ສະຫາຍ ຫງວຽນຝູຈ້ອງ ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ, ເລຂາຄະນະພັກການທະຫານສູນກາງ, ເກີດວັນທີ 14 ເມສາ ປີ 1944; ບ້ານເກີດ: ຕາແສງດົງໂຮ້ຍ, ເມືອງດົງແອງ, ນະຄອນຮ່າໂນ້ຍ. ທີ່ຢູ່ອາໄສ ເຮືອນເລກທີ 5, ຖະໜົນທ່ຽນກວາງ, ຕາແສງຫງວຽນຢູ, ເມືອງຫາຍບ່າຈຶງ, ນະຄອນຮ່າໂນ້ຍ.
ພາຍຫຼັງເປັນພະຍາດໜັກ, ເຖິງວ່າພັກ, ລັດ, ຄະນະສາດສະດາຈານ, ແພດໝໍແຖວໜ້າເອົາໃຈໃສ່ປິ່ນປົວ ແລະຄອບຄົວເບິ່ງແຍງດູແລຢ່າງສຸດຈິດສຸດໃຈແລ້ວກໍ່ຕາມ, ແຕ່ຍ້ອນອາຍຸສູງ ແລະເປັນພະຍາດໜັກ, ສະຫາຍໄດ້ເຖິງແກ່ມໍລະນະກຳໃນເວລາ 13 ໂມງ 38 ນາທີຂອງວັນທີ 19 ກໍລະກົດ 2024 ຢູ່ໂຮງໝໍສູນກາງກອງທັບ 108, ລວມອາຍຸ 80 ປີ.
    |
 |
|
ທ່ານເລຂາທິການໃຫຍ່ ຫງວຽນຝູຈ້ອງ . ພາບ: ສໍານັກຂ່າວສານຫວຽດນາມ |
ໃນຕະຫຼອດ 60 ປີແຫ່ງການປະຕິບັດງານ, ສະຫາຍໄດ້ປະກອບສ່ວນອັນໃຫຍ່ຫຼວງ ແລະດີເດັ່ນພິເສດຕໍ່ພາລະກິດປະຕິວັດອັນສະຫງ່າລາສີຂອງພັກ ແລະປະເທດຊາດ. ສະຫາຍໄດ້ຮັບຫຼຽນໄຊດາວຄຳ, ຫຼຽນກາອາຍຸພັກ 55 ປີຈາກພັກ ແລະລັດ ແລະຫຼາຍຫຼຽນໄຊ, ຫຼຽນກາອັນສູງສົ່ງອື່ນໆຫຼາຍຫຼຽນຂອງຫວຽດນາມ ແລະສາກົນ.
ສະຫາຍຈາກໄປແມ່ນຄວາມເສຍຫາຍຢ່າງໃຫຍ່ຫຼວງຕໍ່ພັກ, ລັດ ປະຊາຊົນ ແລະຄອບຄົວ, ຍາດຕີພິນ້ອງຂອງສະຫາຍ. ເພື່ອສະແດງຄວາມອາໄລອາວອນຢ່າງສຸດຊຶ້ງ ແລະອາໄລຫາທ່ານເລຂາທິການໃຫຍ່ ຫງວຽນຝູຈ້ອງ, ຄະນະບໍລິຫານງານສູນກາງພັກກອມມູນິດຫວຽດນາມ, ສະພາແຫ່ງຊາດ, ປະທານປະເທດ, ລັດຖະບານ ສສ ຫວຽດນາມ, ຄະນະກຳມະການສູນກາງແນວໂຮມປະເທດຊາດຫວຽດນາມ ໄດ້ຕົກລົງຈັດຕັ້ງພິທີງານສົບລະດັບຊາດທ່ານເລຂາທິການໃຫຍ່ ຫງວຽນຝູຈ້ອງ.
ຄະນະບໍລິຫານງານສູນກາງພັກ ກອມມູນິດ ຫວຽດນາມ
ສະພາແຫ່ງຊາດ ແຫ່ງ ສສ ຫວຽດນາມ
ປະທານປະເທດ ແຫ່ງ ສສ ຫວຽດນາມ
ລັດຖະບານ ແຫ່ງ ສສ ຫວຽດນາມ
ຄະນະກໍາມະການສູນກາງແນວໂຮມປະເທດຊາດຫວຽດນາມ
ພິທີໄວ້ອາໄລທ່ານເລຂາທິການໃຫຍ່ ຫງວຽນຝູຈ້ອງ ໄດ້ຈັດຢູ່ຫໍທຳພິທີງານສົບລະດັບຊາດເລກທີ 5 ຖະໜົນເຈິ່ນແທ໊ງຕົງ, ນະຄອນຮ່າໂນ້ຍ ເລີ່ມແຕ່ເວລາ 7 ໂມງ 00 ນາທີເຖິງ 22 ໂມງ 00 ນາທີຂອງວັນທີ 25 ກໍລະກົດ 2024 ແລະເວລາ 7 ໂມງ 00 ນາທີ ເຖິງ 13 ໂມງ 00 ນາທີຂອງວັນທີ 26 ກໍລະກົດ 2024.
ພິທີໄວ້ອາໄລທ່ານເລຂາທິການໃຫຍ່ ຫງວຽນຝູຈ້ອງ ໄດ້ຈັດໃນເວລາ 13 ໂມງ 00 ນາທີຂອງວັນທີ 26 ກໍລະກົດ 2024 ຢູ່ຫໍທຳພິທີງານສົບລະດັບຊາດເລກທີ 5 ຖະໜົນເຈິ່ນແທ໊ງຕົງ, ຮ່າໂນ້ຍ.
ພິທີປົງສົບຈະໄດ້ຈັດຂຶ້ນໃນເວລາ 15 ໂມງ 30 ນາທີຂອງວັນດຽວກັນ ຢູ່ສຸສານມາຍຢິກ, ນະຄອນຮ່າໂນ້ຍ.
ໃນສອງວັນໄວ້ທຸກລະດັບຊາດ (ວັນທີ 25 – 26 ກໍລະກົດ 2024), ບັນດາອົງການ, ສຳນັກງານ, ສະຖານທີ່ສາທາລະນະຈະຕ້ອງຊັກທຸງລົງເຄິ່ງເສົາ ແລະບໍ່ໄດ້ຈັດຕັ້ງການເຄື່ອນໄຫວລະຫຼິ້ນບັນເທິງຕ່າງໆ.
ໂດຍ: ທະນາພອນ