ນາຍົກລັດຖະມົນຕີຫວຽດນາມ ຟ້າມມິງຈິ໊ງ ສິ້ນສຸດການໄປປະຕິບັດງານຢູ່ຈີນ ຢ່າງຈົບງາມ

ທີ່ບັນດາກອງປະຊຸມ, ທ່ານນາຍົກລັດຖະມົນຕີ ຟ້າມມິງຈິ໊ງ ພ້ອມດ້ວຍບັນດາສະມາຊິກໃນຄະນະຜູ້ແທນຂັ້ນສູງຫວຽດນາມ ໄດ້ຢັ້ງຢືນຄວາມເປັນເຈົ້າການ, ຕັ້ງໜ້າ ແລະຄວາມຮັບຜິດຊອບຂອງຫວຽດນາມ ປະກອບສ່ວນກໍ່ສ້າງອະນຸພາກພື້ນແມ່ນ້ຳຂອງ, ພ້ອມທັງປະກອບສ່ວນປັບປຸງສາຍພົວພັນມິດຕະພາບ ກັບປະເທດເຈົ້າພາບຈີນ ແລະຄູ່ຮ່ວມມືຕ່າງໆ. ຄະນະ ຍັງໄດ້ຕັ້ງໜ້າເຂົ້າຮ່ວມ, ເປັນເຈົ້າການໃນຕະຫຼອດວິວັດການກະກຽມ ກໍຄືປຶກສາຫາລືທີ່ກອງປະຊຸມ. ບັນດາກະຊວງ, ຂະແໜງການ, ທ້ອງຖິ່ນຂອງຫວຽດນາມ ໄດ້ມີການປະກອບສ່ວນສໍາຄັນ ເຂົ້າໃນການສ້າງເອກະສານ, ໂຄງການດໍາເນີນງານ ໃຫ້ບັນດາກອງປະຊຸມ, ສ້າງຄວາມເຫັນດີເຫັນພ້ອມລວມ.

ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ພົບປະກັບທ່ານເລຂາພັກນະຄອນ ຊົງຊິງ. ພາບ: ສໍານັກຂ່າວສານຫວຽດນາມ

ທີ່ກອງປະຊຸມຕ່າງໆ, ທ່ານນາຍົກລັດຖະມົນຕີ  ຟ້າມມິງຈິ໊ງ ໄດ້ປະກາດເລື່ອງ ຫວຽດນາມ ຈະປະກອບເງິນ 10 ລ້ານໂດລາສະຫະລັດ ໃຫ້ກອງທຶນພັດທະນາ ACMECS; ແລະຈະສືບຕໍ່ຜັນຂະຫຍາຍລາຍການທຶນສຶກສາ, ຮັບເອົານັກສຶກສາ ກຳປູເຈຍ, ລາວ, ມຽນມາ ມາຮ່ຳຮຽນຢູ່ ຫວຽດນາມ.

ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ເປັນສັກຂີພິຍານພິທີແລກປ່ຽນບົດບັນທຶກຊ່ວຍຈໍາ ວ່າດ້ວຍການຮ່ວມມືດ້ານວັດທະນະທໍາ, ການທ່ອງທ່ຽວລະຫວ່າງວິສາຫະກິດຫວຽດນາມ ແລະຈີນ. ພາບ: ສໍານັກຂ່າວສານຫວຽດນາມ

ໃນຂະນະນັນ, ການໄປປະຕິບັດງານໃນຄັ້ງນີ້ຂອງທ່ານນາຍົກລັດຖະມົນຕີ  ຟ້າມມິງຈິ໊ງ ຢູ່ຈີນ ດຳເນີນໄປໃນສະພາບທີ່ການພົວພັນ ລະຫວ່າງຫວຽດນາມ-ຈີນ ພວມຢູ່ໃນທ່າພັດທະນາທີ່ຕັ້ງໜ້າ, ທັງດ້ານຄຸນນະພາບ ແລະປະລິມານ ພາຍຫຼັງສອງຝ່າຍເຫັນດີເປັນເອກະພາບຍົກລະດັບການພົວພັນຄູ່ຮ່ວມມືຍຸດທະສາດຮອບດ້ານ, ສ້າງປະຊາຄົມແບ່ງປັນອະນາຄົດ ທີ່ມີຄວາມໝາຍຍຸດທະສາດ (ເດືອນທັນວາ 2023).

ໃນການປະຕິບັດງານ, ທ່ານນາຍົກລັດຖະມົນຕີ ຟ້າມມິງຈິ໊ງ ໄດ້ມີ 19 ການເຄື່ອນໄຫວສອງຝ່າຍ, ລວມມີການເຈລະຈາກັບທ່ານ ຫຼີສຽງ ນາຍົກລັດຖະມົນຕີຈີນ; ພ້ອມກັບທ່ານນາຍົກລັດຖະມົນຕີຈີນ ຫຼີສຽງ ເປັນສັກຂີພິຍານພິທີແລກປ່ຽນຈົດໝາຍເຫດສ້າງຕັ້ງສະຖານກົງສູນໃຫຍ່ຫວຽດນາມ ປະຈຳນະຄອນ ຊົງຊິງ; ພົບປະກັບການນຳແຂວງຢຸນນານ, ນະຄອນຊົງຊິງ, ເຂດປົກຄອງຕົນເອງເຜົ່າຈາວງ ແຂວງກວາງຊີ ແລະການເຄື່ອນໄຫວອື່ນໆຈຳນວນໜຶ່ງ. ການປະຕິບັດງານຢູ່ຈີນ ຂອງຄະນະຜູ້ແທນຫວຽດນາມ ໄດ້ປະສົບຜົນສຳເລັດຢ່າງຈົບງາມ ແລະບັນລຸໄດ້ໝາກຜົນສຳຄັນຫຼາຍຢ່າງ.

ໂດຍ: ທູຈາງ