ປັບປຸງລະບອບລະບຽບການໄດ້ຮັບຖືວ່າແມ່ນ “ບຸກທະລຸຂອງບຸກທະລຸ”
ນັກຂ່າວ: ຂໍຮຽນທ່ານລັດຖະມົນຕີ, ໃນເອກະສານກອງປະຊຸມໃຫຍ່ ຄັ້ງທີ XIV ຂອງພັກ, ອັນໃດແມ່ນທິດທາງຫຼັກກ່ຽວກັບແນວທາງປ່ຽນແປງໃໝ່ເສດຖະກິດຂອງພັກ ເພື່ອນຳປະເທດກ້າວເຂົ້າສູ່ສັງກາດໃໝ່, ສັງກາດບືນຕົວຂຶ້ນຂອງປະເທດ?
ທ່ານ ຫງວຽນຈີຢຸງ ລັດຖະມົນຕີກະຊວງແຜນການ ແລະການລົງທຶນຫວຽດນາມ: ບົດລາຍງານຕີລາຄາ 5 ປີແຫ່ງການປະຕິບັດຍຸດທະສາດພັດທະນາເສດຖະກິດ-ສັງຄົມ ໄລຍະ 10 ປີ 2021-2030, ທິດທາງ, ໜ້າທີ່ພັດທະນາເສດຖະກິດ-ສັງຄົມ ໄລຍະ 5 ປີ 2026-2030 ແມ່ນເອກະສານສໍາຄັນຂອງກອງປະຊຸມໃຫຍ່ ຄັ້ງທີ XIV ຂອງພັກ, ປະຈຸບັນແມ່ນໃນໄລຍະປັບປຸງ ແລະຂໍຄຳເຫັນຈາກກອງປະຊຸມໃຫຍ່ຂອງພັກທຸກຂັ້ນ. ບົດລາຍງານນີ້ມີຫຼາຍເນື້ອໃນໃໝ່, ບຸກທະລຸກ່ຽວກັບການພັດທະນາເສດຖະກິດເພື່ອນຳປະເທດກ້າວເຂົ້າສູ່ສັງກາດໃໝ່-ສັງກາດບືນຕົວຂຶ້ນພັດທະນາປະເທດໃຫ້ຮັ່ງມີເຂັ້ມແຂງ, ວັດທະນາຖາວອນ.
ນັ້ນແມ່ນທິດທາງພັດທະນາໄວ ແລະຍືນຍົງຂອງປະເທດອີງໃສ່ວິທະຍາສາດ, ເຕັກໂນໂລຢີ, ການປ່ຽນແປງໃໝ່ປະດິດສ້າງ, ການຫັນປ່ຽນດີຈີຕອນ ແລະຫັນປ່ຽນສີຂຽວ. ສ້າງພື້ນຖານເສດຖະກິດເອກະລາດ, ເປັນເຈົ້າຕົນເອງບົນພື້ນຖານເປັນເຈົ້າເຕັກໂນໂລຢີ ແລະເປັນເຈົ້າການ, ຕັ້ງໜ້າເຊື່ອມໂຍງເຂົ້າກັບສາກົນ, ຍົກສູງຄວາມສາມາດຮັບມືຢ່າງມີປະສິດທິຜົນຂອງພື້ນຖານເສດຖະກິດຕໍ່ໜ້າຜົນກະທົບໃຫຍ່, ຜິດປົກກະຕິຈາກພາຍນອກ.
    |
 |
|
ທ່ານ ຫງວຽນຈີຢຸງ ລັດຖະມົນຕີກະຊວງແຜນການ ແລະການລົງທຶນຫວຽດນາມ. ພາບ: ແອັງຕ໊ວນ. |
ຄວາມຕັດສິນໃຈບັນລຸລະດັບເຕີບໂຕເສດຖະກິດສູງໃນໄລຍະຈະມາເຖິງ ແລະຮັກສາໃນໄລຍະຍາວ. ຄວາມຮຽກຮ້ອງນີ້ໄດ້ວາງອອກໃນເປົ້າໝາຍສັງລວມກ່ຽວກັບການພັດທະນາເສດຖະກິດ-ສັງຄົມ ເຊິ່ງກອງປະຊຸມໃຫຍ່ ຄັ້ງທີ XIII ຂອງພັກ ໄດ້ກໍານົດແມ່ນຮອດປີ 2045 ປະເທດຫວຽດນາມ ກາຍເປັນປະເທດພັດທະນາ, ມີລາຍຮັບສູງ. ພ້ອມກັນນັ້ນ, ສືບຕໍ່ຍູ້ແຮງການຫັນເປັນປະເທດອຸດສາຫະກຳ, ທັນສະໄໝ, ສ້າງໂຄງປະກອບພື້ນຖານເສດຖະກິດຄືນໃໝ່ຕິດພັນກັບການປ່ຽນແປງໃໝ່ຮູບແບບການເຕີບໂຕ. ຍົກສູງກຳລັງຄວາມສາມາດການຜະລິດໃນຂະແໜງອຸດສາຫະກຳພື້ນຖານ, ອຸດສາຫະກຳປາຍແຫຼມ, ອຸດສາຫະກຳຫາກໍ່ພົ້ນເດັ່ນຂຶ້ນ. ສ້າງຕັ້ງ ແລະພັດທະນາບັນດາສູນການເງິນ, ເຂດການຄ້າເສລີທີ່ມີຂອບຂະໜາດພາກພື້ນ ແລະສາກົນ. ສ້າງບັນດາສູນ logistics ຂະໜາດໃຫຍ່ຕິດພັນກັບທ່າກຳປັ່ນ, ສະໜາມບິນສົ່ງຕໍ່ສາກົນ, ສະຖານີລົດໄຟຂົນສົ່ງສາກົນ, ບັນດາດ່ານຊາຍແດນສາກົນຂະໜາດໃຫຍ່. ພັດທະນາການທ່ອງທ່ຽວກາຍເປັນຂະແໜງເສດຖະກິດປາຍແຫຼມ. ພັດທະນາບັນດາເຂດຜະລິດກະສິກຳລວມສູນ, ມີສະມັດຕະພາບ, ຄຸນນະພາບ, ມີປະສິດທິຜົນສູງ. ປ່ຽນແປງໃໝ່ນະໂຍບາຍຄຸ້ມຄອງ ແລະນຳໃຊ້ດິນປູກເຂົ້າຢ່າງມີໄຫວພິບ, ມີປະສິດທິຜົນ. ຊຸກຍູ້ການພັດທະນາເສດຖະກິດດີຈີຕອນ, ເສດຖະກິດພື້ນຖານ, ເສດຖະກິດແບ່ງປັນ; ເພີ່ມທະວີການໝູນໃຊ້ເຕັກໂນໂລຢີດີຈີຕອນໃນທຸກຂະແໜງ, ຂົງເຂດ, ສ້າງຮູບແບບດຳເນີນທຸລະກິດໃໝ່.
ໜຶ່ງໃນບັນດາທິດທາງສຳຄັນອື່ນນັ້ນແມ່ນການປະສານສົມທົບນະໂຍບາຍເງິນຕາກັບນະໂຍບາບປີການເງິນ ແລະນະໂຍບາຍເສດຖະກິດມະຫາພາກອື່ນໆຢ່າງຄົບຊຸດ, ກົມກຽວ ເພື່ອຮັກສາເສດຖະກິິດມະຫາພາກໃຫ້ໝັ້ນທ່ຽງ. ຄວບຄຸມໄພເງິນເຟີ້, ຊຸກຍູ້ການເຕີບໂຕເສດຖະກິດໃນລະດັບສູງ. ຄຸ້ມຄອງລາຍຮັບ-ລາຍຈ່າຍງົບປະມານແຫ່ງລັດຢ່າງເຄັ່ງຄັດ. ລະດົມ ແລະນຳໃຊ້ບັນດາແຫຼ່ງກຳລັງໃຫ້ການພັດທະນາຢ່າງມີປະສິດທິຜົນ.
ເພື່ອບັນລຸລະດັບການເຕີບໂຕສູງໃນສະພາບການໂລກ, ພາກພື້ນມີຫຼາຍປັດໄຈຫຍຸ້ງຍາກ, ຮຽກຮ້ອງຕ້ອງສຸມໃສ່ປະຕິບັດບັນດາບຸກທະລຸຍຸດທະສາດ ເຊິ່ງກອງປະຊຸມໃຫຍ່ຂອງພັກ ຄັ້ງຕ່າງໆທີ່ໄດ້ກຳນົດຢ່າງມີປະສິດທິຜົນ, ໃນນັ້ນໄລຍະຈະມາເຖິງການປັບປຸງລະບອບລະບຽບການພັດທະນາໄດ້ຮັບຖືວ່າ “ບຸກທະລຸຂອງບຸກທະລຸ”. ສືບຕໍ່ໄດ້ຍົກສູງຄຸນນະພາບກົນໄກເສດຖະກິດຕະຫຼາດກຳນົດທິດສັງຄົມນິຍົມ. ຍູ້ແຮງການປັບປຸງພື້ນຖານລະບອບລະບຽບການເພື່ອຊຸກຍູ້ການພັດທະນາບັນດາຮູບແບບເສດຖະກິດໃໝ່, ຄື: ເສດຖະກິດດີຈີຕອນ, ເສດຖະກິດສີຂຽວ, ເສດຖະກິດໝູນວຽນ, ສູນການເງິນພາກພື້ນ ແລະສາກົນ, ເຂດການຄ້າເສລີ... ປັບປຸງລະບົບນະໂຍບາຍຢ່າງຄົບຖ້ວນ, ຄົບຊຸດ, ທັນສະໄໝ, ເຊື່ອມໂຍງສາກົນ. ປັບປຸງ ແລະຍົກສູງຄຸນນະພາບສະພາບແວດລ້ອມການດຳເນີນທຸລະກິດ, ຮັບປະກັນການແກ່ງແຍ້ງປອດໃສ, ສະເໝີພາບ, ກະຈ່າງແຈ້ງ. ຍູ້ແຮງການແບ່ງຂັ້ນ, ແບ່ງສິດ, ກຳນົດຄວາມຮັບຜິດຊອບຢ່າງຈະແຈ້ງ, ສິດອຳນາດລະຫວ່າງສູນກາງ ແລະທ້ອງຖິ່ນດ້ວຍທິດນຳ “ທ້ອງຖິ່ນຕັດສິນໃຈ, ທ້ອງຖິ່ນເຮັດ, ທ້ອງຖິ່ນຮັບຜິດຊອບ”.
ທຸກແຜນນະໂຍບາຍ, ນະໂຍບາຍລ້ວນແຕ່ເລີ່ມຈາກຄວາມຜາສຸກຂອງປະຊາຊົນ
ນັກຂ່າວ: ດ້ວຍເປົ້າໝາຍສ້າງຫວຽດນາມ ກາຍເປັນປະເທດພັດທະນາໃນກາງສະຕະວັດ 21, ທ່ານລັດຖະມົນຕີ ຖືວ່າຕ້ອງສຸມໃສ່ເຂົ້າຂົງເຂດບຸລິມະສິດໃດເພື່ອຮັບປະກັນໃຫ້ການພັດທະນາຮອບດ້ານ ແລະຍືນຍົງ?
ທ່ານ ຫງວຽນຈີຢຸງ ລັດຖະມົນຕີກະຊວງແຜນການ ແລະການລົງທຶນ: ດ້ວຍເປົ້າໝາຍກໍ່ສ້າງຫວຽດນາມ ກາຍເປັນປະເທດພັດທະນາໃນກາງສະຕະວັດ 21, ເພື່ອຮັບປະກັນການພັດທະນາຮອບດ້ານ ແລະຍືນຍົງ, ຮັກສາຄວາມດຸ່ນດຽງລະຫວ່າງການພັດທະນາເສດຖະກິດຕະຫຼາດ ແລະການປະຕິບັດບັນດາເປົ້າໝາຍສັງຄົມ, ຕາມພວກຂ້າພະເຈົ້າແລ້ວ, ທຸກແຜນນະໂຍບາຍ, ນະໂຍບາຍລ້ວນແຕ່ຕ້ອງເລີ່ມຈາກຄວາມມຸ່ງມາດປາດຖະໜາ, ຜົນປະໂຫຍດອັນຊອບທຳ ແລະຄວາມຜາສຸກຂອງປະຊາຊົນ. ພວກເຮົາ ຖືການພັດທະນາເພື່ອຮັກສາຄວາມໝັ້ນຄົງ, ຮັກສາຄວາມໝັ້ນຄົງເພື່ອຊຸກຍູ້ການພັດທະນາ; ພ້ອມທັງພັດທະນາກົມກ່ຽວລະຫວ່າງເສດຖະກິດກັບວັດທະນະທຳ, ສັງຄົມ, ປົກປັກຮັກສາສິ່ງແວດລ້ອມ ແລະຮັບມືກັບການປ່ຽນແປງຂອງດິນຟ້າອາກາດ; ຖືການພັດທະນາແມ່ນໜ້າທີ່ຈຸດສຸມ.
ນັກຂ່າວ: ທ່ານລັດຖະມົນຕີ ສາມາດແບ່ງປັນລະອຽດກ່ຽວກັບທິດທາງພັດທະນາເສົາຄ້ຳສັງຄົມ ແລະສິ່ງແວດລ້ອມ ໄດ້ບໍ?
ທ່ານ ຫງວຽນຈີຢຸງ ລັດຖະມົນຕີກະຊວງແຜນການ ແລະການລົງທຶນ: ສຳລັບໜ້າທີ່ສັງຄົມ, ຕ້ອງມຸ່ງໄປເຖິງເປົ້າໝາຍພັດທະນາວັດທະນະທຳ, ສັງຄົມ ແລະປະຕິບັດຄວາມກ້າວໜ້າ ແລະຍຸຕິທຳສັງຄົມ; ສຸມໃສ່ຍົກສູງຊີວິດການເປັນຢູ່ດ້ານວັດຖຸ, ຈິດໃຈ ແລະສຸຂະພາບຂອງປະຊາຊົນ. ພັດທະນາວັດທະນະທຳ, ສັງຄົມ, ຕິດພັນກັບການພັດທະນາເສດຖະກິດຢ່າງແໜ້ນແຟ້ນ, ກົມກ່ຽວ; ຖືເປັນສຳຄັນການພັດທະນາວັດທະນະທຳ, ສັງຄົມທຽບເທົ່າກັບການພັດທະນາເສດຖະກິດ.
|
|
 |
|
ການເຄື່ອນໄຫວຜະລິດຢູ່ບໍລິສັດໃຫຍ່ຫຸ້ນສ່ວນຕັດຫຍິບ 10. ພາບ: ມິງດຶກ |
ສຳລັບໜ້າທີ່ສິ່ງແວດລ້ອມ, ບັນດາມາດຕະການຕ້ອງມຸ່ງໄປເຖິງການຄຸ້ມຄອງ ແລະນຳໃຊ້ຊັບພະຍາກອນຢ່າງມີປະສິດທິຜົນ; ເພີ່ມທະວີການປົກປັກຮັກສາສິ່ງແວດລ້ອມ ແລະເປັນເຈົ້າການຮັບມືກັບການປ່ຽນແປງຂອງດິນຟ້າອາກາດ, ປ້ອງກັນ, ຕ້ານ ແລະຫຼຸດການປ່ອຍອາຍພິດເຮືອນແກ້ວ, ຊຸກຍູ້ການຫັນມານຳໃຊ້ພະລັງງານທົດແທນ, ສູ້ຊົນນຳລະດັບການປ່ອຍອາຍພິດຂອງປະເທດ ລົງລະດັບ “0” ໃນປີ 2050. ຂ້ຽວຂາດແກ້ໄຂສະພາບມົນລະພິດທາງອາກາດຢູ່ຕົວເມືອງຜ່ານການພັດທະນາຄົມມະນາຄົມສາທາລະນະ, ຄ່ອຍໆຫຼຸດຜ່ອນການນຳໃຊ້ພາຫະນະຄົມມະນາຄົມທີ່ກໍ່ມົນລະພິດ ແທນທີ່ນັ້ນແມ່ນນຳໃຊ້ພາຫະນະເປັນມິດກັບສິ່ງແວດລ້ອມ ແລະພັດທະນາກິດຈະການສີຂຽວ, ຍົກເນື້ອທີ່ປູກຕົ້ນໄມ້ຂຽວ. ຄວບຄຸມຢ່າງເຄັ່ງຄັດ ແລະຍົກສູງປະສິດທິຜົນການເຄື່ອນໄຫວຂຸດຄົ້ນ, ປຸງແຕ່ງແຮ່ທາດ. ກໍ່ສ້າງ, ປັບປຸງລະບົບພື້ນຖານໂຄງລ່າງຮັບມືກັບການປ່ຽນແປງຂອງດິນຟ້າອາກາດ, ປ້ອງກັນ ແລະຕ້ານໄພທຳມະຊາດ.
ນັກຂ່າວ: ຂໍຂອບໃຈທ່ານລັດຖະມົນຕີ!
ໂດຍ: ແສງເດືອນ