປະໄຕ ແລະ ຜືນແຜ່ນດິນ ຄວນໄດ້ຮັບການແກ້ໄຂໂດຍສັນຕິວິທີ, ບົນພື້ນຖານເຄົາລົບກົດໝາຍສາກົນ, ພິເສດແມ່ນກົດບັດສະຫະປະຊາຊາດ ແລະ UNCLOS 1982.

ໂດຍ: ທູຈາງ