ນາຍົກລັດຖະມົນຕີ ຟ້າມມິງຈິ໊ງ ພົບປະກັບປະທານາທິບໍດີບາງປະເທດ

ທີ່ການພົບປະກັບປະທານາທິບໍດີ ບຣາຊິນ, ທ່ານນາຍົກລັດຖະມົນຕີ ຟ້າມມິງຈິ໊ງ ຢັ້ງຢືນວ່າ ຫວຽດນາມ ຖືເປັນສຳຄັນ ແລະປາດຖະໜາຢາກເພີ່ມທະວີການພົວພັນຄູ່ຮ່ວມມືຮອບດ້ານກັບ ບຣາຊິນ, ແມ່ນໜຶ່ງໃນບັນດາຄູ່ຮ່ວມມືສຳຄັນແຖວໜ້າຂອງຫວຽດນາມ ໃນພາກພື້ນ. ທ່ານນາຍົກລັດຖະມົນຕີ ສະເໜີໃຫ້ ບຣາຊິນ ສະໜັບສະໜູນ, ຊຸກຍູ້ດຳເນີນການເຈລະຈາສັນຍາການຄ້າເສລີລະຫວ່າງຫວຽດນາມ ແລະກຸ່ມຕະຫຼາດລວມອາເມລິກາໃຕ້ (MERCOSUR); ສືບຕໍ່ສົມທົບ ແລະສະໜັບສະໜູນເຊິ່ງກັນ ແລະກັນຢູ່ບັນດາອົງການຈັດຕັ້ງສາກົນ ແລະເວທີປາໄສຫຼາຍຝ່າຍ, ເປັນຕົ້ນແມ່ນຢູ່ ສປຊ, WTO ແລະເວທີປາໄສຫຼາຍຝ່າຍອື່ນໆ ເຊິ່ງສອງຝ່າຍເປັນສະມາຊິກ. ຫວຽດນາມ ພ້ອມແລ້ວທີ່ຈະເປັນຂົວເຊື່ອມຕໍ່ເພື່ອເພີ່ມທະວີການພົວພັນລະຫວ່າງອາຊຽນ ແລະບຣາຊິນ ດ້ວຍບົດບາດເປັນຄູ່ຮ່ວມມືຕາມຂົງເຂດ, ລະຫວ່າງອາຊຽນ ແລະກຸ່ມ MERCOSUR.

ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ພົບປະກັບທ່ານ Lula da Silva ປະທານາທິບໍດີ ບຣາຊິນ. ພາບ: ສໍານັກຂ່າວສານຫວຽດນາມ.

ສ່ວນທ່ານປະທານາທິບໍດີ Lula da Silva ກໍ່ສະແດງຄວາມຊົມເຊີຍຜົນງານຂອງຫວຽດນາມ ໃນການຟື້ນຟູເສດຖະກິດ-ສັງຄົມ; ທ່ານສະເໜີໃຫ້ສອງປະເທດສືບຕໍ່ຊຸກຍູ້ການຮ່ວມມືໃນທຸກດ້ານຢ່າງແທດຈິງ, ເປັນຕົ້ນແມ່ນການຮ່ວມມືດ້ານການຄ້າ, ກະສິກຳ, ການພົບປະແລກປ່ຽນປະຊາຊົນ, ການປະສານສົມທົບທີ່ບັນດາອົງການຈັດຕັ້ງສາກົນ, ເວທີປາໄສຫຼາຍຝ່າຍ.

ທີ່ກອງປະຊຸມປຶກສາຫາລື “ມຸ່ງໄປສູ່ໂລກແຫ່ງສັນຕິພາບ, ສະຖຽນລະພາບ ແລະຄວາມວັດທະນາຖາວອນ”, ທ່ານນາຍົກລັດຖະມົນຕີ ຟ້າມມິງຈິ໊ງ ໄດ້ມີການພົບປະກັບທ່ານ Volodymyr Oleksandrovych Zelensky ປະທານາທິບໍດີ ຢູແກຣນ.

ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ພົບປະກັບທ່ານ Volodymyr Oleksandrovych Zelensky  ປະທານາທິບໍດີ ຢູແກຣນ.  ພາບ: baochinhphu.

ທີ່ການພົບປະ, ທ່ານນາຍົກລັດຖະມົນຕີ ໄດ້ເນັ້ນໜັກວ່າ ຫວຽດນາມ ຖືເປັນສຳຄັນການພົວພັນຮ່ວມມືມິດຕະພາບທີ່ເປັນມູນເຊື້ອລະຫວ່າງສອງປະເທດ. ກ່ຽວກັບການປະທະກັນຢູ່ ຢູແກຣນ ໃນປະຈຸບັນ, ຫວຽດນາມ ຫວັງວ່າ ບັນດາຝ່າຍທີ່ກ່ຽວຂ້ອງຈະຢຸດຕິການປະທະກັນໂດຍໄວ, ດຳເນີນການເຈລະຈາຄືນໃໝ່, ແກ້ໄຂການຂັດແຍ່ງກັນໂດຍສັນຕິວິທີ. ຫວຽດນາມ ໄດ້ໜູນຊ່ວຍດ້ານມະນຸດສະທຳໃຫ້ແກ່ປະຊາຊົນ ຢູແກຣນ ແລະພ້ອມແລ້ວທີ່ຈະໜູນຊ່ວຍຝ່າຍຕ່າງໆ ໃນການຊອກຫາວິທີແກ້ໄຂໂດຍສັນຕິວິທີບົນພື້ນຖານກົດໝາຍສາກົນ ແລະເຄົາລົບຜົນປະໂຫຍດອັນຊອບທຳຂອງຝ່າຍຕ່າງໆ.

ທ່ານປະທານາທິບໍດີ Volodymyr Oleksandrovych Zelensky ໄດ້ແບ່ງປັນຕໍ່ຄວາມເຫັນຂອງທ່ານນາຍົກລັດຖະມົນຕີ ຟ້າມມິງຈິ໊ງ, ໂດຍສະແດງຄວາມຊົມເຊີຍຕໍ່ຫຼັກໝັ້ນ ແລະການໜູນຊ່ວຍດ້ານມະນຸດສະທຳຂອງຫວຽດນາມ, ເຫັນດີເປັນເອກະພາບຈະມີມາດຕະການເພື່ອເພີ່ມທະວີການພົວພັນຮ່ວມມືສອງຝ່າຍລະຫວ່າງສອງປະເທດ.

ໂດຍ: ເຈິ່ນຮວ່ຽນ