ຕອນເຊົ້າວັນທີ 11 ກໍລະກົດ, ທີ່ບາງກອກ, ປະເທດໄທ, ກອງປະຊຸມລັດຖະມົນຕີກະຊວງປ້ອງກັນປະເທດບັນດາປະເທດອາຊຽນ (ADMM) ຄັ້ງທີ 13 ດ້ວຍຫົວຂໍ້ “ຄວາມໝັ້ນຄົງແບບຍືນຍົງ” ໄດ້ໄຂຂຶ້ນຢ່າງເປັນທາງການ. ເຂົ້າຮ່ວມກອງປະຊຸມມີລັດຖະມົນຕີກະຊວງປ້ອງກັນປະເທດ, ການນຳກະຊວງປ້ອງກັນປະເທດທີ່ມາຈາກ 10 ປະເທດອາຊຽນ ແລະທ່ານ Lim Jock Hoi ເລຂາທິການໃຫຍ່ອາຊຽນ. ຄະນະຜູ້ແທນການທະຫານຂັ້ນສູງຫວຽດນາມ ນຳໂດຍທ່ານພົນເອກ ໂງຊວນລິກ, ລັດຖະມົນຕີກະຊວງປ້ອງກັນປະເທດຫວຽດນາມ ເຂົ້າຮ່ວມກອງປະຊຸມ.
    |
 |
|
ທ່ານພົນເອກ ໂງຊວນລິກ ລັດຖະມົນຕີກະຊວງປ້ອງກັນປະເທດຫວຽດນາມ ທີ່ກອງປະຊຸມ ADMM-13. ພາບ: ທູຈາງ. |
ກ່າວປາໄສໄຂກອງປະຊຸມ, ທ່ານພົນເອກ Prawit Wongsuwan, ລັດຖະມົນຕີກະຊວງປ້ອງກັນປະເທດໄທ, ປະທານ ADMM, ສະແດງຄວາມຂອບອົກຂອບໃຈ ແລະການໜູນຊ່ວຍຂອງບັນດາປະເທດສະມາຊິກຕໍ່ກັບປີປະທານອາຊຽນຂອງໄທ ແລະເລື່ອງຈັດຕັ້ງກອງປະຊຸມ ADMM ຄັ້ງທີ 13. ທ່ານພົນເອກ Prawit Wongsuwan ໃຫ້ຮູ້ວ່າ, ADMM-13 ຈະສຸມໃສ່ເລື່ອງຊຸກຍູ້ການຮ່ວມມືດ້ານປ້ອງກັນຊາດອາຊຽນຜ່ານກົນໄກ ADMM. ທ່ານພົນເອກ Prawit Wongsuwan ຢ້ັງຢືນວ່າ ADMM ແລະກອງປະຊຸມລັດຖະມົນຕີກະຊວງປ້ອງກັນປະເທດບັນດາປະເທດອາຊຽນ ເປີດກວ້າງ (ADMM+) ແມ່ນກົນໄກຕົ້ນຕໍເພື່ອເພີ່ມທະວີການຮ່ວມມືລະຫວ່າງບັນດາປະເທດອາຊຽນ, ພ້ອມທັງຮັກສາບົດບາດໃຈກາງຂອງອາຊຽນ. ຜ່ານການເຈລະຈາ ແລະການຮ່ວມມືໃນບັນດາຂົງເຂດການປ້ອງກັນຊາດ, ປ້ອງກັນຄວາມສະຫງົບ, ອາຊຽນ ໄດ້ຊຸກຍູ້ການເພີ່ມທະວີຄວາມເຂົ້າອົກເຂົ້າໃຈ ແລະຄວາມໄວ້ເນື້ອເຊື່ອໃຈເຊິ່ງກັນ ແລະກັນ.
ກ່າວຄຳເຫັນທີ່ກອງປະຊຸມ, ທ່ານພົນເອກ ໂງຊວນລິກ ລັດຖະມົນຕີກະຊວງປ້ອງກັນປະເທດຫວຽດນາມ ເນັ້ນໜັກວ່າ, ກອງປະຊຸມ ADMM-13 ໄດ້ດໍາເນີນໃນສະພາບການດ້ານການເມືອງ, ຄວາມໝັ້ນຄົງໃນໂລກ ແລະສາກົນພວມຜັນແປໄປຢ່າງສັບສົນ. ພາຍຫຼັງການພັດທະນາມາໄດ້ໄລຍະໜຶ່ງ ແລະຍາດໄດ້ຜົນງານສຳຄັນຫຼາຍຢ່າງ, ອາຊຽນ ກໍ່ປະສົບກັບສິ່ງທ້າທາຍຈຳນວນໜຶ່ງ, ໃນນັ້ນບັນດາປະເທດໃຫຍ່ໃນພາກພື້ນມີການແກ່ງແຍ້ງກັນເພີ່ມຂຶ້ນ, ສົ່ງຜົນກະທົບໂດຍກົງເຖິງອາຊຽນ.
ຕໍ່ໜ້າສະພາບການຕົວຈິງເຫຼ່ົານັ້ນ, ທ່ານພົນເອກ ໂງຊວນລິກ ຖືວ່າ, ອາຊຽນຕ້ອງເພີ່ມທະວີຄວາມສາມັກຄີ, ເສີມຂະຫຍາຍລັກສະນະກຸ້ມຕົນເອງ, ສ້າງຄວາມເຂັ້ມແຂງດ້ວຍຕົນເອງ ແລະຍົກສູງບົດບາດໃຈກາງ, ຊັກຈູງໃນບັນດາກົນໄກຮ່ວມມືຢູ່ພາກພື້ນ; ທ່ານ ພົນເອກ ໂງຊວນລິກ ເຊື່ອໝັ້ນວ່າດ້ວຍການຊັກຈູງຂອງປະເທດເຈົ້າພາບໄທ, ການຮ່ວມມືດ້ານປ້ອງກັນຊາດອາຊຽນ ຈະສືບຕໍ່ຍາດໄດ້ຜົນສຳເລັດຫຼາຍຢ່າງ, ປະກອບສ່ວນຢ່າງຕັ້ງໜ້າໃຫ້ສັນຕິພາບ, ສະຖຽນລະພາບ ແລະການພັດທະນາຢູ່ພາກພື້ນ.
ໃນວັນດຽວກັນ, ບັນດາຫົວໜ້າຄະນະໄດ້ລົງນາມໃນຖະແຫຼງການຮ່ວມຂອງ ADMM-13 ວ່າດ້ວຍ “ຄວາມໝັ້ນຄົງແບບຍືນຍົງ”. ຖະແຫຼງການຮ່ວມຢັ້ງຢືນຄືນໃໝ່ເລື່ອງເພີ່ມທະວີ, ປັບປຸງການຮ່ວມມືດ້ານປ້ອງກັນຊາດລະຫວ່າງບັນດາປະເທດສະມາຊິກອາຊຽນ ກໍ່ຄືບັນດາປະເທດເຂົ້າຮ່ວມ. ຖະແຫຼງການຮ່ວມຂອງ ADMM-13 ກໍ່ຢັ້ງຢືນຄືນໃໝ່ຄວາມສໍາຄັນຂອງການຮັກສາ ແລະຊຸກຍູ້ສັນຕິພາບ, ສະຖຽນລະພາບ, ຄວາມໝັ້ນຄົງ ແລະຄວາມປອດໄພ, ຄວາມເສລີໃນການເດີນທະເລ, ການບິນຢູ່ທະເລຕາເວັນອອກ, ກໍ່ຄືຄວາມຈຳເປັນຕ້ອງເພີ່ມທະວີຄວາມໄວ້ເນື້ອເຊື່ອໃຈເຊິ່ງກັນ ແລະກັນ. ພ້ອມກັນນັ້ນຖະແຫຼງການຮ່ວມກໍ່ໄດ້ເນັ້ນໜັກເຖິງຄວາມສຳຄັນຂອງການປະຕິບັດຖະແຫຼງການກົດແຫ່ງການປະພຶດຂອງບັນດາຝ່າຍຢູ່ທະເລຕາເວັນອອກ (ດີໂອຊີ), ກ້າວໄປເຖິງການບັນລຸໄດ້ກົດແຫ່ງການປະພຶດຂອງບັນດາຝ່າຍຢູ່ທະເລຕາເວັນອອກ (ຊີໂອຊີ)ໂດຍໄວ, ຄົບຖ້ວນ ແລະມີປະສິດທິຜົນ.
ຖະແຫຼງການຮ່ວມຂອງ ADMM-13 ຊົມເຊີຍເລື່ອງຫວຽດນາມ ຈະດໍາລົງຕໍາແໜ່ງປະທານອາຊຽນ ແລະຈັດຕັ້ງ ADMM ຄັ້ງທີ 14 ແລະ ADMM + ຄັ້ງທີ 7 ໃນປີ 2020.
ໂດຍ: ສົມເພັດ