ທີ່ການຕ້ອນຮັບທ່ານ Istvan Jakab ຮອງປະທານສະພາແຫ່ງຊາດ ຮຸງກາຣີ, ທ່ານ ເວືອງດິ່ງເຫວ້ ສະແດງຄວາມປິຕິຊົມຊື່ນ ໃຫ້ຮູ້ວ່າ ນີ້ແມ່ນການຢ້ຽມຢາມ ຮຸງກາຣີ ຄັ້ງທໍາອິດຂອງທ່ານ ໃນຖານະຕໍາແໜ່ງເປັນປະທານສະພາແຫ່ງຊາດ, ນີ້ກໍແມ່ນການຢ້ຽມຢາມຄັ້ງທໍາອິດຂອງການນໍາຫຼັກແຫຼ່ງຂອງຫວຽດນາມ ເຖິງ ຮຸງກາຣີ ໃນອາຍຸການນີ້.
ທ່ານ ເວືອງດິ່ງເຫວ້ ແລະ ທ່ານ Istvan Jakab ເຫັນດີເປັນເອກະພາບ ໂດຍຖືວ່າ ການຮ່ວມມືດ້ານກະສິກໍາແມ່ນຂົງເຂດທີ່ສອງຝ່າຍຕ້ອງສຸມໃສ່ຊຸກຍູ້, ແບ່ງປັນບົດຮຽນ. ພິເສດ, ຮຸງກາຣີ ມີທ່າແຮງໃນການບໍລິຫານລະບົບການສະໜອງຈາກການປູກຝັງ, ປຸງແຕ່ງ, ດໍາເນີນທຸລະກິດ, ແຈກຢາຍທີ່ສອດຄ່ອງກັບຮູບແບບຮ່ວມສໍາພັນ “4 ນັກ” ໃນການຜະລິດກະສິກໍາຂອງຫວຽດນາມ.
|
|
ທ່ານ ເວືອງດິ່ງເຫວ້ ປະທານສະພາແຫ່ງຊາດຫວຽດນາມ ແລະທ່ານ Istvan Jakab ຮອງປະທານສະພາແຫ່ງຊາດ ຮຸງກາຣີ. ພາບ: ສໍານັກຂ່າວສານຫວຽດນາມ. |
ການນໍາສອງທ່ານ ຢັ້ງຢືນວ່າ ການພົວພັນສອງປະເທດ ຍັງມີຄວາມສາມາດບົ່ມຊ້ອນຫຼາຍຢ່າງ ເພື່ອພັດທະນາ ແລະເຊື່ອໝັ້ນວ່າ ຜົນການຢ້ຽມຢາມຄັ້ງນີ້ ຈະປະກອບສ່ວນເພີ່ມທະວີການພົວພັນຄູ່ຮ່ວມມືຮອບດ້ານ ຫວຽດນາມ- ຮຸງກາຣີ ກວ່າອີກ, ໃນນັ້ນການພົວພັນລະຫວ່າງສອງສະພາແຫ່ງຊາດ ແມ່ນເສົາຄໍ້າໜຶ່ງທີ່ສໍາຄັນ.
ສ່ວນທ່ານຮອງປະທານສະພາແຫ່ງຊາດ ຮຸງກາຣີ ຢັ້ງຢືນວ່າ ເຖິງວ່າ ສະພາບການໂລກ ແລະພາກພື້ນມີການຜັນແປຫຼາຍກໍຕາມ, ແຕ່ດ້ວຍມູນເຊື້ອມິດຕະພາບ, ການຮ່ວມມືມາແຕ່ດົນນານ, ຮຸງກາຣີ ພ້ອມແລ້ວທີ່ຈະສືບຕໍ່ແບ່ງປັນຄຸນຄ່າ, ບົດຮຽນພັດທະນາຂອງຕົນກັບຫວຽດນາມ.
ປະທານສະພາແຫ່ງຊາດ ເວືອງດິ່ງເຫວ້ ກໍເຫັນດີຖືວ່າ ໃນສະພາບການໂລກຜັນແປຢ່າງສັບສົນ ຄືໃນປັດຈຸບັນ, ດ້ວຍພື້ນຖານສໍາຄັນທີ່ສຸດແມ່ນອາລົມຈິດມິດຕະພາບ, ຄວາມຮັກແພງ ເຊິ່ງປະຊາຊົນສອງປະເທດສະຫງວນໃຫ້ກັນ - ເປັນຊັບສົມບັດອັນລໍ້າຄ່າ ເຊິ່ງບໍ່ແມ່ນວ່າປະເທດໃດກໍມີ. ນີ້ກໍແມ່ນພື້ນຖານເພື່ອໃຫ້ການນໍາ ແລະປະຊາຊົນສອງປະເທດ ສືບຕໍ່ຮັກສາ ແລະເສີມຂະຫຍາຍ.
ວັນທີ 26 ມິຖຸນາ (ຕາມເວລາທ້ອງຖິ່ນ), ໃນຂອບເຂດການຢ້ຽມຢາມ ຮຸງກາຣີ ຢ່າງເປັນທາງການ, ຢູ່ນະຄອນ Albertirsa, ທ່ານ ເວືອງດິ່ງເຫວ້ ປະທານສະພາແຫ່ງຊາດ ແລະຄະນະຜູ້ແທນຂັ້ນສູງສະພາແຫ່ງຊາດ ຫວຽດນາມ ໄດ້ໄປຢ້ຽມຢາມບໍລິສັດ Mirelite Mirsa ເຊິ່ງເປັນວິສາຫະກິດຕົວແບບຂອງນະຄອນ ກ່ຽວກັບການຜະລິດກະສິກໍາສີຂຽວ, ສະອາດ.
|
|
ທ່ານ ເວືອງດິ່ງເຫວ້ ປະທານສະພາແຫ່ງຊາດຫວຽດນາມ ຢ້ຽມຢາມໂຮງງານປຸງແຕ່ງຂອງບໍລິສັດ Mirelite Mirsa. ພາບ: ສໍານັກຂ່າວສານຫວຽດນາມ. |
ທ່ານ ເວືອງດິ່ງເຫວ້ ສະແດງຄວາມປະທັບໃຈຕໍ່ບັນດາຜົນງານ ເຊິ່ງບໍລິສັດ Mirelite Mirsa ບັນລຸໄດ້, ນັບທັງດ້ານເຕັກໂນໂລຢີການບໍລິຫານ, ການກໍ່ສ້າງເຄື່ອງໝາຍການຄ້າ ແລະຄຸນນະພາບຜະລິດຕະພັນ. ນີ້ແມ່ນບົດຮຽນອັນລໍ້າຄ່າສຳລັບວິສາຫະກິດຫວຽດນາມ. ປະທານສະພາແຫ່ງຊາດຫວຽດນາມ ຊີ້ແຈ້ງວ່າ ກະສິກໍາ, ຊາວນາ ແລະຊົນນະບົດ ຍາມໃດກໍເປັນບັນຫາຍຸດທະສາດຂອງຫວຽດນາມ.
ທ່ານ ເວືອງດິ່ງເຫວ້ ຊົມເຊີຍແຜນການເປີດກວ້າງການລົງທຶນດໍາເນີນທຸລະກິດຂອງບໍລິສັດ Mirelite Mirsa ສູ່ອາຊີຕາເວັນອອກສ່ຽງໃຕ້, ໃນນັ້ນມີຫວຽດນາມ; ພ້ອມທັງຖືວ່າ ດ້ວຍເຕັກໂນໂລຢີ ແລະເຄື່ອງໝາຍການຄ້າຂອງບໍລິສັດເມື່ອຮ່ວມມືກັບວິສາຫະກິດຫວຽດນາມ ຈະມີແງ່ຫວັງພັດທະນາດີທີ່ສຸດ, ບໍ່ພຽງແຕ່ຢູ່ຕະຫຼາດຫວຽດນາມ ດ້ວຍພົນລະເມືອງປະມານ 100 ລ້ານຄົນ ເທົ່ານັ້ນ ຫາກຍັງຢູ່ຕະຫຼາດອາຊີຕາເວັນອອກສ່ຽງໃຕ້ ດ້ວຍພົນລະເມືອງປະມານ 650 ລ້ານຄົນ ອີກດ້ວຍ.
ໂດຍ: ກວຽດເຕິມ