ຕະຫຼາດການເງິນຫວຽດນາມ ດຶງດູດຄວາມສົນໃຈຈາກບັນດານັກລົງທຶນ ສ.ເກົາຫຼີ
ກປ.ອອນໄລ - ວັນທີ 7 ມີນາ, ຢູ່ນະຄອນຫຼວງເຊອູນ, ປະເທດສ.ເກົາຫຼີ, ກະຊວງການເງິນຫວຽດນາມ, ຄະນະກຳມະການຫຼັກຊັບແຫ່ງລັດ ໄດ້ຈັດຕັ້ງກອງປະຊຸມສົ່ງເສີມການລົງທຶນດ້ານການເງິນຢູ່ ສ.ເກົາຫຼີ ດ້ວຍຫົວຂໍ້ “ຫວຽດນາມ - ສະຖານທີ່ລົງທຶນ”.
ກອງປະຊຸມໄດ້ດຶງດູດກວ່າ 300 ວິສາຫະກິດ ສ.ເກົາຫຼີ ແລະຫວຽດນາມ, ບັນດາສະຖາບັນການເງິນ, ທະນາຄານຂະໜາດໃຫຍ່, ກອງທຶນລົງທຶນ, ບໍລິສັດຫຼັກຊັບຂອງສອງປະເທດເຂົ້າຮ່ວມ.
|
|
ທ່ານ ໂຮ່ດຶກເຝີກ ລັດຖະມົນຕີກະຊວງການເງິນຫວຽດນາມ ກ່າວຄຳເຫັນທີ່ກອງປະຊຸມ. ພາບ: ສໍານັກຂ່າວສານຫວຽດນາມ |
ກ່າວຄຳເຫັນທີ່ກອງປະຊຸມ, ທ່ານ ໂຮ່ດຶກເຝີກ ລັດຖະມົນຕີກະຊວງການເງິນຫວຽດນາມ ຖືວ່າ ການເຂົ້າຮ່ວມຂອງວິສາຫະກິດ ແລະນັກລົງທຶນເປັນຈຳນວນຫຼວງຫຼາຍ ແມ່ນໜຶ່ງໃນບັນດາຄວາມມານະພະຍາຍາມຂອງລັດຖະບານຫວຽດນາມ ໃນການສ້າງສະພາບແວດລ້ອມແຫ່ງການລົງທຶນ, ດໍາເນີນທຸລະກິດສະດວກ, ຈັບອົກຈັບໃຈໃຫ້ບັນດາວິສາຫະກິດ ແລະນັກລົງທຶນຕ່າງປະເທດ, ພິເສດແມ່ນບັນດານັກລົງທຶນທີ່ມາຈາກ ສ.ເກົາຫຼີ. ທ່ານລັດຖະມົນຕີ ໂຮ່ດຶກເຝີກ ສະແດງຄວາມເຊື່ອໝັ້ນວ່າ ກອງປະຊຸມສົ່ງເສີມການລົງທຶນດ້ານການເງິນຄັ້ງນີ້ ຈະເປີດກາລະໂອກາດຮ່ວມມື ແລະການພັດທະນາວັດທະນາຖາວອນລະຫວ່າງສອງປະເທດເວົ້າລວມ ແລະບັນດາວິສາຫະກິດ, ນັກລົງທຶນສອງປະເທດເວົ້າສະເພາະ, ພິເສດແມ່ນໃນຂົງເຂດຕະຫຼາດການເງິນ.
|
|
ພິທີລົງນາມບົດບັນທຶກຊ່ວຍຈຳ (MOU) ລະຫວ່າງຄະນະກຳມະການຫຼັກຊັບຫວຽດນາມ ແລະສະມາຄົມລົງທຶນດ້ານການເງິນ ສ.ເກົາຫຼີ. ພາບ: ສໍານັກຂ່າວສານຫວຽດນາມ |
ຝ່າຍສ.ເກົາຫຼີ, ທ່ານ Kim Yong Jae, ກໍາມະການຜູ້ປະຈໍາການຄະນະກຳມະການບໍລິການການເງິນສ.ເກົາຫຼີ (FSC), ເນັ້ນໜັກວ່າ ຫວຽດນາມ ພວມບັນລຸຜົນງານດ້ານເສດຖະກິດໃນໄລຍະຍາວ. ມີຫຼາຍກຸ່ມບໍລິສັດໃຫຍ່, ວິສາຫະກິດ ສ.ເກົາຫຼີ, ຄື: Samsung, LG, Hyundai ເຫັນໄດ້ຄວາມສາມາດບົ່ມຊ້ອນເຕີບໂຕຂອງຫວຽດນາມ ແລະໄດ້ຮັບຜົນສໍາເລັດພາຍຫຼັງລົງທຶນເຂົ້າຕະຫຼາດຫວຽດນາມ ໃນໄລຍະຕົ້ນ. ບໍລິສັດ, ອົງການການເງິນຂອງສ.ເກົາຫຼີ ພວມລົງທຶນຢູ່ຫວຽດນາມ ດ້ວຍຫຼາຍຮູບການ, ຄື: ການສ້າງຕັ້ງນິຕິບຸກຄົນ, ຊື້ຂາຍໂຮມເຂົ້າ...
ໂດຍ: ເຈິ່ນຮວ່ຽນ