ຫວຽດນາມ ປາດຖະໜາຢາກເພີ່ມທະວີການພົວພັນຮ່ວມມືກັບອົງການຈັດຕັ້ງບັນດາປະເທດ Turkic
ກປ.ອອນໄລ - ຕອນບ່າຍວັນທີ 16 ກໍລະກົດ, ຢູ່ທຳນຽບປະທານປະເທດ, ທ່ານ ໂຕເລິມ ປະທານປະເທດຫວຽດນາມ ໄດ້ໃຫ້ການຕ້ອນຮັບເອກອັກຄະລັດຖະທູດບັນດາປະເທດ Turkic ລວມມີ ທ່ານ Shovgi Kamal Oglu Mehdizade ເອກອັກຄະລັດຖະທູດ ອາແຊກໄບຊານ, ທ່ານ Kanat Tumysh ເອກອັກຄະລັດຖະທູດ ສ. ກາຊັກສະຖານ ແລະທ່ານ Korhan Kemik ເອກອັກຄະລັດຖະທູດ ສ. ຕວກກີ.
ທ່ານປະທານປະເທດ ໂຕເລິມ ຖືວ່າ, ອົງການຈັດຕັ້ງບັນດາປະເທດ Turkic ມີບົດບາດສຳຄັນ, ຕັ້ງຢູ່ຈຸດໃຈກາງ ແລະເຊື່ອມຕໍ່ລະຫວ່າງ ອາຊີ ແລະເອີລົບ; ຢືນຢັນວ່າ ຫວຽດນາມ ຍາມໃດກໍ່ຖືເປັນສຳຄັນ ແລະປາດຖະໜາຢາກເພີ່ມທະວີການພົວພັນຮ່ວມມືກັບອົງການຈັດຕັ້ງບັນດາປະເທດ Turkic ເວົ້າລວມ ແລະແຕ່ລະປະເທດສະມາຊິກເວົ້າສະເພາະ.
ຕີລາຄາສູງການພົວພັນມິດຕະພາບທີ່ເປັນມູນເຊື້ອ ແລະການຮ່ວມມືຫຼາຍດ້ານລະຫວ່າງຫວຽດນາມ ແລະ ອາແຊກໄບຊານ, ກາຊັກສະຖານ ແລະ ຕວກກີ ໃນໄລຍະຜ່ານມາ ສືບຕໍ່ໄດ້ຮັບການປັບປຸງຜ່ານການພົບປະທຸກຂັ້ນເປັນປະຈໍາ, ທ່ານປະທານປະເທດ ໂຕເລິມ ສະເໜີໃຫ້ບັນດາເອກອັກຄະລັດຖະທູດ ສືບຕໍ່ສົມທົບກັນຢ່າງແໜ້ນແຟ້ນກັບບັນດາອົງການຂອງຫວຽດນາມ ເພື່ອຊຸກຍູ້ການແລກປ່ຽນຄະນະຜູ້ແທນ; ພິເສດແມ່ນການຢ້ຽມຢາມຂັ້ນສູງ. ທ່ານປະທານປະເທດ ເນັ້ນໜັກວ່າ ຫວຽດນາມ ແລະ ອາແຊກໄບຊານ, ກາຊັກສະຖານ ແລະ ຕວກກີ ຕ້ອງສືບຕໍ່ສົມທົບກັນຢ່າງແໜ້ນແຟ້ນ, ມີປະສິດທິຜົນ, ສະໜັບສະໜູນເຊິ່ງກັນ ແລະກັນ ຢູ່ບັນດາເວທີປາໄສສາກົນ ແລະພາກພື້ນ, ໃນນັ້ນມີສະຫະປະຊາຊາດ.
|
|
ທ່ານ ໂຕເລິມ ປະທານປະເທດຫວຽດນາມ ແລະເອກອັກຄະລັດຖະທູດບັນດາປະເທດ ຂຶ້ນກັບອົງການຈັດຕັ້ງບັນດາປະເທດ Turkic. ພາບ: ສໍານັກຂ່າວສານຫວຽດນາມ. |
ທ່ານປະທານປະເທດ ໂຕເລິມ ເຊື່ອໝັ້ນວ່າ ດ້ວຍປະສົບການ ແລະຄວາມສຸດຈິດສຸດໃຈໃນວຽກງານ, ບັນດາເອກອັກຄະລັດຖະທູດຈະປະກອບສ່ວນແທດຈິງຫຼາຍຢ່າງເຂົ້າໃນການຊຸກຍູ້ການພົວພັນຮ່ວມມືລະຫວ່າງຫວຽດນາມ - ອາແຊກໄບຊານ, ກາຊັກສະຖານ ແລະ ຕວກກີ ໃນໄລຍະຈະມາເຖິງ, ເຮັດໃຫ້ການພົວພັນລະຫວ່າງສອງປະເທດພັດທະນາຮອບດ້ານ, ເຂັ້ມແຂງກວ່າອີກ, ພ້ອມທັງຢືນຢັນວ່າ ພັກ, ລັດ ແລະບັນດາກະຊວງ, ຂະແໜງການຂອງຫວຽດນາມ ຈະສ້າງເງື່ອນໄຂສະດວກເພື່ອໃຫ້ບັນດາເອກອັກຄະລັດຖະທູດປະຕິບັດໜ້າທີ່ການທູດ ຢູ່ຫວຽດນາມ ປະສົບຜົນສຳເລັດ.
ບັນດາເອກອັກຄະລັດຖະທູດອາແຊກໄບຊານ, ກາຊັກສະຖານ ແລະ ຕວກກີ ເນັ້ນໜັກວ່າ ບົນພື້ນຖານການພົວພັນມິດຕະພາບ ແລະການຮ່ວມມືຫຼາຍດ້ານ, ບັນດາປະເທດຖືເປັນສຳຄັນບົດບາດຂອງ ຫວຽດນາມ, ປາດຖະໜາຢາກ ເປີດກວ້າງການພົວພັນຮ່ວມມືສອງຝ່າຍກັບຫວຽດນາມ ກວ່າອີກ ກໍ່ຄືການສົມທົບກັນຢ່າງແໜ້ນແຟ້ນຢູ່ບັນດາເວທີປາໄສຫຼາຍຝ່າຍ, ຊຸກຍູ້ການຮ່ວມມືລະຫວ່າງ Turkic ແລະ ອາຊຽນ ເພື່ອຜົນປະໂຫຍດຂອງແຕ່ລະປະເທດ, ເພື່ອສັນຕິພາບ, ການຮ່ວມມື ແລະການພັດທະນາຢູ່ສອງພາກພື້ນ ແລະໃນໂລກ.
ໂດຍ: ຈາງຫງວຽນ