ຊຸກຍູ້ການພົວພັນລະຫວ່າງພັກກອມມູນິດຫວຽດນາມ ແລະພັກກອມມູນິດອິນເດຍ Marxist
ກປ.ອອນໄລ - ຕອນບ່າຍວັນທີ 29 ມິຖຸນາ, ຢູ່ສໍານັກງານສູນກາງພັກ, ສະຫາຍ ຫວໍວັນເຖືອງ, ກໍາມະການກົມການເມືອງ, ຜູ້ປະຈໍາການຄະນະເລຂາທິການ ໄດ້ພົບປະເຈລະຈາທາງອອນລາຍກັບສະຫາຍ Sitaram Yechury ເລຂາທິການໃຫຍ່ພັກກອມມູນິດອິນເດຍ Marxist (CPI-M).
ສະຫາຍເລຂາທິການໃຫຍ່ Sitaram Yechury ຕີລາຄາສູງບັນດາຜົນງານທີ່ຫວຽດນາມ ບັນລຸໄດ້ພາຍໃຕ້ການນຳພາຂອງພັກກອມມູນິດຫວຽດນາມ ໃນຊຸມປີຜ່ານມາ, ປາດຖະໜາຢາກເພີ່ມທະວີການພົວພັນຮ່ວມມືຢ່າງແທດຈິງກັບພັກກອມມູນິດຫວຽດນາມ ໃນຊຸມປີຕໍ່ໜ້າຜ່ານການແລກປ່ຽນຄະນະຜູ້ແທນ, ຂໍ້ມູນຂ່າວສານ ແລະແບ່ງປັນປະສົບການ, ນະໂຍບາຍ.
|
|
ບັນຍາກາດທີ່ການພົບປະເຈລະຈາທາງອອນລາຍ. ພາບ: ສໍານັກຂ່າວສານຫວຽດນາມ |
ສະຫາຍ ຫວໍວັນເຖືອງ ສະແດງຄວາມຊົມເຊີຍທີ່ພັກ CPI-M ຈັດຕັ້ງກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ 23 ສຳເລັດຜົນ ແລະສະຫາຍ Sitaram Yechury ໄດ້ຮັບການເລືອກຕັ້ງເປັນເລຂາທິການໃຫຍ່ຄືນໃໝ່, ພ້ອມທັງຢືນຢັນວ່າ ພັກກອມມູນິດຫວຽດນາມ ຖືເປັນສຳຄັນການພົວພັນມິດຕະພາບທີ່ເປັນມູນເຊື້ອກັບບັນດາພັກກອມມູນິດ ແລະຝ່າຍຊ້າຍ, ໃນນັ້ນມີພັກ CPI-M. ສະຫາຍ ຫວໍວັນເຖືອງ ເຫັນດີເປັນເອກະສັນຊຸກຍູ້ການພົວພັນລະຫວ່າງສອງພັກ, ພ້ອມກັນນັ້ນ ກໍ່ສະເໜີບັນດາທິດທາງຮ່ວມມື, ຄື: ແລກປ່ຽນຄະນະຜູ້ແທນ, ແລກປ່ຽນຂໍ້ມູນຂ່າວສານ, ບົດຮຽນປະສົບການໃນການກໍ່ສ້າງພັກ ແລະນະໂຍບາຍພັດທະນາເສດຖະກິດ-ສັງຄົມ; ສົ່ງເສີມບັນດາອົງການຈັດຕັ້ງປະຊາຊົນຂອງສອງພັກເພີ່ມທະວີການພົບປະແລກປ່ຽນ ແລະສົມທົບກັນເຄື່ອນໄຫວເນື່ອງໃນໂອກາດສະເຫຼີມສະຫຼອງ 50 ປີແຫ່ງວັນສ້າງຕັ້ງການພົວພັນທາງການທູດຫວຽດນາມ-ອິນເດຍ.
ສະຫາຍເລຂາທິການໃຫຍ່ Sitaram Yechury ໄດ້ສະແດງຄວາມເຫັນດີເຫັນພ້ອມກັບບັນດາຂໍ້ສະເໜີຂອງພັກກອມມູນິດຫວຽດນາມ ແລະພ້ອມແລ້ວທີ່ຈະສົມທົບກັນຜັນຂະຫຍາຍບັນດາມາດຕະການລະອຽດໃນໄລຍະຈະມາເຖິງ.
ໂດຍ: ທະນາພອນ