ຫວຽດນາມ ຈະສົ່ງສານເຖິງສັບປະດາຂັ້ນສູງກອງປະຊຸມສະມັດຊາໃຫຍ່ສະຫະ ປະຊາຊາດ ສະໄໝທີ 75
ກປ.ອອນໄລ - ແຕ່ວັນທີ 21 ກັນຍາ ເຖິງວັນທີ 2 ຕຸລາ 2020, ສັບປະດາຂັ້ນສູງ ສະມັດຊາໃຫຍ່ສະຫະປະຊາຊາດ ສະໄໝທີ 75 ລວມມີ ວາລະປຶກສາຫາລືລວມຂັ້ນສູງສະມັດຊາໃຫຍ່ສະຫະປະຊາຊາດ ສະໄໝທີ 75 ແລະບັນດາເຫດການຂັ້ນສູງຢູ່ນອກອື່ນໆ ທີ່ຈະດໍາເນີນໄປຜ່ານລະບົບທາງໄກ ແລະໂດຍກົງ ຢູ່ສໍານັກງານ ສປຊ ຢູ່ນິວຢອກ, ອາເມລິກາ.
ຕາມກະຊວງການຕ່າງປະເທດຫວຽດນາມ, ຄາດວ່າໃນວັນທີ 24 ກັນຍາ, ທ່ານ ຫງວຽນຝູຈ້ອງ ເລຂາທິການໃຫຍ່, ປະທານປະເທດຫວຽດນາມ ຈະສົ່ງສານເຖິງ “ວາລະປຶກສາຫາລືລວມຂັ້ນສູງສະມັດຊາໃຫຍ່ສະຫະປະຊາຊາດ ສະໄໝທີ 75”. ວັນທີ 21 ກັນຍາ, ທ່ານ ຫງວຽນຊວນຟຸກ ນາຍົກລັດຖະມົນຕີຫວຽດນາມ ຈະສົ່ງສານເຖິງ “ວາລະກອງປະຊຸມຂັ້ນສູງສະເຫຼີມສະຫຼອງວັນສ້າງຕັ້ງອົງການສະຫະປະຊາຊາດ ຄົບຮອບ 75 ປີ”. ວັນທີ 1 ຕຸລາ, ທ່ານນາງ ຫງວຽນທິກິມເງິນ ປະທານສະພາແຫ່ງຊາດຫວຽດນາມ ຈະສົ່ງສານເຖິງວາລະກອງປະຊຸມຂັ້ນສູງສະເຫຼີມສະຫຼອງ 25 ປີແຫ່ງກອງປະຊຸມໂລກກ່ຽວກັບແມ່ຍິງ ຄັ້ງທີ IV”. ວັນທີ 2 ຕຸລາ, ທ່ານ ຟ້າມບິ່ງມິງ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດຫວຽດນາມ ຈະສົ່ງສານເຖິງ “ວາລະກອງປະຊຸມຂັ້ນສູງສະເຫຼີມສະຫຼອງວັນສາກົນວ່າດ້ວຍການລົບລ້າງອາວຸດນິວເຄຼຍຢ່າງສິ້ນເຊິງ”.
ໂດຍ: ໄຊຊະນະ