ຫວຽດນາມ ແລະ Grenoble (ຝຣັ່ງ) ຈັດກິດຈະການເຄື່ອນໄຫວຫຼາຍຢ່າງເພື່ອເພີ່ມທະວີນໍ້າໃຈມິດຕະພາບ ແລະການຮ່ວມມື
ກປ.ອອນໄລ - ໃນຂອບເຂດການເຄື່ອນໄຫວສົ່ງເສີມການຮ່ວມມື ແລະເພີ່ມທະວີນໍ້າໃຈມິດຕະພາບກັບບັນດາທ້ອງຖິ່ນຂອງປະເທດນີ້, ທ່ານ ດິງຕວ່ານຖັງ ເອກອັກຄະລັດຖະທູດຫວຽດນາມ ປະຈໍາ ຝຣັ່ງ ໄດ້ໄປຢ້ຽມຢາມ ແລະເຮັດວຽກຢູ່ນະຄອນ Grenoble, ປະເທດຝຣັ່ງ ແຕ່ວັນທີ 17 ຫາວັນທີ 20 ກຸມພາ.
|
|
ທ່ານ Eric Piolle ເຈົ້າຄອງນະຄອນ Grenoble ຕ້ອນຮັບທ່ານ ດິງຕວ່ານຖັງ ເອກອັກຄະລັດຖະທູດຫວຽດນາມ ປະຈໍາ ຝຣັ່ງ. ພາບ: ສໍານັກຂ່າວສານຫວຽດນາມ |
ທີ່ການພົບປະກັບທ່ານ Eric Piolle ເຈົ້າຄອງນະຄອນ Grenoble, ທ່ານເອກອັກຄະລັດຖະທູດ ດິງຕວ່ານຖັງ ຕີລາຄາສູງຕໍ່ອາລົມຈິດ ແລະການຊ່ວຍເຫຼືອຢ່າງຈິງໃຈຂອງອຳນາດການປົກຄອງທ້ອງຖິ່ນໃນຫຼາຍປີມານີ້ ສໍາລັບປະຊາຄົມຊາວຫວຽດນາມ ແລະນັກຮຽນຫວຽດນາມ ຢູ່ທີ່ນີ້.
ທ່ານເອກອັກຄະລັດຖະທູດ ດິງຕວ່ານຖັງ ເນັ້ນໜັກວ່າ Grenoble ແມ່ນໜຶ່ງໃນບັນດາທ້ອງຖິ່ນຂອງ ຝຣັ່ງ ທີ່ມີການຮ່ວມມືຫຼາຍຢ່າງກັບຫວຽດນາມ, ພິເສດແມ່ນໃນຂົງເຂດບຳລຸງສ້າງຂັ້ນມະຫາວິທະຍາໄລ, ຄົ້ນຄວ້າວິທະຍາສາດເຕັກນິກ ແລະເຕັກໂນໂລຢີສູງ. ພ້ອມທັງຢັ້ງຢືນການຖືເປັນສໍາຄັນ ແລະປາດຖະໜາຢາກສືບຕໍ່ຊຸກຍູ້ການຮ່ວມມືກັບ Grenoble ໃນຂົງເຂດທີ່ກ່າວມາຂ້າງເທິງ, ເຊິ່ງແມ່ນທ່າແຮງຂອງນະຄອນ, ກໍ່ຄືໃນບັນດາຂົງເຂດອື່ນ, ຕອບສະໜອງຄວາມຮຽກຮ້ອງຕ້ອງການ ແລະຮັບໃຊ້ການພັດທະນາຂອງສອງປະເທດຫວຽດນາມ ແລະຝຣັ່ງ ໃນຕໍ່ໜ້າ.
|
|
ທ່ານ Eric Piolle ເຈົ້າຄອງນະຄອນ Grenoble ກັບທ່ານ ດິງຕວ່ານຖັງ ເອກອັກຄະລັດຖະທູດຫວຽດນາມ ປະຈໍາ ຝຣັ່ງ ແລະຄະນະປະຕິບັດງານ. ພາບ: ສໍານັກຂ່າວສານຫວຽດນາມ |
ສ່ວນທ່ານເຈົ້າຄອງນະຄອນ Grenoble ກໍ່ໄດ້ສະແດງຄວາມພາກພູມໃຈຕໍ່ທ່າແຮງໃນການບຳລຸງສ້າງວິທະຍາສາດເຕັກໂນໂລຢີຂອງນະຄອນ, ເຊິ່ງເປັນບ່ອນທີ່ຮັບນັກຮຽນຕ່າງປະເທດມາຮຽນໃນແຕ່ລະປີເກືອບ 10.000 ຄົນ. ໃນນັ້ນມີນັກຄົ້ນຄວ້າຫວຽດນາມ ຫຼາຍສິບຄົນ ແລະຄົນທີ່ເຮັດວຽກຢູ່ສະຖາບັນຄົ້ນຄວ້າ, ປະກອບສ່ວນສ້າງສາຍພົວພັນນະຄອນກັບຫວຽດນາມ ຢ່າງແໜ້ນແຟ້ນ, ບໍ່ພຽງແຕ່ໃນຂົງເຂດວິທະຍາສາດເທົ່ານັ້ນ ຫາກຍັງມີທັງນໍ້າໃຈມິດຕະພາບລະຫວ່າງປະຊາຊົນສອງປະເທດອີກດ້ວຍ. ພ້ອມທັງສະແດງຄວາມກຽມ ພ້ອມຮ່ວມມືໃນຂົງເຂດທີ່ຫວຽດນາມ ມີຄວາມສົນໃຈ ແລະ Grenoble ທີ່ມີທ່າແຮງ. ທ່ານເຈົ້າຄອງນະຄອນ Grenoble ຖືວ່າ ນອກຈາກການພົວພັນທີ່ໝັ້ນແກ່ນ ແລະມີມາແຕ່ດົນນານໃນຂົງເຂດບຳລຸງສ້າງຂັ້ນມະຫາວິທະຍາໄລ, ຄົ້ນຄວ້າວິທະຍາສາດ ແລະເຕັກໂນໂລຢີແລ້ວ, ສອງຝ່າຍຄວນມີບາດກ້າວໃໝ່ໃນການຮ່ວມມືດ້ານເສດຖະກິດ, ການຄ້າ. ນອກຈາກນັ້ນ, ການແລກປ່ຽນວັດທະນະທຳກໍ່ຄວນໄດ້ເອົາໃຈໃສ່ເປັນພິເສດເພາະວ່າສິ່ງດັ່ງກ່າວນີ້ເປັນການຮັດແໜ້ນນ້ຳໃຈຂອງປະຊາຊົນສອງປະເທດ...
ໂດຍ: ເຈິ່ນຮວ່ຽນ