ລັດເຊຍ ແລະ ຈີນ ພ້ອມແລ້ວທີ່ຈະຍູ້ແຮງການຮ່ວມມື
ວັນທີ 15 ທັນວາ, ທ່ານປະທານປະເທດ ຈີນ ສີຈິ້ນຜີງ ໄດ້ຢັ້ງຢືນວ່າ ປະເທດນີ້ ພ້ອມແລ້ວທີ່ຈະຍູ້ແຮງການຮ່ວມມືກັບ ລັດເຊຍ ໃນບັນຫາຄຸ້ມຄອງທົ່ວໂລກ ແລະ ຊຸກຍູ້ການພັດທະນາລວມ. ນີ້ແມ່ນຄຳກ່າວປາໄສທີ່ທ່ານປະທານປະເທດຈີນ ຍົກອອກມາຢູ່ກອງປະຊຸມທາງໄກ ກັບທ່ານປະທານາທິບໍດີ ລັດເຊຍ Vladimir Putin ໃນວັນດຽວກັນ.
ໃນການພົບປະຄັ້ງນີ້, ທ່ານປະທານປະເທດ ຈີນ ຖືວ່າ ປັກກິ່ງ ແລະ ມົດສະກູ ຄວນເພີ່ມທະວີຄວາມມານະພະຍາຍາມລວມ ເພື່ອແນໃສ່ປົກປ້ອງຜົນປະໂຫຍດດ້ານຄວາມໝັ້ນຄົງຂອງແຕ່ລະຝ່າຍ. ໄປຄຽງຄູ່ກັນນັ້ນ, ທ່ານປະທານປະເທດ ຈີນ ສີຈິ້ນຜີງ ໄດ້ຮຽກຮ້ອງໃຫ້ 5 ປະເທດກຳມະການຖາວອນຂອງ ສະພາຄວາມໝັ້ນຄົງ ສປຊ ເພີ່ມທະວີການສົມທົບກັນໃນການປັບປຸງການຮ່ວມມືຕ້ານໂລກລະບາດ, ປົກປັກຮັກສາສັນຕິພາບ ແລະຄວາມໝັ້ນຄົງທົ່ວໂລກ ກໍ່ຄືຊຸກຍູ້ການຟື້ນຟູເສດຖະກິດ.
ສ່ວນທ່ານປະທານາທິບໍດີ ລັດເຊຍ Putin ໄດ້ເນັ້ນໜັກວ່າ ການພົວພັນ ລັດເຊຍ - ຈີນແມ່ນແບບຢ່າງກ່ຽວກັບການພົວພັນສາກົນໃນສະຕະວັດທີ 21. ທ່ານ Putin ໄດ້ຊີ້ແຈ້ງວ່າ: ປັດຈຸບັນ, ການພົວພັນ ລັດເຊຍ - ຈີນ ພວມຢູ່ໃນລະດັບດີທີ່ສຸດໃນປະຫວັດສາດ. ທ່ານກໍ່ຢັ້ງຢືນວ່າ ລັດເຊຍ ພ້ອມແລ້ວທີ່ຈະຮ່ວມມືກັບ ຈີນ ໃນບັນດາຂົງເຂດຄື: ການຄ້າ, ນ້ຳມັນ ແລະ ເຊື້ອເພີງ, ການເງິນ, ການບິນ ແລະ ຍານອາວະກາດ, ກໍ່ຄືບັນດາໂຄງການຍຸດທະສາດໃຫຍ່ຕ່າງໆ.
ແຫຼ່ງຄັດຈາກ: vovworld.vn