ທ່ານເລຂາທິການໃຫຍ່ ຫງວຽນຝູຈ້ອງ ເຂົ້າຮ່ວມພິທີສະເຫຼີມສະຫຼອງວັນສ້າງຕັ້ງທະນາຄານຫວຽດນາມ ຄົບຮອບ 70 ປີ
ກປ.ອອນໄລ - ຕອນເຊົ້າວັນທີ 5 ພຶດສະພາ, ທີ່ຮ່າໂນ້ຍ, ທະນາຄານແຫ່ງລັດຫວຽດນາມ ໄດ້ຈັດຕັ້ງພິທີສະເຫຼີມສະຫຼອງ 70 ປີແຫ່ງວັນສ້າງຕັ້ງທະນາຄານຫວຽດນາມ (6-5-1951 / 6-5-2021). ທ່ານ ຫງວຽນຝູຈ້ອງ ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ເຂົ້າຮ່ວມ ແລະກ່າວຄໍາເຫັນຊີ້ນໍາທີ່ພິທີ.
    |
 |
|
ທ່ານເລຂາທິການໃຫຍ່ ຫງວຽນຝູຈ້ອງ ກ່າວຄໍາເຫັນທີ່ພິທີ. ພາບ: ສໍານັກຂ່າວສານຫວຽດນາມ. |
ທີ່ພິທີ, ທ່ານນາງ ຫງວຽນທິຮົ່ງ ຜູ້ວ່າການທະນາຄານແຫ່ງລັດຫວຽດນາມ ໄດ້ສົ່ງຄໍາຂອບໃຈອັນເລິກເຊິ່ງຕໍ່ກັບການເອົາໃຈໃສ່, ຊີ້ນໍາ-ນໍາພາຂອງພັກ, ລັດ ທີ່ມີຕໍ່ຂະແໜງທະນາຄານ ແລະກໍສະແດງຄວາມຮູ້ບຸນຄຸນຕໍ່ຄຸນງາມຄວາມດີ, ການອຸທິດສ່ວນພ້ອມກັບການເສຍສະຫຼະຂອງຄົນຮຸ່ນກ່ອນຕໍ່ກັບການເຕີບໃຫຍ່ເຂັ້ມແຂງ, ພັດທະນາຂອງຂະແໜງທະນາຄານ. ທ່ານນາງ ຫງວຽນທິຮົ່ງ ເນັ້ນໜັກວ່າ: ໃນຊຸມປີຈະມາເຖິງແມ່ນໄລຍະທີ່ສະພາບການໂລກ ແລະພາຍໃນປະເທດມີຄວາມສະດວກ, ກາລະໂອກາດ, ຄວາມຫຍຸ້ງຍາກ ແລະສິ່ງທ້າທາຍສະຫຼັບກັນໄປ, ໂດຍສະເພາະແມ່ນພະຍາດໂຄວິດ-19 ຍັງສືບຕໍ່ແຜ່ລະບາດໃນຂອບເຂດທົ່ວໂລກ, ໄດ້ສ້າງບັນຫາໃໝ່, ຄວາມຕ້ອງການໃໝ່ທີ່ໜັກໜ່ວງ, ສັບສົນກວ່າເກົ່າໃຫ້ຂະແໜງທະນາຄານ. ສະນັ້ນ, ຈຶ່ງຮຽກຮ້ອງໃຫ້ພະນັກງານທະນາຄານແຕ່ລະຄົນຈົ່ງສືບຕໍ່ເສີມຂະຫຍາຍມູນເຊື້ອທີ່ໄດ້ຝຶກຝົນຫຼໍ່ຫຼອມມາຜ່ານ 70 ປີແຫ່ງການກໍ່ສ້າງ, ປ່ຽນແປງໃໝ່ ແລະພັດທະນາ...
|
|
 |
|
ທ່ານນາງ ຫງວຽນທິຮົ່ງ ຜູ້ວ່າການທະນາຄານແຫ່ງລັດຫວຽດນາມ ກ່າວຄໍາເຫັນທີ່ພິທີ. ພາບ: qdnd.vn |
ກ່າວຄໍາເຫັນທີ່ພິທີ, ທ່ານເລຂາທິການໃຫຍ່ ຫງວຽນຝູຈ້ອງ ໄດ້ຮັບຮູ້ປະຫວັດສາດແຫ່ງການພັດທະນາອັນສະຫງ່າລາສີ, ມູນເຊື້ອວິລະຊົນ ແລະການປະກອບສ່ວນອັນໃຫຍ່ຫຼວງຂອງຂະແໜງທະນາຄານຫວຽດນາມ ຕໍ່ກັບພາລະກິດແຫ່ງການຕໍ່ສູ້ປົດປ່ອຍຊາດ, ປົກປັກຮັກສາ ແລະສ້າງສາພັດທະນາປະເທດຊາດເຮົາ. ຜ່ານ 70 ປີ, ພະນັກງານ, ລັດຖະກອນ, ພາລະກອນ, ຜູ້ອອກແຮງງານຮຸ່ນຕ່າງໆຂອງຂະແໜງທະນາຄານຍາມໃດກໍມານະພະຍາຍາມສູ້ຊົນຜ່ານຜ່າຄວາມຫຍຸ້ງຍາກ, ສິ່ງທ້າທາຍນາໆປະການ, ບໍ່ຫວາດຫວັ່ນຕໍ່ຄວາມຫຍຸ້ງຍາກລໍາບາກ, ເສຍສະຫຼະເພື່ອປະຕິບັດສໍາເລັດໜ້າທີ່ປົກປ້ອງພື້ນຖານເງິນຕາທີ່ເປັນເອກະລາດ, ເປັນເຈົ້າຕົນເອງຂອງປະເທດຊາດ ໄວ້ຢ່າງໝັ້ນຄົງ...
ເນື່ອງໃນໂອກາດສະເຫຼີມສະຫຼອງ 70 ປີແຫ່ງວັນສ້າງຕັ້ງ, ພັກ, ລັດ ໄດ້ມອບຫຼຽນໄຊແຮງງານ ຊັ້ນ I ໃຫ້ທະນາຄານແຫ່ງລັດຫວຽດນາມ ຍ້ອນມີຜົນງານດີເດັ່ນຕໍ່ໜ້າທີ່ວຽກງານ ແຕ່ປີ 2016 ເຖິງປີ 2020.
ໂດຍ: ໄຊຊະນະ