ຕອນຄ່ຳວັນທີ 1 ທັນວາ, ຢູ່ແຂວງບ່າເຣ້ຍ - ຫວູງເຕົາ, ທ່ານ ຟ້າມມິງຈິງ ນາຍົກລັດຖະມົນຕີຫວຽດນາມ ໄດ້ເຂົ້າຮ່ວມ 5 ເຫດການກ່ຽວກັບນ້ຳມັນອາຍແກັດ ແລະໄຟຟ້າແຮງລົມນອກຝັ່ງທະເລທີ່ມີມູນຄ່າຫຼາຍຕື້ USD ຂອງກຸ່ມບໍລິສັດນ້ຳມັນອາຍແກັດ ຫວຽດນາມ (Petrovietnam) ແລະ ບໍລິສັດໃຫຍ່ຫຸ້ນສ່ວນການບໍລິການເຕັກນິກນ້ຳມັນອາຍແກັດຫວຽດນາມ (PTSC), ໃນນັ້ນມີພິທີປ່ອຍເຮືອລົງນ້ຳ ແລະມອບຕິນເສົາໄຟຟ້າແຮງລົມນອກຝັ່ງໃຫ້ແກ່ລູກຄ້າ Orsted (ແດນມາກ); ພິທີເລີ່ມລົງມືປະດິດສ້າງສະຖານີໝໍແປງໄຟຢູ່ນອກຝັ່ງທະເລ  (OSS) 4 ແຫ່ງ ໃຫ້ແກ່ໂຄງການໄຟຟ້າແຮງລົມນອກຝັ່ງທະເລ Baltica 02 ຢູ່ທະເລ Baltic - ເຊິ່ງເປັນໜຶ່ງໃນບັນດາໂຄງການໄຟຟ້າແຮງລົມໃຫຍ່ສຸດໃນໂລກ.

leftcenterrightdel
ທ່ານ ຟ້າມມິງຈິງ ນາຍົກລັດຖະມົນຕີຫວຽດນາມ ເປັນສັກຂີພິຍານພິທີລົງນາມການຮ່ວມມື. ພາບ: ສໍານັກຂ່າວສານຫວຽດນາມ

ກ່າວຄຳເຫັນໃນເຫດການນີ້, ທ່ານ ຟ້າມມິງຈິງ ນາຍົກລັດຖະມົນຕີຫວຽດນາມ ໄດ້ຊົມເຊີຍຄວາມມານະພະຍາຍາມຂອງ Petrovietnam ເພື່ອແນໃສ່ກາຍເປັນກຸ່ມບໍລິສັດອຸດສາຫະກຳພະລັງງານຂອງຫວຽດນາມ, ເຄື່ອນໄຫວໃນບັນດາຂົງເຂດ, ຄື: ພະລັງງານໄຟຟ້າ, ພະລັງງານທົດແທນ, ຊຶ່ງບໍ່ພຽງແຕ່ໃນຂົງເຂດນ້ຳມັນອາຍແກັດເທົ່ານັ້ນ. ດ້ວຍການສ້າງໂຄງປະກອບການເຄື່ອນໄຫວຄືນໃໝ່, Petrovietnam ໄດ້ປະກອບສ່ວນປະມານ 10% ເຂົ້າໃນຍອດລາຍຮັບງົບປະມານຂອງທົ່ວປະເທດໃນປີນີ້.

ຕາມທ່ານນາຍົກລັດຖະມົນຕີແລ້ວ, ການພັດທະນາສີຂຽວ, ຫັນເປັນດີຈີຕອນ, ເສດຖະກິດໝູນວຽນ ແມ່ນທ່າອ່ຽງຂອງໂລກ, ແມ່ນຄວາມຮຽກຮ້ອງຕ້ອງການພາວະວິໄສ, ການເລືອກເຟັ້ນຍຸດທະສາດ ແລະ ບຸລິມະສິດແຖວໜ້າ. ນີ້ກໍແມ່ນຂົງເຂດ ເຊິ່ງ ຫວຽດນາມ ມີກຳລັງບົ່ມຊ້ອນຫຼາຍຢ່າງທີ່ແຕກຕ່າງກັນ, ກາລະໂອກາດພົ້ນເດັ່ນ ແລະມີທ່າແຮງໃນການແກ່ງແຍ້ງ.

ທ່ານນາຍົກລັດຖະມົນຕີ ຮຽກຮ້ອງໃຫ້ກຸ່ມບໍລິສັດນ້ຳມັນອາຍແກັດ ຫວຽດນາມ ເປັນເຈົ້າຂອງເຕັກໂນໂລຢີໄຟຟ້າແຮງລົມນອກຝັ່ງທັງໝົດໂດຍໄວ, ພ້ອມທັງບຳລຸງແຫຼ່ງຊັບພະຍາກອນມະນຸດ, ຍົກສູງຄວາມສາມາດໃນການຄຸ້ມຄອງບໍລິຫານ, ພັດທະນາພື້ນຖານໂຄງລ່າງ, ສະເໜີນະໂຍບາຍເພື່ອພັດທະນາແຫຼ່ງອຸດສາຫະກຳພະລັງງານທົດແທນ. ທ່ານນາຍົກລັດຖະມົນຕີ ກໍສະເໜີໃຫ້ກຸ່ມບໍລິສັດນ້ຳມັນອາຍແກັດຍູ້ແຮງການຮ່ວມມືສາກົນ, ຜັນຂະຫຍາຍບັນດາຂໍ້ຕົກລົງຂອງການນຳຂັ້ນສູງຫວຽດນາມ ກັບບັນດາປະເທດ.

​ຂ່າວ: ວິທະຍຸກະຈາຍສຽງຫວຽດນາມ