ບັນດາລັດຖະມົນຕີການຕ່າງປະເທດອາຊຽນ ແລະຄູ່ຮ່ວມມື ຈະເຂົ້າຮ່ວມກວ່າ 20 ການເຄື່ອນໄຫວໃນຂອບເຂດອາຊຽນ, ອາຊຽນ+1, ອາຊຽນ+3, ກອງປະຊຸມສຸດຍອດອາຊີຕາເວັນອອກ (EAS) ແລະເວທີປາໄສພາກພື້ນອາຊຽນ (ARF), ປຶກສາຫາລືກ່ຽວກັບວິວັດການກໍ່ສ້າງປະຊາຄົມອາຊຽນ, ກໍ່ສ້າງທິດທາງພັດທະນາປະຊາຄົມອາຊຽນ ຫຼັງປີ 2025, ສໍາຫຼວດກວດຄືນ ແລະກໍານົດທິດທາງພົວພັນລະຫວ່າງອາຊຽນ ກັບບັນດາຄູ່ຮ່ວມມື, ພ້ອມທັງແລກປ່ຽນກ່ຽວກັບສະພາບການສາກົນ ແລະພາກພື້ນ.

ກ່ອນໜ້ານັ້ນ, ວັນທີ 1 ສິງຫາ ໄດ້ດໍາເນີນກອງປະຊຸມເຈົ້າໜ້າທີ່ອາວຸໂສ (SOM) ອາຊຽນ ເພື່ອກະກຽມໃຫ້ແກ່ກອງປະຊຸມ AMM-55  ແລະບັນດາກອງປະຊຸມທີ່ກ່ຽວຂ້ອງ. ທ່ານ ຫວູໂຮ່ ເອກອັກຄະລັດຖະທູດ, ຮັກສາການຫົວໜ້າ SOM ອາຊຽນ ຫວຽດນາມ ເຂົ້າຮ່ວມກອງປະຊຸມ.

leftcenterrightdel
ບັນດາເຈົ້າໜ້າທີ່ອາວຸໂສອາຊຽນ ເຂົ້າຮ່ວມກອງປະຊຸມກະກຽມໃຫ້ແກ່ກອງປະຊຸມລັດຖະມົນຕີການຕ່າງປະເທດອາຊຽນ ຄັ້ງທີ 55 ແລະກອງປະຊຸມທີ່ກ່ຽວຂ້ອງ. ພາບ: mofa.gov.vn

ບັນດາຫົວໜ້າ SOM ອາຊຽນ ໄດ້ກວດກາຄືນຄວາມຄືບໜ້າໃນການເຈລະຈາ, ສ້າງເອກະສານທີ່ຄາດວ່າຈະຍື່ນສະເໜີຕໍ່ບັນດາລັດຖະມົນຕີການຕ່າງປະເທດ, ໃນນັ້ນມີແຈ້ງການຮ່ວມ AMM-55, ແຜນການກະທໍາເພີ່ມທະວີການຜັນຂະຫຍາຍສົນທິສັນຍາພາກພື້ນອາຊີຕາເວັນອອກສ່ຽງໃຕ້ ປອດອາວຸດນິວເຄຼຍ ແລະບັນດາບົດລາຍງານອັບເດດສະພາບການຜັນຂະຫຍາຍແຜນການກະທໍາຮ່ວມມືລະຫວ່າງອາຊຽນ ກັບບັນດາຄູ່ຮ່ວມມື. ບັນດາປະເທດ ໄດ້ແລກປ່ຽນກ່ຽວກັບບຸລິມະສິດຂອງອາຊຽນ ໃນປີ 2022, ຢັ້ງຢືນຄໍາໝັ້ນສັນຍາສະໜັບສະໜູນປະທານກຳປູເຈຍ ປະຕິບັດສໍາເລັດບັນດາບຸລິມະສິດທີ່ໄດ້ວາງອອກ, ອັບເດດສະພາບການຮ່ວມມືລະຫວ່າງອາຊຽນ ກັບບັນດາຄູ່ຮ່ວມມື ແລະແລກປ່ຽນບາງບັນຫາພາກພື້ນ ແລະສາກົນ.

ໃນວັນດຽວກັນ, ກອງປະຊຸມບັນດາເຈົ້າໜ້າທີ່ອາວຸໂສການຕ່າງປະເທດ ຂອບການຮ່ວມມືແມ່ນໍ້າຂອງ-ແມ່ນໍ້າຄົງຄາ (MGC) ກໍໄດ້ດໍາເນີນຢູ່ພະນົມເປັນ, ດ້ວຍການເຂົົ້າຮ່ວມຂອງບັນດາປະເທດ: ອິນເດຍ, ກໍາປູເຈຍ, ລາວ, ມຽນມາ, ໄທ ແລະຫວຽດນາມ.

ໂດຍ: ໄຊຊະນະ