ທ່ານນາຍົກລັດຖະມົນຕີ ຟ້າມມິງຈີ້ງ ສະແດງຄວາມປິຕິຊົມຊື່ນ ແລະຂອບໃຈທ່ານຮອງນາຍົກລັດຖະມົນຕີ ຈີນ Zhang Guoqing ໄດ້ເຂົ້າຮ່ວມກອງປະຊຸມການຮ່ວມມື ຫວຽດນາມ - ຈີນ ກ່ຽວກັບການພັດທະນາພື້ນຖານໂຄງລ່າງຍຸດທະສາດດ້ານຄົມມະນາຄົມ ແລະບົດບາດຂອງບັນດາວິສາຫະກິດ ຫວຽດນາມ - ຈີນ, ສະແດງໃຫ້ເຫັນຄວາມເອົາໃຈໃສ່ອັນໃຫຍ່ຫຼວງຂອງລັດຖະບານສອງປະເທດ ກ່ຽວກັບການຮ່ວມມືໃນຂົງເຂດນີ້ໃນໄລຍະຈະມາເຖິງ.
    |
 |
|
ທ່ານນາຍົກລັດຖະມົນຕີ ຟ້າມມິງຈີ້ງ ຕ້ອນຮັບທ່ານ Zhang Guoqing ຮອງນາຍົກລັດຖະມົນຕີ ຈີນ. ພາບ: ສໍານັກຂ່າວສານຫວຽດນາມ. |
ທ່ານນາຍົກລັດຖະມົນຕີ ຟ້າມມິງຈີ້ງ ເນັ້ນໜັກວ່າ ໃນບັນດາວຽກງານທີ່ຕ້ອງເຮັດເພື່ອຫັນຄວາມຮັບຮູ້ລວມຂັ້ນສູງ, ຖະແຫຼງການຮ່ວມ ຫວຽດນາມ - ຈີນ ໃຫ້ເປັນລະອຽດ ນັ້ນ ການຄົມມະນາຄົມແມ່ນຂົງເຂດບຸກທະລຸ, ເປັນໄປໄດ້ ແລະມີລັກສະນະເປັນສັນຍາລັກ, ມີຄວາມໝາຍສໍາຄັນ ເພື່ອເຊື່ອມຕໍ່ຍຸດທະສາດສອງພື້ນຖານເສດຖະກິດ, ເຊື່ອມຕໍ່ລະຫວ່າງຂອບເຂດ “ສອງແລວທາງ, ໜຶ່ງເສັ້ນທາງ” ຂອງຫວຽດນາມ ກັບຂໍ້ລິເລີ່ມ “ໜຶ່ງແລວ ແລະໜຶ່ງເສັ້ນທາງ” ຂອງ ຈີນ. ທ່ານນາຍົກລັດຖະມົນຕີ ສະເໜີ, ກ່ອນອື່ນໝົດສອງຝ່າຍສຸມໃສ່ຊຸກຍູ້ການຮ່ວມມືຜັນຂະຫຍາຍ 3 ເສັ້ນທາງລົດໄຟທີ່ເຊື່ອມຕໍ່ ຫວຽດນາມ - ຈີນ (ລາວກາຍ-ຮ່າໂນ້ຍ-ຫາຍຟ່ອງ; ລ້າງເຊີນ-ຮ່າໂນ້ຍ; ມ໋ອງກ໋າຍ-ຮະລອງ-ຫາຍຟ່ອງ).
ທ່ານນາຍົກລັດຖະມົນຕີ ຟ້າມມິງຈີ້ງ ຕີລາຄາວ່າບັນດາເສັ້ນທາງລົດໄຟສາຍນີ້ຈະປະກອບສ່ວນຊ່ວຍໃຫ້ສອງປະເທດ ຫວຽດນາມ - ຈີນ “ທີ່ມີພູຜາ ແລະແມ່ນໍ້າລໍາເຊຕິດຈອດກັນ” ຫຼຸດຜ່ອນຄ່າໃຊ້ຈ່າຍໂລຈິດສະຕິກ, ຫຼຸດຜ່ອນລາຄາຕົ້ນທຶນ, ຍົກສູງກໍາລັງແກ່ງແຍ້ງຂອງຜະລິດຕະພັນ, ສິນຄ້າ, ຊຸກຍູ້ການຜະລິດ, ດໍາເນີນທຸລະກິດ, ສ້າງວຽກເຮັດງານທໍາ, ລ້ຽງຊີບໃຫ້ແກ່ປະຊາຊົນ, ພັດທະນາເສດຖະກິດ-ສັງຄົມ. ທ່ານນາຍົກລັດຖະມົນຕີ ຟ້າມມິງຈີ້ງ ສະເໜີຝ່າຍ ຈີນ ສຸມໃສ່ໜູນຊ່ວຍຫວຽດນາມ ໃນ 3 ເນື້ອໃນຫຼັກໃນຂົງເຂດເສັ້ນທາງລົດໄຟ, ລວມມີ: ຄົ້ນຄວ້າ, ຖ່າຍທອດເຕັກໂນໂລຊີ; ແຫຼ່ງທຶນພິເສດ; ກໍ່ສ້າງຊັບພະຍາກອນມະນຸດ. ສອງຝ່າຍຮ່ວມກັນຖອດຖອນບົດຮຽນຈາກບັນດາໂຄງການໃນເມື່ອກ່ອນ ເພື່ອດັດປັບ, ເຮັດໃຫ້ບັນດາແຜນການ, ໂຄງການຮ່ວມມືໃນຕໍ່ໜ້າດີກວ່າ.
ສ່ວນທ່ານຮອງນາຍົກລັດຖະມົນຕີ ຈີນ Zhang Guoqing ເຫັນດີເປັນເອກະພາບສູງຕໍ່ບັນດາຄໍາເຫັນ, ວິໄສທັດ, ຄວາມເອົາໃຈໃສ່ຂອງທ່ານນາຍົກລັດຖະມົນຕີ ຟ້າມມິງຈີ້ງ ທີ່ມີຕໍ່ການເຊື່ອມຕໍ່ເສດຖະກິດ, ເຊື່ອມຕໍ່ການຄົມມະນາຄົມລະຫວ່າງສອງປະເທດ ຫວຽດນາມ-ຈີນ, ໃນນັ້ນມີຂົງເຂດເສັ້ນທາງລົດໄຟແມ່ນບຸລິມະສິດ, ໂດຍສະເພາະແມ່ນຊຸກຍູ້ການຜັນຂະຫຍາຍ 3 ໂຄງການ ເສັ້ນທາງລົດໄຟ ທີ່ທ່ານນາຍົກລັດຖະມົນຕີ ໄດ້ເຕື້ອງເຖິງໂດຍໄວ.
ຕອນເຊົ້າວັນດຽວກັນ, ທ່ານນາຍົກລັດຖະມົນຕີ ຟ້າມມິງຈີ້ງ ພ້ອມກັບທ່ານຮອງນາຍົກລັດຖະມົນຕີ ຈີນ Zhang Guoqing ເຂົ້າຮ່ວມ ແລະກ່າວຄໍາເຫັນທີ່ກອງປະຊຸມ “ການຮ່ວມມື ຫວຽດນາມ-ຈີນ ກ່ຽວກັບການພັດທະນາພື້ນຖານໂຄງລ່າງຍຸດທະສາດດ້ານຄົມມະນາຄົມ ແລະບົດບາດຂອງບັນດາວິສາຫະກິດ ຫວຽດນາມ - ຈີນ”.
|
|
 |
|
ທ່ານນາຍົກລັດຖະມົນຕີ ຟ້າມມິງຈີ້ງ ກ່າວຄໍາເຫັນທີ່ກອງປະຊຸມການຮ່ວມມື ຫວຽດນາມ - ຈີນ ກ່ຽວກັບການພັດທະນາພື້ນຖານໂຄງລ່າງຍຸດທະສາດດ້ານຄົມມະນາຄົມ. ພາບ: ສໍານັກຂ່າວສານຫວຽດນາມ. |
ກ່າວຄໍາເຫັນທີ່ກອງປະຊຸມ, ທ່ານນາຍົກລັດຖະມົນຕີ ຟ້າມມິງຈີ້ງ ເນັ້ນໜັກວ່າ ການພັດທະນາການເຊື່ອມຕໍ່ພື້ນຖານໂຄງລ່າງຍຸດທະສາດດ້ານຄົມມະນາຄົມ ຫວຽດນາມ - ຈີນ ມີຄວາມໝາຍສໍາຄັນເປັນພິເສດ, ແມ່ນຄວາມຮຽກຮ້ອງຕ້ອງການພາວະວິໄສຍ້ອນສອງປະເທດ “ມີພູຜາ ແລະແມ່ນໍ້າລໍາເຊຕິດຈອດກັນ”. ສິ່ງນີ້ອໍານວຍຄວາມສະດວກໃຫ້ແກ່ການພົບປະແລກປ່ຽນປະຊາຊົນ, ແລກປ່ຽນສິນຄ້າ, ເຊື່ອມຕໍ່ພາກພື້ນ ແລະສາກົນ; ຈີນ ສາມາດຜ່ານຫວຽດນາມ ເຂົ້າອາຊຽນ; ຫວຽດນາມ ສາມາດຜ່ານ ຈີນ ເຂົ້າບັນດາປະເທດອາຊີກາງ, ເອີລົບຕາເວັນອອກ.
ຫວຽດນາມ ປາດຖະໜາຢາກຖອດຖອນບົດຮຽນຮ່ວມມືກັບຈີນ ໃນຂົງເຂດພື້ນຖານໂຄງລ່າງຍຸດທະສາດດ້ານຄົມມະນາຄົມ. ຫວຽດນາມ ແລະຈີນ ແມ່ນສອງປະເທດບ້ານໃກ້ເຮືອນຄຽງທີ່ສະໜິດສະໜົມ, ສະນັ້ນ ມີເງື່ອນໄຂເພື່ອພັດທະນາ 5 ແບບວິທີຂົນສົ່ງ. ໃນໄລຍະຜ່ານມາ, ການຮ່ວມມືດ້ານຄົມມະນາຄົມ ພັດທະນາຢ່າງແຮງ, ບັນລຸໝາກຜົນຕັ້ງໜ້າຫຼາຍຢ່າງ, ປະກອບສ່ວນ ເຂົ້າໃນການພັດທະນາການພົວພັນດ້ານການຄ້າສອງຝ່າຍຢ່າງແຮງ.
ສໍາລັບບັນດາວິສາຫະກິດສອງປະເທດ, ທ່ານນາຍົກລັດຖະມົນຕີ ຟ້າມມິງຈີ້ງ ສະເໜີຕ້ອງຍູ້ແຮງກວ່າອີກການຮ່ວມມືເຊື່ອມຈອດຕາມຮູບການຮ່ວມທຸລະກິດດ້ວຍຫຼັກການ “ກົມກຽວດ້ານຜົນປະໂຫຍດ, ແບ່ງປັນຄວາມສ່ຽງ”, “ພ້ອມກັນເຮັດ, ພ້ອມກັນຊະນະ, ພ້ອມກັນພັດທະນາ”, ມີບັນດາໂຄງການຮ່ວມມືທີ່ເປັນ ສັນຍາລັກລະຫວ່າງສອງປະເທດໂດຍໄວ. ທ່ານ ຟ້າມມິງຈີ້ງ ຫວັງວ່າ ໃນໄລຍະຈະມາເຖິງ ຈະມີບາດກ້າວບຸກທະລຸໃນການພົວພັນສອງປະເທດ, ຕາມຈິດໃຈ “6 ກວ່າ”, ໃນນັ້ນມີ ແທດຈິງກວ່າ, ມີປະສິດທິຜົນກວ່າ.
|
|
 |
|
ທ່ານນາຍົກລັດຖະມົນຕີ ຟ້າມມິງຈີ້ງ ເດີນທາງກັບຄືນປະເທດ, ສິ້ນສຸດການເຂົ້າຮ່ວມກອງປະຊຸມ WEF Dalian 2024 ແລະເຮັດວຽກຢູ່ ສປ ຈີນ, ຕອນບ່າຍວັນທີ 27 ມິຖຸນາ 2024. ພາບ: ສໍານັກຂ່າວສານຫວຽດນາມ. |
ກໍໃນຕອນເຊົ້າວັນທີ 27 ມິຖຸນາ, ຢູ່ນະຄອນຫຼວງປັກກິ່ງ, ທ່ານນາຍົກລັດຖະມົນຕີ ຟ້າມມິງຈີ້ງ ໄດ້ຕ້ອນຮັບການນໍາບາງກຸ່ມບໍລິສັດແຖວໜ້າໃນຂົງເຂດພັດທະນາພື້ນຖານໂຄງລ່າງ, ພະລັງງານ, ສິ່ງແວດລ້ອມຂອງ ຈີນ, ລວມມີກຸ່ມບໍລິສັດກໍ່ສ້າງປາຊີຟິດ ແລະກຸ່ມບໍລິສັດ Tian Ying.
ນີ້ແມ່ນການເຄື່ອນໄຫວສຸດທ້າຍຂອງທ່ານນາຍົກລັດຖະມົນຕີ ຟ້າມມິງຈີ້ງ ໃນການເຂົ້າຮ່ວມກອງປະຊຸມ WEF Dalian 2024 ແລະເຮັດວຽກຢູ່ ສປ ຈີນ. ຕອນບ່າຍວັນດຽວກັນ, ທ່ານນາຍົກລັດຖະມົນຕີ ຟ້າມມິງຈີ້ງ ພ້ອມດ້ວຍຄະນະ ໄດ້ອອກຈາກປັກກິ່ງ ເດີນທາງກັບຄືນຮ່າໂນ້ຍ, ສິ້ນສຸດການໄປປະຕິບັດງານ ດ້ວຍຜົນສໍາເລັດຢ່າງຈົບງາມ.
ໂດຍ: ໄຊຊະນະ