ກຳປູເຈຍ ເລັ່ງປາບປາມອາດຊະຍາກຳຫຼອກລວງທາງອິນເຕີເນັດ

ທ່ານ ຮຸນ​ ມາ​ເນດ ນາ​ຍົກ​ລັດ​ຖະ​ມົນ​ຕີ ກຳ​ປູ​ເຈຍ. ພາບ: kpl.gov.la

ວິທະຍຸສາກົນ ແຫ່ງ ສປ ຈີນ, ເມື່ອບໍ່ດົນມານີ້, ​ພາກ​ສ່ວນ​ປະ​ຕິ​ບັດກົດ​ໝາຍຂອງອົງ​ການປົກ​ຄອງ​ນະ​ຄອນ​ຫລວງ ​ພະ​ນົມ​ເປັນ ຂອງ​ກຳ​ປູ​ເຈຍ ​ໄດ້​ມ້າງ​ສະ​ຖານ​ທີ່ ​ເພື່ອ​ຫຼອກ​ລວງ​ທາງ​ອິນ​ເຕີ​ເນັດ ແຫ່ງ​ໜຶ່ງ ແລະຈັບຕົວຜູ້​ຕ້ອງ​ຫາ ​ເພດ​ຊາຍ ຊາວ​ຕ່າງ​ປະ​ເທດ ​​ຕາມ​ກົດ​ໝາຍ ຫຼາຍ​ຄົນ. ພາກ​ສ່ວນ​ປະ​ຕິ​ບັດ​ກົດ​ໝາຍ​ ກ່າວ​ວ່າ: ຝ່າຍ​ທີ່​ກ່ຽວ​ຂ້ອງ ​ຈະ​ສືບ​ຕໍ່ປາບ​ປາມການ​ຫຼອກ​ລວງ​ທາງ​ອິນ​ເຕີ​ເນັດ ​ແລະ ​ການ​ກະ​ທຳຕ້ອງ​ໂທດ​ຂ້າມ​ຊາດ ​ອື່ນໆ ​ຢ່າງ​ເຂັ້ມ​ງວດ, ເພື່ອ​ປົກ​ປັກ​ຮັກ​ສາ​ຄວາມ​ເປັນ​ລະ​ບຽບຮຽບ​ຮ້ອຍ ແລະຄວາມ​ສະ​ຫງົບຂອງ​ສັງ​ຄົມ​ ຢ່າງ​ແທ້​ຈິງ. ກ່ອນໜ້ານີ້ ​ທ່ານ ຮຸນ​ ມາ​ເນດ, ນາ​ຍົກ​ລັດ​ຖະ​ມົນ​ຕີ ທັງ​ເປັນ​ປະ​ທານຄະ​ນະ​ກຳ​ມະ​ການ​​ປາບ​ປາມການ​ຫຼອກ​ລວງ​ທາງ​ອິນ​ເຕີ​ເນັດແຫ່ງ​ຊາດ ກຳ​ປູ​ເຈຍ ໄດ້​ຮຽກ​ໂຮມ​ເຈົ້າ​ແຂວງ, ຫົວ​ໜ້າ​ກົມ​ຕຳ​ຫຼວດ ແລະຜູ້​​ບັນ​ຊາ​ການທະ​ຫານ​ຂອງ​ແຂວງ​ຕ່າງໆ ເພື່ອ ຄົ້ນ​ຄວ້າ​ ແລະວາງແຜນ​ເຄື່ອນ​ໄຫວປາບ​ປາມ​ການ​ຫຼອກ​ລວງ​ທາງ​ອິນ​ເຕີ​ເນັດ​​ ຮ່ວມກັນ, ເຊິ່ງ ​ເປັນ​ສັນ​​ຍານ​ ທີ່​ສະ​ແດງໃຫ້​ເຫັນ​ເຖິງ​ການ​ປະ​ຕິ​ບັດກົດ​ໝາຍ ​ທີ່​ເຂັ້ມ​ແຂງ​. ພ້ອມທັງກ່າວ​ເຕືອນ​ວ່າ ເຈົ້າ​ໜ້າ​ທີ່​ ທີ່​ບໍ່​ປະ​ຕິ​ບັດ​ໜ້າ​ທີ່ ຈະ​ຖືກ​ປົດ​ຕຳ​ແໜ່ງ.

ແຫຼ່ງຄັດຈາກ: kpl.gov.la