ເຂົ້າຮ່ວມພິທີໄຂມີທ່ານ ຫງວຽນຝູຈ້ອງ ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ, ທ່ານ ຫງວຽນຊວນຟຸກ ປະທານປະເທດ, ທ່ານ ຟ້າມມິງຈິ໊ງ ນາຍົກລັດຖະມົນຕີ, ພ້ອມດ້ວຍບັນດາສະຫາຍແມ່ນການນຳພັກ, ລັດ, ຄະນະກຳມະການສູນກາງແນວໂຮມປະເທດຊາດຫວຽດນາມ; ຜູ້ຕາງໜ້າບັນດາຄະນະ, ກະຊວງ, ຂະແໜງການ, ນັກປະຕິວັດອາວຸໂສ, ແຂກຖືກເຊີນສາກົນ, ສະມາຊິກສະພາແຫ່ງຊາດ.

leftcenterrightdel
ທ່ານ ເວືອງດິ່ງເຫວ້ ປະທານສະພາແຫ່ງຊາດຫວຽດນາມ. ພາບ: Quochoi.vn.

ກ່າວປາໄສໄຂກອງປະຊຸມ, ທ່ານ ເວືອງດິ່ງເຫວ້ ໄດ້ທົບທວນຜົນງານພົ້ນເດັ່ນຂອງການປ່ອນບັດເລືອກຕັ້ງສະມາຊິກສະພາແຫ່ງຊາດ ຊຸດທີ XV, ສະມາຊິກສະພາປະຊາຊົນທຸກຂັ້ນອາຍຸການ 2021-2026; ໄຈ້ແຍກສະພາບການສາກົນ. ພາກພື້ນ ແລະພາຍໃນປະເທດ ເພື່ອຈາກນັ້ນສັງລວມເປົ້າໝາຍ, ໜ້າທີ່ຂອງສະພາແຫ່ງຊາດ, ສະມາຊິກສະພາແຫ່ງຊາດ ຊຸດທີ XV; ເຕື້ອງເຖິງບັນດາເນື້ອໃນເຮັດວຽກເຊິ່ງສະພາແຫ່ງຊາດຈະພິຈາລະນາໃນກອງປະຊຸມຄັ້ງນີ້.

ກອງປະຊຸມສະໄໝສາມັນເທື່ອທີ 1, ສະພາແຫ່ງຊາດຫວຽດນາມ ຊຸດທີ XV ຈະດຳເນີນການເລືອກຕັ້ງ, ໃຫ້ສັດຕະຍາບັນບູລະນະບຸກຄະລາກອນເຂົ້າຕຳແໜ່ງການນຳຂອງອົງການລັດ; ພິຈາລະນາ, ປຶກສາຫາລືກ່ຽວກັບບົດລາຍງານແຜນການພັດທະນາເສດຖະກິດ-ສັງຄົມ ແລະຕົກລົງບາງບັນຫາສຳຄັນຕ່າງໆ. ລະອຽດ, ສະພາແຫ່ງຊາດ ຈະເຮັດວຽກໃນເວລາ 3 ວັນເພື່ອພິຈາລະນາ, ໃຫ້ສັດຕະຍາບັນກ່ຽວກັບວຽກງານຈັດຕັ້ງ, ບຸກຄະລາກອນ.

ທີ່ກອງປະຊຸມຄັ້ງນີ້, ສະພາແຫ່ງຊາດຈະພິຈາລະນາ, ໃຫ້ສັດຕະຍາບັນກ່ຽວກັບແຜນການພັດທະນາເສດຖະກິດ 5 ປີໄລຍະ 2021-2025; ແຜນການການເງິນແຫ່ງຊາດ 5 ປີ ໄລຍະ 2021-2025; ແຜນການກູ້ຢືມ, ຊໍາລະໜີ້ສິນໄລຍະ 2021-2025; ແຜນການລົງທຶນພາກລັດໄລຍະກາງ 2021-2025; ແຜນນະໂຍບາຍລົງທຶນໂຄງການເປົ້າໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່; ຫຼຸດຜ່ອນຄວາມທຸກຍາກ ແລະຮັບປະກັນຊີວິດສັງຄົມແບບຍືນຍົງໄລຍະ 2021-2025. ຄຽງຂ້າງກັນນັ້ນ, ທີ່ກອງປະຊຸມຄັ້ງນີ້, ສະພາແຫ່ງຊາດ ຈະພິຈາລະນາບົດລາຍງານ: ຕີລາຄາຜົນການປະຕິບັດແຜນການພັດທະນາເສດຖະກິດ-ສັງຄົມ, ງົບປະມານລັດ 6 ເດືອນຕົ້ນປີ ແລະມາດຕະການປະຕິບັດແຜນການພັດທະນາເສດຖະກິດ-ສັງຄົມ, ງົບປະມານລັດ 6 ເດືອນທ້າຍປີ 2021; ວຽກງານປະຕິບັດການປະຢັດ, ຕ້ານການຟຸມເຟືອຍ ປີ 2020. ບັນຫາສໍາຄັນຕ່າງໆກໍ່ຈະໄດ້ສະພາແຫ່ງຊາດພິຈາລະນາ, ຕົກລົງຢູ່ກອງປະຊຸມຄັ້ງນີ້.

ໂດຍ: ແສງເດືອນ