ການແຂ່ງຂັນຖາມຕອບເປັນພາສາຫວຽດນາມ ສໍາລັບຄູອາຈານລາວ
ກປ.ອອນໄລ - ເນື່ອງໃນໂອກາດສະເຫຼີມສະຫຼອງ 115 ປີແຫ່ງວັນແມ່ຍິງສາກົນ (ວັນທີ 8 ມີນາ), ຕອນບ່າຍວັນທີ 7 ມີນາ, ໂຮງຮຽນສອງພາສາລາວ-ຫວຽດນາມ ຫງວຽນຢູ ທີ່ນະຄອນຫຼວງວຽງຈັນ ໄດ້ຈັດຕັ້ງການແຂ່ງຂັນຖາມ-ຕອບ ເປັນພາສາຫວຽດນາມ ສໍາລັບຄູອາຈານລາວ. ນີ້ແມ່ນຄັ້ງທຳອິດທີ່ໂຮງຮຽນຈັດຕັ້ງເຫດການດັ່ງກ່າວ ແລະການແຂ່ງຂັນໄດ້ດຶງດູດຄູອາຈານ ແລະນັກຮຽນເຂົ້າຮ່ວມເປັນຈຳນວນຫຼວງຫຼາຍ.
ກ່າວຄຳເຫັນທີ່ພິທີ, ທ່ານນາງ ຫງວຽນທິແທັງເຮືອງ, ຜູ້ອຳນວຍການໂຮງຮຽນສອງພາສາ ລາວ-ຫວຽດນາມ ຫງວຽນຢູ ໃຫ້ຮູ້ວ່າ: ການແຂ່ງຂັນ ແມ່ນກິດຈະກຳເຄື່ອນໄຫວນອກຫຼັກສູດທີ່ມີຄວາມໝາຍ, ທັງສ້າງໂອກາດເພື່ອໃຫ້ຄູອາຈານ ສະແດງຄວາມສາມາດທັກທາຍເປັນພາສາຫວຽດນາມ, ທັງແມ່ນໂອກາດເພື່ອພົບປະແລກປ່ຽນ, ແບ່ງປັນຄວາມຮູ້ອາລົມຈິດທີ່ມີຕໍ່ວັດທະນະທຳ ແລະຊາວຫວຽດນາມ.
    |
 |
|
ການນໍາໂຮງຮຽນສອງພາສາລາວ-ຫວຽດນາມ ຫງວຽນຢູ ແລະຜູ້ແທນ ຖ່າຍຮູບເປັນທີ່ລະນຶກ ພ້ອມກັບບັນດາທີມເຂົ້າຮ່ວມການແຂ່ງຂັນເປັນພາສາຫວຽດນາມ. ພາບ: ສໍານັກຂ່າວສານຫວຽດນາມ |
ການແຂ່ງຂັນມີ 3 ທີມເຂົ້າຮ່ວມ, ແຕ່ລະທີມປະກອບມີ 3 ຄົນ. ບັນດາທີມເຂົ້າຮ່ວມຕ້ອງຜ່ານການແຂ່ງຂັນ, ຄື: ແນະນຳທີມ ແລະຕົນເອງເປັນພາສາຫວຽດນາມ, ການປະລະໄນ ແລະຖາມ-ຕອບເປັນພາສາຫວຽດນາມ. ບັນດາຄຳຖາມມີຫຼາຍຫົວຂໍ້, ຄື: ປະຫວັດສາດ, ພູມສາດ, ວັດທະນະທຳ, ສາຍພົວພັນແບບພິເສດລະຫວ່າງສອງປະເທດ ຫວຽດນາມ-ລາວ. ບັນດາຄູອາຈານ ໄດ້ປຶກສາຫາລືຢ່າງໄວວາ ແລະມີຄໍາຕອບຢ່າງຖືກຕ້ອງເພື່ອຍາດຄະແນນສູງ.
ສິ້ນສຸດການແຂ່ງຂັນ, ຄະນະອໍານວຍການໂຮງຮຽນ ໄດ້ມອບລາງວັນທີໜຶ່ງ, ທີສອງ ແລະ ທີສາມ ໃຫ້ບັນດາທີມດີເດັ່ນ.
ໃນບັນຍາກາດອັນອົບອຸ່ນຂອງພິທີ, ຄູອາຈານ ແລະນັກຮຽນຊາຍໄດ້ມອບຊໍ່ດອກໄມ້ທີ່ສົດໃສ ເພື່ອສະແດງຄວາມຮູ້ບຸນຄຸນອັນເລິກເຊິ່ງຕໍ່ບັນດາເອື້ອຍຄູ, ສະແດງໃຫ້ເຫັນຄວາມເຄົາລົບນັບຖືຕໍ່ການປະກອບສ່ວນອັນໃຫຍ່ຫຼວງຂອງແມ່ຍິງໃນທຸກຂົງເຂດ.
ໂດຍ: ທູຈາງ