ຈັດຕັ້ງລາຍການ “ບຸນເຕັດອົບອຸ່ນ - ລະດູບານໃໝ່ສະຫງົບສຸກ” ປີ 2022 ຢູ່ແຂວງຮ່ານາມ
ກປ.ອອນໄລ - ວັນທີ 15 ມັງກອນ, ຢູ່ທີ່ແຂວງຮ່ານາມ, ທ່ານ ເລວັນແທ່ງ ຮອງນາຍົກລັດຖະມົນຕີ ພ້ອມດ້ວຍຄະນະປະຕິບັດງານ ໄດ້ເຂົ້າຮ່ວມລາຍການ “ບຸນເຕັດອົບອຸ່ນ - ລະດູບານໃໝ່ສະຫງົບສຸກ” ປີ 2022.
ກ່າວຄໍາເຫັນທີ່ລາຍການ, ທ່ານ ເລວັນແທ່ງ ສະແດງຄວາມປິຕິຊົມຊື່ນເມື່ອເຂົ້າຮ່ວມລາຍການ “ບຸນເຕັດອົບອຸ່ນ - ລະດູບານໃໝ່ສະຫງົບສຸກ” ປີ 2022. ເນື່ອງໃນໂອກາດບຸນປີໃໝ່ປະຈໍາຊາດ 2022 ໃກ້ຈະມາຮອດ, ທ່ານຮອງນາຍົກລັດຖະມົນຕີ ສົ່ງຄໍາອວຍພອນເຖິງອົງຄະນະພັກ, ອໍານາດການປົກຄອງ ແລະປະຊາຊົນແຂວງຮ່ານາມ, ບັນດາຄອບຄົວນະໂຍບາຍ, ຄອບຄົວທີ່ມີຄຸນງາມຄວາມດີຕໍ່ການປະຕິວັດ, ກໍາມະກອນຜູ້ອອກແຮງງານ ແລະປະຊາຊົນທຸກຖ້ວນໜ້າ ຈົ່ງມີສຸຂະພາບເຂັ້ມແຂງ, ມີຄວາມຜາສຸກ, ຕ້ອນຮັບປີໃໝ່ຢ່າງປອດໄພ, ຢູ່ດີມີແຮງ, ວັດທະນາຖາວອນ.
ທ່ານຮອງນາຍົກລັດຖະມົນຕີ ຫວັງວ່າພໍ່ແມ່ປະຊາຊົນ, ກໍາມະກອນຜູ້ອອກແຮງງານ ສືບຕໍ່ຜ່ານຜ່າຄວາມຫຍຸ້ງຍາກ, ຕິດພັນກັບວິສາຫະກິດ, ສຸມໃສ່ອອກແຮງງານທໍາການຜະລິດ, ກໍ່ສ້າງບ້ານເມືອງ ເພື່ອການພັດທະນາລວມຂອງທ້ອງຖິ່ນ, ກົມກອງ, ວິສາຫະກິດ ແລະເພື່ອຜົນປະໂຫຍດອັນຊອບທໍາຂອງແຕ່ລະຄອບຄົວ, ບຸກຄົນ…
|
|
ທ່ານ ເລວັນແທ່ງ ຮອງນາຍົກລັດຖະມົນຕີ ມອບຂອງຂວັນໃຫ້ຜູ້ຕາງໜ້າສະຫະພັນແຮງງານແຂວງຮ່ານາມ. ພາບ: ສໍານັກຂ່າວສານຫວຽດນາມ. |
ທີ່ລາຍການ “ບຸນເຕັດອົບອຸ່ນ - ລະດູບານໃໝ່ສະຫງົບສຸກ” ປີ 2022, ທ່ານຮອງນາຍົກລັດຖະມົນຕີ ພ້ອມກັບການນໍາສະຫະພັນໃຫຍ່ແຮງງານຫວຽດນາມ, ການນໍາແຂວງຮ່ານາມ ໄດ້ມອບຂອງຂວັນ 200 ພູດໃຫ້ບັນດາຄອບຄົວທຸກຍາກ ແລະກໍາມະກອນຜູ້ອອກແຮງງານ ທີ່ປະສົບຄວາມຫຍຸ້ງຍາກ.
ໃນຕອນເຊົ້າວັນດຽວກັນ, ທ່ານຮອງນາຍົກລັດຖະມົນຕີ ພ້ອມດ້ວຍຄະນະໄດ້ໄປຢ້ຽມຢາມ, ມອບຂອງຂວັນ, ອວຍພອນປີໃໝ່ບັນດາທະຫານເສຍອົງຄະ, ທະຫານເຈັບປ່ວຍທີ່ກໍາລັງປິ່ນປົວ, ກາຍຍະບຳບັດຢູ່ທີ່ສູນປິ່ນປົວບຳລຸງສຸຂະພາບທະຫານເສຍອົງຄະ ຢຸຍຕຽນ (ແຂວງຮ່ານາມ).
ໂດຍ: ໄຊຊະນະ