ຮອງນາຍົກລັດຖະມົນຕີຫວຽດນາມ ຕ້ອນຮັບລັດຖະມົນຕີພັດທະນາເສດຖະກິດ ແລະເຕັກໂນໂລຢີສະໂລເວນີ
ກປ.ອອນໄລ - ຕອນບ່າຍວັນທີ 8 ພະຈິກ, ຢູ່ສໍານັກງານນາຍົກລັດຖະມົນຕີ, ທ່ານ ຟ້າມບິ່ງມິງ ຮອງນາຍົກລັດຖະມົນຕີຫວຽດນາມ ໄດ້ໃຫ້ການຕ້ອນຮັບທ່ານ Zdravko Pocivalsek ລັດຖະມົນຕີກະຊວງພັດທະນາເສດຖະກິດ ແລະເຕັກໂນໂລຢີສະໂລເວນີ ທີ່ພວມຢູ່ຢ້ຽມຢາມຫວຽດນາມ.
ທີ່ການຕ້ອນຮັບ, ທ່ານ ຟ້າມບິ່ງມິງ ຢັ້ງຢືນວ່າ, ຫວຽດນາມ ຖືເປັນສໍາຄັນ, ປາດຖະໜາຢາກຊຸກຍູ້ການພົວພັນກັບບັນດາຄູ່ຮ່ວມມືທີ່ເປັນມູນເຊື້ອ, ໃນນັ້ນມີ ສະໂລເວນີ, ພິເສດແມ່ນໃນຂົງເຂດການຄ້າ ແລະການລົງທຶນ, ພ້ອມທັງສະເໜີສະໂລເວນີ ຊຸກຍູ້ສະຫະພາບເອີລົບ ແລະບັນດາປະເທດສະມາຊິກໃຫ້ສັດຕະຍາບັນສັນຍາການຄ້າເສລີ (EVFTA), ສັນຍາປົກປ້ອງການລົງທຶນ (EVIPA) ໂດຍໄວແນໃສ່ນໍາມາເຊິ່ງຜົນປະໂຫຍດຢ່າງແທດຈິງໃຫ້ບັນດາຝ່າຍທີ່ລົງນາມ, ປະກອບສ່ວນເພີ່ມທະວີການແລກປ່ຽນການຄ້າສອງຝ່າຍ.
|
|
ທ່ານ ຟ້າມບິ່ງມິງ ຮອງນາຍົກລັດຖະມົນຕີຫວຽດນາມ ຕ້ອນຮັບທ່ານ Zdravko Pocivalsek ລັດຖະມົນຕີກະຊວງພັດທະນາເສດຖະກິດ ແລະເຕັກໂນໂລຢີສະໂລເວນີ. ພາບ: ສໍານັກຂ່າວສານຫວຽດນາມ. |
ທ່ານ Zdravko Pocivalsek ຄີລາຄາສູງບົດບາດ, ຄວາມສາມາດບົ່ມຊ້ອນຂອງຫວຽດນາມ ໃນພາກພື້ນ, ເນັ້ນໜັກເຖິງຄວາມສໍາຄັນ ແລະສະໜັບສະໜູນເລື່ອງໃຫ້ສັດຕະຍາບັນບັນດາສັນຍາການຄ້າເສລີ (EVFTA), ສັນຍາປົກປ້ອງການລົງທຶນ (EVIPA) ລະຫວ່າງຫວຽດນາມ-ສະຫະພາບເອີລົບ ໂດຍໄວ.
ເນື່ອງໃນໂອກາດນີ້, ສອງຝ່າຍເຫັນດີເປັນເອກະພາບເພີ່ມທະວີການແລກປ່ຽນຄະນະຜູ້ແທນຂັ້ນສູງ ແລະທຸກຂັ້ນ, ສ້າງເງື່ອນໄຂເພື່ອໃຫ້ບັນດາວິສາຫະກິດສອງຝ່າຍເພີ່ມທະວີການຮ່ວມມືລົງທຶນໃນບັນດາຂົງເຂດສອງຝ່າຍມີທ່າແຮງ ແລະມີຄວາມຕ້ອງການ, ການຮ່ວມມືຢ່າງແໜ້ນແຟ້ນ, ສະໜັບສະໜູນເຊິ່ງກັນ ແລະກັນຢູ່ບັນດາເວທີປາໄສຫຼາຍຝ່າຍ.
ໂດຍ: ເຈິ່ນຮວ່ຽນ