ບໍ່ວ່າໃນຖານະຕໍາແໜ່ງໃດກໍຕາມ, ແມ່ຍິງຫວຽດນາມ ກໍ່ສາມາດເສີມຂະຫຍາຍໄດ້ຄຸນນະທາດ, ພູມປັນຍາ ແລະຄວາມເມດຕາກະລຸນາ
ກປ.ອອນໄລ - ເນື່ອງໃນໂອກາດສະເຫຼີມສະຫຼອງ 94 ປີແຫ່ງວັນສ້າງຕັ້ງສະຫະພັນແມ່ຍິງຫວຽດນາມ ແລະວັນແມ່ຍິງຫວຽດນາມ (20-10-1930 / 20-10-2024), ຕອນບ່າຍວັນທີ 15 ຕຸລາ, ຢູ່ຫໍສະພາແຫ່ງຊາດ, ທ່ານ ເຈິ່ນແທັງເໝິນ ປະທານສະພາແຫ່ງຊາດຫວຽດນາມ ໄດ້ເປັນປະທານງານພົບປະສະມາຊິກສະພາແຫ່ງຊາດສະເພາະກິດຍິງຢູ່ຂັ້ນສູນກາງ, ພະນັກງານຍິງຂັ້ນຫົວໜ້າກົມຂອງຫ້ອງວ່າການສະພາແຫ່ງຊາດ, ສະຖາບັນຄົ້ນຄວ້ານິຕິບັນຍັດ.
ກ່າວຄຳເຫັນທີ່ການພົບປະ, ທ່ານປະທານສະພາແຫ່ງຊາດ ໄດ້ຍ້ອງຍໍຊົມເຊີຍ ແລະຂອບໃຈຕໍ່ການປະກອບສ່ວນສຳຄັນໃນໄລຍະຜ່ານມາຂອງບັນດາສະມາຊິກສະພາແຫ່ງຊາດຍິງເວົ້າລວມ, ບັນດາສະມາຊິກສະພາແຫ່ງຊາດສະເພາະກິດຍິງຢູ່ສູນກາງ, ບັນດາຫົວໜ້າພະແນກຍິງ ແລະພະນັກງານ, ລັດຖະກອນ, ຜູ້ອອກແຮງງານຍິງຢູ່ຫ້ອງວ່າການສະພາແຫ່ງຊາດ ແລະສະຖາບັນຄົ້ນຄວ້ານິຕິບັນຍັດ. ທ່ານປະທານສະພາແຫ່ງຊາດ ເນັ້ນໜັກວ່າ, ບໍ່ວ່າໃນຖານະຕໍາແໜ່ງໃດກໍຕາມ, ແມ່ຍິງຫວຽດນາມ ກໍ່ສາມາດເສີມຂະຫຍາຍໄດ້ຄຸນນະທາດ, ພູມປັນຍາ ແລະຄວາມເມດຕາ, ເຈດຈໍານົງ, ການເສຍສະຫຼະ, ຄວາມຄ່ອງແຄ້ວ ແລະມານະພະຍາຍາມບືນຕົວຂຶ້ນ. ຫວຽດນາມ ນອນໃນກຸ່ມປະເທດທີ່ມີຜູ້ຍິງເຂົ້າຮ່ວມວຽກງານການເມືອງມີອັດຕາສູງທີ່ສຸດໃນໂລກ.
|
|
ບັນຍາກາດທີ່ການພົບປະ. ພາບ: ກົງກວກ |
ກ່າວຄຳເຫັນທີ່ການພົບປະ, ທ່ານປະທານສະພາແຫ່ງຊາດ ເຈິ່ນແທັງເໝິນ ຫວັງວ່າບັນດາສະມາຊິກສະພາແຫ່ງຊາດ ສະເພາະກິດຍິງ, ພະນັກງານຍິງຈະສືບຕໍ່ປະກອບສ່ວນໃຫ້ແກ່ການເຄື່ອນໄຫວຂອງສະພາແຫ່ງຊາດ, ໃນນັ້ນ, ສຸມໃສ່ປະກອບຄຳເຫັນເພື່ອໃຫ້ສະພາແຫ່ງຊາດພິຈາລະນາ, ຕົກລົງຮັບຮອງເອົາຮ່າງກົດໝາຍ, ມະຕິ, ປະກາດໃຊ້ບັນດາກົນໄກ, ນະໂຍບາຍທີ່ນອນໃນສິດອຳນາດ ເພື່ອແກ້ໄຂຄວາມຫຍຸ້ງຍາກ, ຂໍ້ຕິດຂັດໃນການພັດທະນາໂດຍໄວ, ປ່ຽນໃໝ່ຈິນຕະນາການສ້າງກົດໝາຍ, ເພີ່ມທະວີການແບ່ງຂັ້ນ, ແບ່ງສິດ; ເສີມຂະຫຍາຍພູມປັນຍາ, ຄວາມຮັບຜິດຊອບ, ຄວາມສຸດຈິດສຸດໃຈ, ຄວາມເກັ່ງກ້າສາມາດ ແລະຈັນຍາບັນໃນລະດັບສູງສຸດ, ປະກອບສ່ວນຍົກສູງປະສິດທິຜົນການເຄື່ອນໄຫວຂອງສະພາແຫ່ງຊາດ.
ໂດຍ: ຫງວຽນກຸກ