ທີ່ການສົນທະນາ, ນາຍົກລັດຖະມົນຕີສອງທ່ານ ໄດ້ແລກປ່ຽນກ່ຽວກັບມາດຕະການຊຸກຍູ້ການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງຫວຽດນາມ-ອິນເດຍ ໃນໄລຍະຈະມາເຖິງກວ່າອີກ.

ທ່ານນາຍົກລັດຖະມົນຕີ Narendra Modi ຊົມເຊີຍບັນດາຜົນງານທີ່ຫວຽດນາມ ບັນລຸໄດ້ໃນໄລຍະຜ່ານມາ, ໂດຍສະເພາະແມ່ນທັງປ້ອງກັນ, ຕ້ານພະຍາດໂຄວິດ-19 ທັງພັດທະນາເສດຖະກິດ-ສັງຄົມ; ທ່ານ ຢັ້ງຢືນວ່າ ອິນເດຍ ປາດຖະໜາຢາກເພີ່ມທະວີການພົວພັນກັບຫວຽດນາມ ໃນທຸກຂົງເຂດການເມືອງ, ເສດຖະກິດ, ການປ້ອງກັນຊາດ, ປ້ອງກັນຄວາມສະຫງົບ, ການພົບປະແລກປ່ຽນຮ່ວມມືດ້ານວັດທະນະທໍາ...

leftcenterrightdel
ການນໍາສອງທ່ານ ທີ່ສົນທະນາທາງໂທລະສັບ. ພາບ: qdnd.vn

ນາຍົກລັດຖະມົນຕີສອງທ່ານ ເຫັນດີເປັນເອກະພາບ ສືບຕໍ່ຮັກສາບັນດາການເຄື່ອນໄຫວພົບປະຂັ້ນສູງ ແລະທຸກຂັ້ນດ້ວຍຜ່ານທາງອອນລາຍ ຫຼື ໂດຍກົງ ເມື່ອໂຄວິດ-19 ໄດ້ຮັບການຄວບຄຸມດີແລ້ວ; ສົມທົບກັນຈັດຕັ້ງການເຄື່ອນໄຫວສະເຫຼີມສະຫຼອງ 50 ປີແຫ່ງວັນສ້າງຕັ້ງການພົວພັນທາງການທູດໃນປີ 2022 (7-1-1972 / 7-1-2022).

ໃນສະພາບການປັດຈຸບັນ, ການນໍາສອງທ່ານ ຢັ້ງຢືນວ່າ ສອງປະເທດຈະພ້ອມກັນຮ່ວມມືຢ່າງແໜ້ນແຟ້ນ ແລະໜູນຊ່ວຍເຊິ່ງກັນແລະກັນ ເພື່ອແນໃສ່ຍູ້ຖອຍພະຍາດໂຄວິດ-19 ໂດຍໄວ. ທ່ານນາຍົກລັດຖະມົນຕີ ຟ້າມມິງຈີ໊ງ ສະເໜີລັດຖະບານ ອິນເດຍ ບຸລິມະສິດໜູນຊ່ວຍຫວຽດນາມ ໃນການສໍາຜັດກັບແຫຼ່ງວັກຊິນດ້ວຍຫຼາຍຮູບການ ແລະໄວທີ່ສຸດ, ຫຼາຍທີ່ສຸດເທົ່າທີ່ຈະຫຼາຍໄດ້, ພ້ອມທັງຮ່ວມມືຖ່າຍທອດເຕັກໂນໂລຢີການຜະລິດວັກຊິນໃຫ້ແກ່ຫວຽດນາມ, ສ້າງເງື່ອນໄຂໃຫ້ບັນດາອົງການຂອງສອງຝ່າຍ ໃນການສະໜອງວັກຊິນຂອງອິນເດຍ ໃຫ້ຫວຽດນາມ. ທ່ານນາຍົກລັດຖະມົນຕີ ອິນເດຍ ຊົມເຊີຍ ແລະພ້ອມແລ້ວທີ່ຈະຮ່ວມມືຢ່າງແໜ້ນແຟ້ນກັບຫວຽດນາມ ໃນຂົງເຂດນີ້...

ສອງຝ່າຍ ເຫັນດີເປັນເອກະພາບເພີ່ມທະວີການສະໜັບສະໜູນເຊິ່ງກັນ ແລະກັນ ແລະສົມທົບກັນຢ່າງແໜ້ນແຟ້ນກວ່າອີກໃນເວທີປາໄສພາກພື້ນ ແລະສາກົນ. ນາຍົກລັດຖະມົນຕີສອງທ່ານ ຢັ້ງຢືນເຖິງຄວາມສໍາຄັນຂອງການຮັກສາສັນຕິພາບ, ສະຖຽນລະພາບ, ຄວາມໝັ້ນຄົງ, ຄວາມປອດໄພ, ຄວາມເສລີໃນການເດີນທະເລ ແລະການບິນ, ແກ້ໄຂການຂັດແຍ້ງກັນ ໂດຍສັນຕິວິທີ ບົນພື້ນຖານກົດໝາຍສາກົນ, ໂດຍສະເພາະແມ່ນສົນທິສັນຍາຂອງ ສປຊ ກ່ຽວກັບກົດໝາຍວ່າດ້ວຍທະເລ (UNCLOS) ປີ 1982. 

ໂດຍ: ໄຊຊະນະ