ອົງການການບິນອາວະກາດຍີ່ປຸ່ນ ວາງແຜນສົ່ງດາວທຽມ NanoDragon ຄັ້ງທີ 4
ກປ.ອອນໄລ - ຕອນບ່າຍວັນທີ 7 ພະຈິກ, ສູນອາວະກາດຫວຽດນາມ (VNSC) ແລະສະພາມະຫາບັນດິດວິທະຍາສາດ ແລະເຕັກໂນໂລຢີຫວຽດນາມ (VAST) ໄດ້ອອກແຈ້ງການໃຫ້ຮູ້ວ່າ: ອົງການການບິນອາວະກາດຍີ່ປຸ່ນ (JAXA) ປະກາດຕາຕະລາງການສົ່ງດາວທຽມ NanoDragon “made in Vietnam” ພ້ອມກັບ 8 ດາວທຽມຂະໜາດນ້ອຍອື່ນອີກໃນຕອນເຊົ້າວັນທີ 9 ພະຈິກ.
ຕາມແຈ້ງການທາງການຂອງ JAXA, ເວລາຍິງລູກສອນໄຟ Epsilon-5 ທີ່ນຳເອົາ 9 ດາວທຽມຕິດພ້ອມນັ້ນຈະດຳເນີນແຕ່ເວລາ 7 ໂມງ 48 ນາທີ ຫາ 7 ໂມງ 59 ນາທີ, ຢູ່ສະໜາມສົ່ງດາວທຽມ Uchinoura, ຍີ່ປຸ່ນ.
|
|
ນັກຊ່ຽວຊານຍີ່ປຸ່ນ ຕິດຕັ້ງດາວທຽມ NanoDragon ຂອງຫວຽດນາມ ໃສ່ທໍ່ຍິງຂອງລູກສອນໄພ. ພາບ: ສູນອາວະກາດຫວຽດນາມ. |
ນີ້ແມ່ນຄັ້ງທີ 4 ທີ່ JAXA ໄດ້ວາງແຜນສົ່ງດາວທຽມ NanoDragon, ກ່ອນໜ້ານັ້ນການວາງແຜນສົ່ງດາວທຽມໃນວັນທີ 1 ຕຸລາ, ວັນທີ 7 ຕຸລາ ແລະ ວັນທີ 7 ພະຈິກ ລ້ວນແຕ່ຖືກໂຈະໄວ້ຍ້ອນດິນຟ້າອາກາດບໍ່ອຳນວຍ ແລະເຫດຜົນທາງເຕັກນິກ.
NanoDragon ແມ່ນດາວທຽມໂດຍບັນດານັກວິທະຍາສາດສັງກັດສູນອາວະກາດຫວຽດນາມ, ສະພາມະຫາບັນດິດວິທະຍາສາດ ແລະເຕັກໂນໂລຢີຫວຽດນາມ ຄົ້ນຄວ້າ, ອອກແບບ ແລະຜະລິດເອງ. ດາວທຽມນີ້ແມ່ນຜະລິດຕະພັນຂອງໂຄງການ “ຄົ້ນຄວ້າ, ອອກແບບ, ປະດິດສ້າງ, ຍິງສົ່ງ ແລະທົດລອງດາວທຽມຈຸນລະພາກຂະໜາດນາໂນ” ສັງກັດ “ໂຄງການວິທະຍາສາດ ແລະເຕັກໂນໂລຢີລະດັບຊາດກ່ຽວກັບເຕັກໂນໂລຢີອາວະກາດໄລຍະ 2016 – 2020” ໂດຍສະພາມະຫາບັນດິດວິທະຍາສາດ ແລະເຕັກໂນໂລຢີຫວຽດນາມຮັບຜິດຊອບ.
ໂດຍ: ທະນາພອນ