ປະທານປະເທດຫວຽດນາມ ຕ້ອນຮັບຜູ້ແທນກອງປະຊຸມໃຫຍ່ ຄັ້ງທີ 22 ສະພາສັນຕິພາບໂລກ
ກປ.ອອນໄລ - ຕອນບ່າຍວັນທີ 23 ພະຈິກ, ທີ່ການຕ້ອນຮັບຜູ້ແທນ 91 ຄົນທີ່ມາຈາກ 45 ປະເທດເຂົ້າຮ່ວມກອງປະຊຸມໃຫຍ່ ຄັ້ງທີ 22 ສະພາສັນຕິພາບໂລກ (WPC) ພວມດໍາເນີນຢູ່ຮ່າໂນ້ຍ, ທ່ານ ຫງວຽນຊວນຟຸກ ປະທານປະເທດຫວຽດນາມ ຢັ້້ງຢືນວ່າ ຫວຽດນາມ ແລະ WPC ມີການພົວພັນສະໜິດຕິດແໜ້ນພິເສດ.
ນັບແຕ່ປີ 1949, ຫວຽດນາມ ໄດ້ເຂົ້າຮ່ວມສ້າງຕັ້ງ WPC ຢູ່ກອງປະຊຸມໃຫຍ່ ປະຊາຊົນໂລກປົກປັກຮັກສາສັນຕິພາບຢູ່ ປາຣີ. ປະເທດ, ປະຊາຊົນຫວຽດນາມ ຍາມໃດກໍ່ເຄົາລົບ, ຈົດຈໍາການສະໜັບສະໜູນ, ຄວາມສາມັກຄີຢ່າງແຮງ ແລະຊ່ວຍເຫຼືອອັນລໍ້າຄ່າຂອງບັນດາອົງການຈັດຕັ້ງປະຊາທິປະໄຕ, ກ້າວໜ້າສາກົນ, ໃນນັ້ນ ມີ WPC ແລະບັນດາອົງການຈັດຕັ້ງສະມາຊິກຕໍ່ກັບການຕໍ່ສູ້ຍາດເອົາເອກະລາດແຫ່ງຊາດໃນເມື່ອກ່ອນ, ກໍ່ຄືໃນການສ້າງສາ ແລະປົກປັກຮັກສາປະເທດໃນປະຈຸບັນ.
    |
 |
ປະທານປະເທດ ຫງວຽນຊວນຟຸກ ກັບຄະນະຜູ້ແທນກອງປະຊຸມໃຫຍ່ ຄັ້ງທີ 22 ສະພາສັນຕິພາບໂລກ. ພາບ: ສໍານັກຂ່າວສານຫວຽດນາມ. |
ປະທານປະເທດ ຕີລາຄາສູງບັນດາການປະກອບສ່ວນຢ່າງຕັ້ງໜ້າຂອງ WPC ແລະບັນດາອົງການຈັດຕັ້ງສະມາຊິກຂອງສະພາໃນການສະກັດກັ້ນສົງຄາມ, ກໍ່ສ້າງໂລກແຫ່ງສັນຕິພາບ ແລະຍຸຕິທໍາ; ພິເສດແມ່ນບັນດາການເຄື່ອນໄຫວສະໜັບສະໜູນການຕໍ່ສູ້ປົດປ່ອຍຊາດຂອງປະຊາຊົນບັນດາປະເທດ, ປົດອາວຸດນິວເຄຼຍ ແລະສະໜັບສະໜູນບັນດາຜູ້ຖືກເຄາະຮ້າຍຈາກສົງຄາມ.
ປະທານປະເທດເຊື່ອໝັ້ນວ່າ, ກອງປະຊຸມໃຫຍ່ ຄັ້ງທີ 22 ຂອງ WPC ຈະປະສົບຜົນສໍາເລັດຢ່າງຈົບງາມດ້ວຍຫຼາຍຂໍ້ລິເລີ່ມ, ໂຄງການກະທໍາແທດຈິງເພື່ອຊຸກຍູ້ສັນຕິພາບ ແລະຄວາມສາມັກຄີສາກົນ.
ປະທານປະເທດຢັ້ງຢືນວ່າ ຫວຽດນາມ ຍາມໃດກໍ່ຖືເປັນສໍາຄັນ, ເຊີດຊູບັນດາຫຼັກການພື້ນຖານຂອງກົດບັດ ສປຊ ແລະກົດໝາຍສາກົນກ່ຽວກັບການເຄົາລົບເອກະລາດ, ປະຊາທິປະໄຕ, ຜືນແຜ່ນດິນອັນຄົບຖ້ວນ, ບໍ່ແຊກແຊງເຂົ້າວຽກງານພາຍໃນຂອງບັນດາປະເທດ, ບໍ່ນໍາໃຊ້ ຫຼື ນາບຂູ່ການນໍາໃຊ້ອາວຸດໃນການພົວພັນສາກົນ, ແກ້ໄຂບັນດາການຂັດແຍ້ງກັນໂດຍສັນຕິວິທີໂດຍອີງໃສ່ກົດໝາຍສາກົນ. ຫວຽດນາມ ມີແຜນນະໂຍບາຍເປັນເພື່ອນມິດ, ເປັນຄູ່ຮ່ວມມືທີ່ໄວ້ເນື້ອເຊື່ອໃຈ ແລະເປັນສະມາຊິກທີ່ມີຄວາມຮັບຜິດຊອບໃນປະຊາຄົມສາກົນ, ການຮ່ວມມືສັນຕິພາບ, ຕ່າງຝ່າຍຕ່າງມີຄວາມສົນໃຈ.
ທີ່ການຕ້ອນຮັບ, ການນໍາ WPC ແລະສາພາສັນຕິພາບບັນດາປະເທດໄດ້ສະແດງຄວາມເຄົາລົບ, ສະແດງອາລົມຈິດຄວາມຮັກແພງທີ່ມີຕໍ່ປະທານໂຮ່ຈີມິນ; ມີຄວາມນິຍົມນັບຖືຕໍ່ມູນເຊື້ອ, ຜົນງານຂອງປະເທດຊາດ ແລະປະຊາຊົນຫວຽດນາມ ວິລະຊົນ-ສັນຍາລັກຂອງສັນຕິພາບໂລກ. ບັນດາຜູ້ແທນໄດ້ອວຍພອນ ແລະຕີລາຄາສູງການຫັນປ່ຽນຕົນເອງຢ່າງແຮງກ່ຽວກັບທຸກດ້ານຂອງຫວຽດນາມ. ຜູ້ແທນບັນດາປະເທດປາດຖະໜາຢາກຮ່ວມມືກັບຫວຽດນາມ ເພື່ອຮັກສາພື້ນຖານສັນຕິພາບໂລກ, ເພື່ອໂລກສະເໝີພາບ, ຍຸຕິທໍາ, ເພາະວ່າປະຊາຊົນຫວຽດນາມ ຮັກສັນຕິພາບ ແລະຫວຽດນາມ ມີທີ່ຕັ້ງສໍາຄັນໃນດວງໃຈຜູ້ຮັກຫອມສັນຕິພາບໂລກ.
ໂດຍ: ໄຊນີດາ