ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ: ຢ່າປ່ອຍໃຫ້ຜູ້ໃດອຶດຫິວ, ເນັບໜາວ, ຂາດທີ່ພັກພິງ

ພາຍຫຼັງໄດ້ຮັບຟັງການນຳແຂວງບັກຢາງ ລາຍງານກ່ຽວກັບສະພາບນ້ຳຖ້ວມ ແລະຜົນຮ້າຍຢ້ອນຫຼັງຈາກຝົນຕົກນ້ຳຖ້ວມຢູ່ແຂວງ, ທ່ານນາຍົກລັດຖະມົນຕີ ໄດ້ສົ່ງຄຳຢື້ຢາມຖາມຂ່າວ, ແບ່ງປັນຂອງທ່ານ  ໂຕເລິມ ເລຂາທິການໃຫຍ່, ປະທານປະເທດ ແລະບັນດາການນຳພັກ, ລັດ ເຖິງຍາດຕີພີ່ນ້ອງຂອງຜູ້ປະສົບເຄາະຮ້າຍ,  ບັນດາຄວາມຫຍຸ້ງຍາກ, ຄວາມເຈັບປວດສູນເສຍຂອງປະຊາຊົນຢູ່ເຂດທີ່ຖືກຜົນສະທ້ອນຈາກພາຍຸ, ຝົນຕົກ, ນໍ້າຖ້ວມ; ພ້ອມທັງຍ້ອງຍໍຊົມເຊີຍຄະນະພັກ, ອຳນາດການປົກຄອງ ແລະປະຊາຊົນແຂວງບັກຢາງ ທີ່ໄດ້ເປັນເຈົ້າການປ້ອງກັນ, ຕ້ານ ແລະຮັບມືກັບພາຍຸນ້ຳຖ້ວມ, ຫຼຸດຜ່ອນຄວາມເສຍຫາຍໃຫ້ຢູ່ໃນລະດັບໜ້ອຍທີ່ສຸດ.

ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ລົງກວດກາ, ຢ້ຽມຢາມຖາມຂ່າວ ແລະລະດົມກໍາລັງໃຈປະຊາຊົນຕາແສງ ເວິນຮ່າ, ເທດສະບານຫວຽດອຽນ, ແຂວງບັກຢາງ. ພາບ: ສໍານັກຂ່າວສານຫວຽດນາມ

ທ່ານນາຍົກລັດຖະມົນຕີ ຮຽກຮ້ອງໃຫ້ແຂວງບັກຢາງ ປະຕິບັດຄໍາສັ່ງຊີ້ນຳຂອງນາຍົກລັດຖະມົນຕີ, ຂອງລັດຖະບານກ່ຽວກັບການປ້ອງກັນ, ຕ້ານ ແລະຮັບມືກັບພາຍຸນ້ຳຖ້ວມຢ່າງເຂັ້ມງວດ; ເປັນເຈົ້າການກໍາແໜ້ນສະພາບການ, ແກ້ໄຂບັນຫາທີ່ເກີດຂຶ້ນທັນການ, ຖ້າເກີນສິດອຳນາດນັ້ນແມ່ນໃຫ້ຮີບຮ້ອນສະຫຼຸບ ແລະຂໍຄຳເຫັນຈາກຂັ້ນທີ່ມີສິດອໍານາດແກ້ໄຂ.

* ພາຍຫຼັງທີ່ເຮັດວຽກກັບການນຳແຂວງບັກຢາງ, ທ່ານນາຍົກລັດຖະມົນຕີ ໄດ້ດຳເນີນກອງປະຊຸມທາງອອນລາຍກັບການນຳແຂວງອຽນບາຍ, ຕວຽນກວາງ, ຝູເທາະ, ວິ້ງຟຸກ, ຮ່າໂນ້ຍ ເພື່ອຮັບມືກັບນ້ຳຖ້ວມ.

ສະຫຼຸບກອງປະຊຸມ, ທ່ານນາຍົກລັດຖະມົນຕີ ໄດ້ຊີ້ນຳບັນດາກະຊວງ, ຂະແໜງການ, ທ້ອງຖິ່ນເປັນເຈົ້າການຊີ້ນຳ, ຈັດຕັ້ງ ແລະຂົນຂວາຍທົ່ວລະບົບການເມືອງ ເພື່ອປະຕິບັດບັນດາເນື້ອໃນ 5 ໂທລະເລກທາງການທີ່ນາຍົກລັດຖະມົນຕີ ໄດ້ຊີ້ນຳຢ່າງມີປະສິດທິຜົນໂດຍສະເພາະແມ່ນຄຳຊີ້ນຳຂອງທ່ານເລຂາທິການໃຫຍ່, ປະທານປະເທດທີ່ກອງປະຊຸມກົມການເມືອງໃນວັນທີ 9 ກັນຍານີ້ກ່ຽວກັບການປ້ອງກັນ, ຮັບມື, ແກ້ໄຂຜົນຮ້າຍຢ້ອນຫຼັງຈາກໄພນ້ຳຖ້ວມ.

ໂດຍ: ຈາງຫງວຽນ