ມອບຫຼຽນກາລະນຶກໃຫ້ທ່ານເອກອັກຄະລັດຖະທູດ ອິນໂດເນເຊຍ ປະຈໍາ ຫວຽດນາມ
ກປ.ອອນໄລ - ວັນທີ 24 ພະຈິກ, ທີ່ຮ່າໂນ້ຍ, ສະຫະພັນບັນດາອົງການຈັດຕັ້ງມິດຕະພາບຫວຽດນາມ (VUFO) ໄດ້ຈັດຕັ້ງພິທີມອບຫຼຽນກາລະນຶກ “ເພື່ອສັນຕິພາບ, ມິດຕະພາບລະຫວ່າງປະຊາຊາດ” ໃຫ້ທ່ານ Ibnu Hadi ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສາທາລະນະລັດອິນໂດເນເຊຍ ປະຈໍາ ຫວຽດນາມ, ເພື່ອແນໃສ່ເຊີດຊູບັນດາການອຸທິດສ່ວນທີ່ຕັ້ງໜ້າ ແລະບໍ່ຮູ້ອິດຮູ້ເມື່ອຍຂອງທ່ານເອກອັກຄະລັດຖະທູດ ໃນການຊຸກຍູ້ການພົວພັນມິດຕະພາບລະຫວ່າງຫວຽດນາມ ແລະອິນໂດເນເຊຍ.
|
|
ທ່ານນາງ ຫງວຽນເຟືອງງາ ປະທານ VUFO ມອບຫຼຽນກາລະນຶກໃຫ້ທ່ານ Ibnu Hadi ເອກອັກຄະລັດຖະທູດອິນໂດເນເຊຍ ປະຈໍາຫວຽດນາມ. ພາບ: ສໍານັກຂ່າວສານຫວຽດນາມ. |
ກ່າວຄໍາເຫັນທີ່ພິທີ, ທ່ານນາງ ຫງວຽນເຟືອງງາ ປະທານ VUFO ເນັ້ນໜັກວ່າ, ໃນໄລຍະປະຕິບັດໜ້າທີ່ການທູດຢູ່ຫວຽດນາມ, ທ່ານເອກອັກຄະລັດຖະທູດ Ibnu Hadi ໄດ້ມີບັນດາການເຄື່ອນໄຫວທີ່ຕັ້ງໜ້າ, ຊຸກຍູ້ການພົວພັນຮ່ວມມືລະຫວ່າງຫວຽດນາມ ແລະອິນໂດເນເຊຍ ໃນຫຼາຍຂົງເຂດ, ຄື: ການເມືອງ, ການທູດ, ເສດຖະກິດ, ວັດທະນະທໍາ, ກິລາ... ທ່ານ Ibnu Hadi ໄດ້ສົມທົບຢ່າງແໜ້ນແຟ້ນກັບ VUFO, ສະມາຄົມມິດຕະພາບຫວຽດນາມ-ອິນໂດເນເຊຍ ແລະບັນດາອົງການຂອງຫວຽດນາມ ເພື່ອຜັນຂະຫຍາຍບັນດາການເຄື່ອນໄຫວມິດຕະພາບ ຄື: ການເສັງຂຽນ “ການຊອກຮູ້ກ່ຽວກັບການຢ້ຽມຢາມອິນໂດເນເຊຍ ຄັ້ງປະຫວັດສາດຂອງປະທານໂຮ່ຈີມິນ ແລະທ່ານປະທານາທິບໍດີ Sukarno ມາຫວຽດນາມ; ກອງປະຊຸມສໍາມະນາ “ການຮ່ວມມືມິດຕະພາບ ເພື່ອຍົກສູງປະສິດທິຜົນການສົ່ງເສີມການລົງທຶນ ຫວຽດນາມ-ອິນໂດເນເຊຍ”...
ສ່ວນທ່ານເອກອັກຄະລັດຖະທູດ Ibnu Hadi ສະແດງຄວາມເປັນກຽດທີ່ໄດ້ຮັບຫຼຽນກາລະນຶກ “ເພື່ອສັນຕິພາບ, ມິດຕະພາບລະຫວ່າງປະຊາຊາດ” ເຊິ່ງເປັນລາງວັນອັນສູງສົ່ງທີ່ສຸດຂອງ VUFO. ທ່ານ Ibnu Hadi ຕີລາຄາສູງຕໍ່ເລື່ອງຫວຽດນາມ ດໍາລົງຕໍາແໜ່ງປະທານອາຊຽນ 2020 ສໍາເລັດຜົນໃນສະພາບທີ່ໂລກລະບາດໂຄວິດ-19 ແຜ່ລະບາດໄປທົ່ວໂລກ, ພ້ອມທັງເຊື່ອໝັ້ນວ່າການພົວພັນລະຫວ່າງ ອິນໂດເນເຊຍ-ຫວຽດນາມ ຈະສືບຕໍ່ໄດ້ຮັບການເພີ່ມທະວີໃນໄລຍະຈະມາເຖິງ.
ໂດຍ: ໄຊຊະນະ