ບັນດາປະເທດສະໜັບສະໜູນວິທີເຂົ້າເຖິງຢ່າງສົມດຸນ ແລະພາວະວິໄສຂອງອາຊຽນ
ກປ.ອອນໄລ - ວັນທີ 27 ກໍລະກົດ, ຢູ່ນະຄອນຫຼວງວຽງຈັນ, ບັນດາລັດຖະມົນຕີການຕ່າງປະເທດອາຊຽນ ແລະບັນດາປະເທດຄູ່ຮ່ວມມືໄດ້ເຂົ້າຮ່ວມການເຄື່ອນໄຫວສຸດທ້າຍໃນຂອບເຂດກອງປະຊຸມລັດຖະມົນຕີການຕ່າງປະເທດອາຊຽນ ຄັ້ງທີ 57 (AMM 57) ແລະບັນດາກອງປະຊຸມທີ່ກ່ຽວຂ້ອງ, ລວມທັງກອງປະຊຸມລັດຖະມົນຕີການຕ່າງປະເທດອາຊຽນ - ອາເມລິກາ, ອາຊຽນ+3, ບັນດາປະເທດເຂົ້າຮ່ວມກອງປະຊຸມສຸດຍອດອາຊີຕາເວັນອອກ (EAS) ແລະເວທີປາໄສພາກພື້ນອາຊຽນ (ARF).
ໂດຍໄດ້ຮັບການມອບສິດຈາກທ່ານລັດຖະມົນຕີການຕ່າງປະເທດ ບຸ່ຍແທງເຊີນ, ທ່ານ ໂດ້ຮຸ່ງຫວຽດ ຮອງລັດຖະມົນຕີ, ຫົວໜ້າ SOM ອາຊຽນ ຂອງຫວຽດນາມ ໄດ້ນຳໜ້າຄະນະຜູ້ແທນຫວຽດນາມ ເຂົ້າຮ່ວມກອງປະຊຸມ.
ທີ່ກອງປະຊຸມເຫຼົ່ານັ້ນ, ບັນດາປະເທດໄດ້ສະຫຼະເວລາສ່ວນຫຼາຍເພື່ອແລກປ່ຽນ, ແບ່ງປັນທັດສະນະ ແລະຫຼັກໝັ້ນກ່ຽວກັບບັນດາບັນຫາສາກົນ ແລະພາກພື້ນທີ່ຕ່າງຝ່າຍຕ່າງມີຄວາມສົນໃຈ, ໃນນັ້ນມີບັນຫາທະເລຕາເວັນອອກ. ບັນດາປະເທດໄດ້ແບ່ງປັນຄວາມວິຕົກກັງວົນຕໍ່ການຜັນແປຢ່າງສັບສົນບົນພູມສາດຕົວຈິງ ແລະຜົນສະທ້ອນເຖິງສັນຕິພາບ, ຄວາມໝັ້ນຄົງ, ສະຖຽນລະພາບ ແລະການພັດທະນາ, ສະແດງໃຫ້ເຫັນການສະໜັບສະໜູນຕໍ່ການເຂົ້າເຖິງຢ່າງສົມດຸນ ແລະພາວະວິໄສຂອງອາຊຽນ, ເນັ້ນໜັກເຖິງບັນດາຫຼັກການ, ຄື: ເຄົາລົບກົດໝາຍສາກົນ, ລະງັບໃຈ, ແກ້ໄຂການພິພາດໂດຍສັນຕິວິທີຕາມກົດໝາຍສາກົນ, ໃນນັ້ນມີສົນທິສັນຍາຂອງສະຫະປະຊາຊາດກ່ຽວກັບກົດໝາຍວ່າດ້ວຍທະເລ ປີ 1982 (UNCLOS 1982).
    |
 |
|
ບັນດາຜູ້ແທນເຂົ້າຮ່ວມກອງປະຊຸມລັດຖະມົນຕີການຕ່າງປະເທດອາຊຽນ+3 ຄັ້ງທີ 25. ພາບ: ກະຊວງການຕ່າງປະເທດຫວຽດນາມ. |
ກ່າວຄຳເຫັນທີ່ບັນດາກອງປະຊຸມ, ທ່ານຮອງລັດຖະມົນຕີ ໂດ້ຮຸ່ງຫວຽດ ຢືນຢັນຫຼັກໝັ້ນສະເໝີຕົ້ນສະເໝີປາຍຂອງຫວຽດນາມ, ສະເໜີບັນດາຄູ່ຮ່ວມມືສະໜັບສະໜູນ ແລະເຄົາລົບນັບຖືຫຼັກໝັ້ນຂອງ ອາຊຽນ ກ່ຽວກັບບັນຫາທະເລຕາເວັນອອກ, ພິເສດແມ່ນຕໍ່ການຜັນແປຢ່າງສັບສົນໃນປະຈຸບັນ, ກໍ່ຄືບັນດາຄວາມມານະພະຍາຍາມຂອງອາຊຽນ ໃນການກໍ່ສ້າງທະເລຕາເວັນອອກ ໃຫ້ເປັນທະເລສັນຕິພາບ, ສະຖຽນລະພາບ, ຮ່ວມມື ແລະພັດທະນາແບບຍືນຍົງ. ທ່ານຮອງລັດຖະມົນຕີ ກໍ່ເນັ້ນໜັກເຖິງຄວາມຈຳເປັນຕ້ອງສ້າງເງື່ອນໄຂສະດວກໃຫ້ແກ່ການເຈລະຈາກ່ຽວກັບກົດແຫ່ງການປະພຶດໃນທະເລຕາເວັນອອກ (COC) ຢ່າງມີປະສິດທິຜົນ, ສອດຄ່ອງກັບກົດໝາຍສາກົນ, ພິເສດແມ່ນ UNCLOS 1982, ພ້ອມທັງ, ສືບຕໍ່ປະຕິບັດຖະແຫຼງການກ່ຽວກັບການປະພຶດຂອງບັນດາຝ່າຍຢູ່ທະເລຕາເວັນອອກ (DOC) ຢ່າງຄົບຖ້ວນ ແລະມີປະສິດທິຜົນ.
ສິ້ນສຸດກອງປະຊຸມເຫຼົ່ານັ້ນ, ບັນດາລັດຖະມົນຕີການຕ່າງປະເທດອາຊຽນ ໄດ້ຮັບຮອງເອົາຖະແຫຼງການຮ່ວມຂອງກອງປະຊຸມລັດຖະມົນຕີການຕ່າງປະເທດອາຊຽນ ຄັ້ງທີ 57. ປະທານລາວ ໄດ້ອອກຖະແຫຼງການປະທານຂອງບັນດາກອງປະຊຸມລັດຖະມົນຕີການຕ່າງປະເທດ ອາສຽນ+1, ອາຊຽນ+3, EAS ແລະ ARF .
* ໃນວັນດຽວກັນ, ໃນຂອບເຂດກອງປະຊຸມລັດຖະມົນຕີການຕ່າງປະເທດອາຊຽນ ແລະບັນດາກອງປະຊຸມທີ່ກ່ຽວຂ້ອງຢູ່ນະຄອນຫຼວງວຽງຈັນ, ໄດ້ດຳເນີນກອງປະຊຸມລັດຖະມົນຕີການຕ່າງປະເທດ ການພົວພັນຄູ່ຮ່ວມມື ແມ່ນ້ຳຂອງ - ອາເມລິກາ (MUSP) ຄັ້ງທີ 3. ທ່ານຮອງລັດຖະມົນຕີການຕ່າງປະເທດ ໂດ້ຮຸ່ງຫວຽດ ຕາງໜ້າໃຫ້ທ່ານລັດຖະມົນຕີການຕ່າງປະເທດ ບຸ່ຍແທງເຊີນ ນຳໜ້າຄະນະຜູ້ແທນຫວຽດນາມ ເຂົ້າຮ່ວມກອງປະຊຸມ.
ໂດຍ: ຈາງຫງວຽນ