ລາວ ຂະຫຍາຍເວລາໃຊ້ມາດຕະການປ້ອງກັນ, ສະກັດກັ້ນພະຍາດໂຄວິດ-19 ໄປຈົນໝົດເດືອນ 8
ກປ.ອອນໄລ - ລັດຖະບານ ລາວ ຕົກລົງສືບຕໍ່ປະຕິບັດບັນດາມາດຕະການຜ່ອນຜັນ, ມາດຕະການໃນການປ້ອງກັນ, ຄວບຄຸມ, ສະກັດກັ້ນ ແລະແກ້ໄຂການລະບາດຂອງພະຍາດ COVID-19 ແຕ່ວັນທີ 01 ຫາ 31 ສິງຫາ 2020.
ແຈ້ງການດັ່ງກ່າວ ເຊິ່ງທ່ານ ຮສ.ດຣ. ບຸນກອງ ສີຫາວົງ, ລັດຖະມົນຕີກະຊວງສາທາລະນະສຸກລາວ, ຮອງຫົວໜ້າຄະນະສະເພາະກິດ ຄວບຄຸມພະຍາດໂຄວິດ19 ຂັ້ນສູນກາງ ໄດ້ຖະແຫຼງຂ່າວຕໍ່ສື່ມວນຊົນເມື່ອວັນທີ 30 ກໍລະກົດ 2020 ຜ່ານມາ.
ໃນໄລຍະຜ່ານມາ, ສປປ ລາວ ສາມາດສືບຕໍ່ຄວບຄຸມການແຜ່ລະບາດໄວ້ໄດ້ ໂດຍບໍ່ພົບຜູ້ຕິດເຊື້ອໃນຊຸມຊົນເປັນເວລາ 03 ເດືອນກວ່າເຮັດໃຫ້ສັງຄົມ, ພາກທຸລະກິດ, ຜູ້ປະກອບການ, ໂຄງການ ແລະໂຮງງານຕ່າງໆໄດ້ກັບມາໃຊ້ຊີວິດ ແລະເຄື່ອນໄຫວທຸລະກິດພາຍໃຕ້ເງື່ອນໄຂໃໝ່ເກືອບວ່າປົກກະຕິເປັນສ່ວນໃຫຍ່ມາໄດ້ໄລຍະໜຶ່ງ.
|
|
ທ່ານຮສ.ດຣ. ບຸນກອງ ສີຫາວົງ, ລັດຖະມົນຕີກະຊວງສາທາລະນະສຸກລາວ ຖະແຫຼງຂ່າວຕໍ່ສື່ມວນຊົນເມື່ອວັນທີ 30 ກໍລະກົດ 2020. ພາບ: Vientiane Times. |
ຕາມທ່ານຮສ.ດຣ. ບຸນກອງ ສີຫາວົງ ແລ້ວ, ເຖິງຢ່າງໃດກໍຕາມ, ພວກເຮົາ ບໍ່ໄດ້ເຜີຕົວ ແລະປະໝາດຢ່າງເດັດຂາດ ເນື່ອງຈາກວ່າໃນຕໍ່ໜ້າຍັງມີຄວາມສ່ຽງ ແລະສິ່ງທ້າທາຍທີ່ຈະເກີດມີການລະບາດອີກຮອບໃໝ່ຍ້ອນສະພາບການລະບາດຢູ່ໃນພາກພື້ນ ແລະໃນໂລກ ຍັງສືບຕໍ່ເພີ່ມຂຶ້ນ ແລະຍັງບໍ່ສາມາດຢັບຢັ້ງການລະບາດຂອງພະຍາດດັ່ງກ່າວໄດ້ເທື່ອ. ພ້ອມກັນນັ້ນຖ້າພວກເຮົາບໍ່ຄຸ້ມຄອງການເດີນທາງເຂົ້າ-ອອກປະເທດ ຢ່າງຮັດກຸມກໍຈະມີຄວາມສ່ຽງໃນການນຳເຂົ້າເຊື້ອໂດຍຜູ້ທີ່ເດີນທາງມາຈາກຕ່າງປະເທດ ຄືດັ່ງທີ່ມີກໍລະນີເຂົ້າມາໃນກາງເດືອນກໍລະກົດຕາມທີ່ໄດ້ແຈ້ງໃຫ້ພີ່ນ້ອງຊາວລາວ ຊາບແລ້ວນັ້ນ. ສະນັ້ນ,ຈຶ່ງມີຄວາມຈໍາເປັນຕ້ອງໄດ້ສືບຕໍ່ເຂັ້ມງວດປະຕິບັດມາດຕະການປ້ອງກັນ, ຄວບຄຸມ ແລະສະກັດກັ້ນການລະບາດຂອງພະຍາດ COVID-19...
ໂອກາດນີ້, ທ່ານລັດຖະມົນຕີກະຊວງສາທາລະນະສຸກ ລາວ ໄດ້ຮຽກຮ້ອງໃຫ້ພົນລະເມືອງລາວ ທຸກຄົນ ພ້ອມດ້ວຍຊາວຕ່າງດ້າວ, ຜູ້ບໍ່ມີສັນຊາດ, ຊາວຕ່າງປະເທດ ທີ່ດຳລົງຊີວິດ ແລະທຳມາຫາກິນຢູ່ ສປປ ລາວ ທຸກຖ້ວນໜ້າ ຈົ່ງເຊີດຊູນ້ຳໃຈເປັນເຈົ້າຂອງປະເທດຊາດ, ສາມັກຄີເປັນຈິດໜຶ່ງໃຈດຽວກັນສືບຕໍ່ຕັ້ງໜ້າເຂົ້າຮ່ວມປະຕິບັດບັນດາມາດຕະການ, ນິຕິກຳທີ່ວາງອອກ ເພື່ອເຮັດໃຫ້ການປ້ອງກັນ, ຄວບຄຸມ ແລະແກ້ໄຂການລະບາດຂອງພະຍາດໂຄວິດ-19 ໃນປະເທດ ລາວ ໃຫ້ໄດ້ຮັບຜົນດີ.
ໂດຍ: ອາລຸນວັນໃໝ່