ທ່ານລັດຖະມົນຕີ ບຸ່ຍແທງເຊີນ ຕີລາຄາສູງການສະໜັບສະໜູນຂອງ ສິງກະໂປ ທີ່ສະຫງວນໃຫ້ແກ່ຫວຽດນາມ, ພິເສດແມ່ນໃຫ້ຄໍາໝັ້ນສັນຍາໜູນຊ່ວຍວັດຖຸອຸປະກອນການແພດທີ່ຈໍາເປັນເພື່ອຕ້ານພະຍາດໂຄວິດ-19, ໃນນັ້ນ ໃນວັນທີ 6 ກັນຍາ ຜ່ານມາ, ກອງທຶນ Temasek ຂອງສິງກະໂປ ໄດ້ມອບເຄື່ອງຊ່ວຍຫາຍໃຈຈໍານວນ  16 ໜ່ວຍ ແລະອຸປະກອນປ້ອງກັນການແພດນັບຫຼາຍແສນອັນ; ຖືນີ້ແມ່ນສັນຍາລັກທີ່ມີຊີວິດຊີວາໃຫ້ແກ່ການພົວພັນມິດຕະພາບທີ່ສະໜິດຕິດພັນ ແລະຄູ່ຮ່ວມມືຍຸດທະສາດລະຫວ່າງສອງປະເທດ. ທ່ານ ບຸ່ຍແທງເຊີນ ເນັ້ນໜັກວ່າ ຍຸດທະສາດວັກຊິນແມ່ນບັນຫາຮີບດ່ວນທີ່ສຸດຂອງຫວຽດນາມ ໃນປັດຈຸບັນ ເພື່ອແນໃສ່ຮັກສາສຸຂະພາບໃຫ້ແກ່ປະຊາຊົນ, ລວມທັງນັກຊ່ຽວຊານ ແລະຊາວຕ່າງປະເທດ ທີ່ກໍາລັງດໍາລົງຊີວິດ, ເຮັດວຽກຢູ່ຫວຽດນາມ, ພ້ອມທັງສະເໜີ ສິງກະໂປ ພິຈາລະນາໜູນຊ່ວຍ ຫຼື ໂອນວັກຊິນທີ່ຍັງເຫຼືອໃຫ້ແກ່ຫວຽດນາມ ໃຫ້ໄວເທົ່າທີ່ຈະໄວໄດ້ ເພື່ອຊ່ວຍຫວຽດນາມ ສັກວັກຊິນໃຫ້ປະຊາຊົນຢ່າງຄົບຖ້ວນ, ປະກອບສ່ວນຊຸກຍູ້ການຟື້ນຟູການເຄື່ອນໄຫວເສດຖະກິດ-ສັງຄົມ, ສະກັດກັ້ນບໍ່ໃຫ້ລະບົບການຜະລິດ ແລະສະໜອງໃນພາກພື້ນຖືກຢຸດຕິ.  

leftcenterrightdel
ທ່ານ ບຸ່ຍແທງເຊີນ ລັດຖະມົນຕີຕ່າງປະເທດຫວຽດນາມ. ພາບ: ສໍານັກຂ່າວສານຫວຽດນາມ. 

ສ່ວນທ່ານລັດຖະມົນຕີ Vivian Balakrishnan ເນັ້ນໜັກວ່າ ສິງກະໂປ ຍາມໃດກໍ່ຖືເປັນສໍາຄັນການພົວພັນຄູ່ຮ່ວມມືຍຸດທະສາດກັບຫວຽດນາມ; ແບ່ງປັນຄວາມຫຍຸ້ງຍາກຍ້ອນການຜັນແປຢ່າງສັບສົນຂອງພະຍາດໂຄວິດ-19 ຢູ່ບາງແຂວງ, ນະຄອນຂອງຫວຽດນາມ ແລະເຊື່ອໝັ້ນວ່າ ຫວຽດນາມ ຈະຄວບຄຸມພະຍາດໂຄວິດ-19 ໄດ້ໂດຍໄວ. ນອກນີ້, ທ່ານ Vivian Balakrishnan ຍັງໃຫ້ຮູ້ວ່າ, ລັດຖະບານສິງກະໂປ ພ້ອມແລ້ວທີ່ຈະໜູນຊ່ວຍບັນດາປະເທດໃກ້ຄຽງ, ໃນນັ້ນມີຫວຽດນາມ, ກ່ຽວກັບອຸປະກອນການແພດ, ຊຸດກວດຫາເຊື້ອພະຍາດກໍຄື ວັກຊິນໃນທັນທີເມື່ອເປັນໄປໄດ້; ທ່ານ ຫວັງວ່າສອງຝ່າຍສາມາດຊຸກຍູ້ການເປີດປະຕູ, ອໍານວຍຄວາມສະດວກໃຫ້ແກ່ການໄປມາຂອງພົນລະເມືອງສອງປະເທດ. ແລກປ່ຽນກ່ຽວກັບການພົວພັນສອງຝ່າຍ, ລັດຖະມົນຕີສອງທ່ານເຫັນດີເປັນເອກະພາບຊຸກຍູ້ບັນດາຂົງເຂດຮ່ວມມືດ້ານການເມືອງ, ເສດຖະກິດ, ການຄ້າ, ການລົງທຶນ, ການສຶກສາ-ກໍ່ສ້າງກວ່າອີກ ເພື່ອປັບປຸງ ແລະພັດທະນາການພົວພັນຄູ່ຮ່ວມມືຍຸດທະສາດຫວຽດນາມ-ສິງກະໂປ ຢ່າງບໍ່ຢຸດຢັ້ງ.

ໂດຍ: ໄຊຊະນະ