ນັກຂ່າວ: ສະມາຄົມຜູ້ປະສົບເຄາະຮ້າຍຈາກທາດພິດສີສົ້ມ/ດີໂອຊິນຫວຽດນາມ ໄດ້ຜ່ານໄລຍະທາງ 20 ກວ່າປີແຫ່ງການສ້າງສາ ແລະເຕີບໃຫຍ່ຂະຫຍາຍຕົວ. ສະເໜີ ສະຫາຍ ຈົ່ງໃຫ້ຮູ້ໂດຍສັງເຂບກ່ຽວກັບຜົນງານ, ໝາກຜົນທີ່ພົ້ນເດັ່ນຂອງສະມາຄົມ?
ພົນຕີ ຫງວຽນຫຶວຈິ໊ງ: ວັນທີ 10 ມັງກອນ 2004, ສະມາຄົມຜູ້ປະສົບເຄາະຮ້າຍຈາກທາດພິດສີສົ້ມ/ດີໂອຊິນຫວຽດນາມ ໄດ້ຮັບການສ້າງຕັ້ງຂຶ້ນ, ດ້ວຍພາລະກໍາອັນສູງສົ່ງ ແມ່ນຕໍ່ສູ້ທວງເອົາຄວາມຍຸຕິທໍາ ແລະເບິ່ງແຍງດູແລ, ຊ່ວຍເຫຼືອຜູ້ປະສົບເຄາະຮ້າຍຈາກທາດພິດສີສົ້ມ. ຜ່ານ 20 ກວ່າປີແຫ່ງການສ້າງສາ ແລະເຄື່ອນໄຫວ, ສະມາຄົມ ໄດ້ພັດທະນາຢ່າງບໍ່ຢຸດຢັ້ງ, ຍາມໃດກໍໄດ້ຮັບການເອົາໃຈໃສ່ຈາກພັກ, ລັດ, ຄະນະພັກ, ອໍານາດການປົກຄອງທຸກຂັ້ນ; ໄດ້ຮັບການສະໜັບສະໜູນ, ຊ່ວຍເຫຼືອຢ່າງມີປະສິດທິຜົນຈາກບັນດາຄະນະ, ກະຊວງ, ຂະແໜງການ, ອົງການຈັດຕັ້ງມະຫາຊົນຂັ້ນສູນກາງ ແລະທ້ອງຖິ່ນ, ຂອງປະຊາຊົນໃນທົ່ວປະເທດ ແລະເພື່ອນມິດສາກົນ. ດ້ວຍທິດນໍາທີ່ວ່າ “ສາມັກຄີ-ຮັກແພງ-ຮັບຜິດຊອບ-ເພື່ອຜູ້ປະສົບເຄາະຮ້າຍຈາກທາດພິດສີສົ້ມ”, ຖັນແຖວພະນັກງານ, ສະມາຊິກສະມາຄົມ ຍາມໃດກໍມານະພະຍາຍາມຜ່ານຜ່າຄວາມຫຍຸ້ງຍາກ, ປະຕິບັດສໍາເລັດໜ້າທີ່ທີ່ພັກ, ລັດ ມອບໝາຍໃຫ້ເປັນຢ່າງດີ.
    |
 |
|
ພົນຕີ ຫງວຽນຫຶວຈິ໊ງ. ພາບ: qdnd.vn |
ການຕໍ່ສູ້ທວງເອົາຄວາມຍຸຕິທໍາໃຫ້ແກ່ຜູ້ປະສົບເຄາະຮ້າຍຈາກທາດພິດສີສົ້ມໄດ້ດໍາເນີນຢ່າງອົດທົນໜຽວແໜ້ນ, ສອດຄ່ອງກັບສະຖານະການ, ສະພາບການໃໝ່, ຖືກກັບແຜນນະໂຍບາຍ, ແນວທາງການຕ່າງປະເທດຂອງພັກ ແລະບັນລຸໄດ້ຫຼາຍໝາກຜົນທີ່ສໍາຄັນ; ຜ່ານນັ້ນ ປະຊາຊົນພາຍໃນປະເທດ ແລະເພື່ອນມິດສາກົນ ມີຄວາມເຂົ້າໃຈແຈ້ງກວ່າກ່ຽວກັບໄພພິບັດຈາກທາດພິດສີສົ້ມ, ມີການຊ່ວຍເຫຼືອທີ່ຫຼາຍກວ່າ ນັບທັງ ດ້ານວັດຖຸ ແລະຈິດໃຈ, ພ້ອມທັງຮຽກຮ້ອງໃຫ້ອາເມລິກາ ຕ້ອງມີຄວາມຮັບຜິດຊອບກວ່າອີກຕໍ່ຜູ້ປະສົບເຄາະຮ້າຍຈາກທາດພິດສີສົ້ມ, ກໍຄືການແກ້ໄຂຜົນຮ້າຍຢ້ອນຫຼັງຈາກທາດພິດສີສົ້ມ ຍ້ອນເຂົາເຈົ້າ ກໍ່ຂຶ້ນ.
ວຽກງານປຸກລະດົມແຫຼ່ງກໍາລັງພາຍໃນ ແລະຕ່າງປະເທດ ໃນການເບິ່ງແຍງດູແລ, ຊ່ວຍເຫຼືອຜູ້ປະສົບເຄາະຮ້າຍຈາກທາດພິດສີສົ້ມບັນລຸໄດ້ໝາກຜົນທີ່ໜ້າຮັບຮູ້. ໃນຕະຫຼອດ 20 ປີ (ຮອດເດືອນ ທັນວາ ປີ 2023), ທົ່ວສະມາຄົມ ສາມາດປຸກລະດົມ ໄດ້ກວ່າ 4.049 ຕື້ດົ່ງ (ລວມມີເງິນສົດ ແລະວັດຖຸ), ໄດ້ຈ່າຍເຂົ້າໃນການເບິ່ງແຍງດູແລ, ຊ່ວຍເຫຼືອຜູ້ປະສົບເຄາະຮ້າຍກວ່າ 4.023 ຕື້ດົ່ງ; ສະເພາະ 6 ເດືອນຕົ້ນປີ 2024 ປຸກລະດົມໄດ້ກວ່າ 348 ຕື້ດົ່ງ, ໄດ້ຈ່າຍເຂົ້າໃນການເບິ່ງແຍງດູແລ, ຊ່ວຍເຫຼືອຜູ້ປະສົບເຄາະຮ້າຍກວ່າ 320 ຕື້ດົ່ງ.
ນັກຂ່າວ: ຂໍຮຽນທ່ານ, ໃນການປະຕິບັດໜ້າທີ່, ສະມາຄົມຜູ້ປະສົບເຄາະຮ້າຍຈາກທາດພິດສີສົ້ມ/ດີໂອຊິນຫວຽດນາມ ມີຄວາມສະດວກ, ຫຍຸ້ງຍາກຫຍັງແດ່?
ພົນຕີ ຫງວຽນຫຶວຈິ໊ງ: ປະຕິບັດພາລະກໍາອັນສູງສົ່ງ ແມ່ນຕໍ່ສູ້ທວງເອົາຄວາມຍຸຕິທໍາ ແລະເບິ່ງແຍງດູແລ, ຊ່ວຍເຫຼືອຜູ້ປະສົບເຄາະຮ້າຍຈາກທາດພິດສີສົ້ມ, ສະມາຄົມ ໄດ້ຮັບການເອົາໃຈໃສ່ນໍາພາ, ຊີ້ນໍາຢ່າງເປັນປະຈໍາຈາກການນໍາພັກ, ລັດ, ບັນດາອົງການຂັ້ນສູງກາງ; ໄດ້ຮັບການສະໜັບສະໜູນ, ຊ່ວຍເຫຼືອຈາກຄະນະພັກ, ອໍານາດການປົກຄອງ, ແນວໂຮມປະເທດຊາດທຸກຂັ້ນ; ການເຂົ້າຮ່ວມຂອງທົ່ວລະບົບການເມືອງ ແລະທົ່ວປວງຊົນ; ໄດ້ຮັບການສະໜັບສະໜູນຢ່າງເລິກເຊິ່ງກວ້າງຂວາງຂອງມວນມະນຸດທີ່ກ້າວໜ້າ ແລະເພື່ອນມິດສາກົນ. ຖານະບົດບາດ, ທີ່ຕັ້ງ, ອິດທິພົນຊື່ສຽງຂອງສະມາຄົມ ທີ່ນັບມື້ນັບໄດ້ຮັບການຢັ້ງຢືນ ແລະຍົກສູງຂຶ້ນຢູ່ພາຍໃນ ກໍຄືໃນເວທີສາກົນ.
|
|
 |
|
ການນໍາສູນກາງສະມາຄົມຜູ້ປະສົບເຄາະຮ້າຍຈາກທາດພິດສີສົ້ມ/ດີໂອຊິນຫວຽດນາມ ແລະສະມາຄົມນະຄອນ ເກິ່ນເທີ ລົງຢ້ຽມຢາມຜູ້ປະສົບເຄາະຮ້າຍຈາກທາດພິດສີສົ້ມ ຢູ່ສູນອຸປະກາລະສັງຄົມ ນະຄອນ ເກິ່ນເທີ (ເດືອນມັງກອນ ປີ 2024). ພາບ: qdnd.vn |
ຄະນະພັກການທະຫານສູນກາງ, ການນໍາກະຊວງປ້ອງກັນປະເທດ, ກົມໃຫຍ່ການເມືອງກອງທັບປະຊາຊົນຫວຽດນາມ, ບັນດາອົງການ, ກົມກອງຂອງກອງທັບ... ດ້ວຍຄວາມຮັບຜິດຊອບ, ຄວາມຮັກແພງ, ຍາມໃດກໍເອົາໃຈໃສ່, ຊ່ວຍເຫຼືອຜູ້ປະສົບເຄາະຮ້າຍຢ່າງແທດຈິງ, ມີປະສິດທິຜົນ ແລະສ້າງເງື່ອນໄຂສະດວກໃຫ້ແກ່ອົງການຈັດຕັ້ງສະມາຄົມທຸກຂັ້ນ ປະຕິບັດໜ້າທີ່ໃຫ້ເປັນຢ່າງດີ. ກະຊວງປ້ອງກັນປະເທດ ໄດ້ສ້າງເງື່ອນໄຂທາງດ້ານທີ່ດິນ, ໜູນຊ່ວຍງົບປະມານ ເພື່ອກໍ່ສ້າງ, ຍົກລະດັບສໍານັກງານອົງການສູນກາງສະມາຄົມ ແລະສູນອຸປະກາລະສັງຄົມ; ໜູນຊ່ວຍຍູ້ແຮງວຽກງານໂຄສະນາ, ໂດຍສະເພາະແມ່ນໃນວາລະສານທາດພິດສີສົ້ມຫວຽດນາມ; ມອບພາຫະນະ, ອຸປະກອນການດໍາລົງຊີວິດ, ຟື້ນຟູອະໄວຍະວະ, ສອນວິຊາຊີບໃຫ້ຜູ້ປະສົບເຄາະຮ້າຍຈາກທາດພິດສີສົ້ມ...
ເຖິງຢ່າງໃດກໍຕາມ, ວິວັດການກໍ່ສ້າງ, ເຄື່ອນໄຫວ, ສະມາຄົມ ກໍປະສົບຄວາມຫຍຸ້ງຍາກຈໍານວນໜຶ່ງ ຄື: ຖັນແຖວພະນັກງານສະມາຄົມສ່ວນຫຼາຍແມ່ນນັກຮົບເກົ່າ, ຜູ້ປະສົບເຄາະຮ້າຍຈາກທາດພິດສີສົ້ມ, ມາຮອດປັດຈຸບັນອາຍຸສູງແລ້ວ, ສຸຂະພາບອ່ອນເພຍ, ຊໍ້າຍັງບໍ່ທັນໄດ້ຮັບຄ່າຕອບແທນ, ຄ່າໜູນຊ່ວຍງົບປະມານການເຄື່ອນໄຫວ, ໂດຍສະເພາະແມ່ນຢູ່ຂັ້ນເມືອງ, ຕາແສງ ສະນັ້ນ ຈຶ່ງສົ່ງຜົນສະທ້ອນເຖິງໝາກຜົນແຫ່ງການປະຕິບັດໜ້າທີ່. ປັດຈຸບັນ ຜູ້ທີ່ເຄື່ອນໄຫວໃນສະໄໝຕໍ່ຕ້ານຖືກຕິດທາດພິດສີສົ້ມຈໍານວນບໍ່ໜ້ອຍບໍ່ມີເອກະສານຄົບຖ້ວນຕາມຂໍ້ກໍານົດ, ສະນັ້ນ ຈຶ່ງຍັງ ບໍ່ທັນໄດ້ຮັບນະໂຍບາຍພິເສດ. ຍ້ອນປະສົບຄວາມຫຍຸ້ງຍາກດ້ານເສດຖະກິດ-ສັງຄົມ ສະນັ້ນວຽກງານປຸກລະດົມແຫຼ່ງກໍາລັງ ເພື່ອເບິ່ງແຍງດູແລ, ຊ່ວຍເຫຼືອຜູ້ປະສົບເຄາະຮ້າຍ ຢູ່ບາງທ້ອງຖິ່ນ ຈຶ່ງບັນລຸໝາກຜົນບໍ່ທັນສູງ.
ນັກຂ່າວ: ປີ 2024 ແມ່ນປີທໍາອິດແຫ່ງການປະຕິບັດມະຕິກອງປະຊຸມໃຫຍ່ ຄັ້ງທີ V ຂອງສະມາຄົມຜູ້ປະສົບເຄາະຮ້າຍຈາກທາດພິດສີສົ້ມ/ດີໂອຊິນຫວຽດນາມ, ອາຍຸການ 2023-2028, ດັ່ງນັ້ນ ສະມາຄົມ ມີມາດຕະການຫຍັງແດ່ເພື່ອປະຕິບັດວຽກງານກໍ່ສ້າງການຈັດຕັ້ງໃຫ້ເປັນຢ່າງດີ ແລະປຸກລະດົມແຫຼ່ງກໍາລັງ ເພື່ອຊ່ວຍເຫຼືອຜູ້ປະສົບເຄາະຮ້າຍ?
ພົນຕີ ຫງວຽນຫຶວຈິ໊ງ: ສະມາຄົມທຸກຂັ້ນ ສືບຕໍ່ຊາບຊຶມ, ປະຕິບັດຄໍາສັ່ງເລກທີ 43-CT/TW ລົງວັນທີ 14 ພຶດສະພາ 2015 ຂອງຄະນະເລຂາທິການສູນກາງພັກ ກ່ຽວກັບ “ເພີ່ມທະວີການນໍາພາຂອງພັກ ຕໍ່ກັບວຽກງານແກ້ໄຂຜົນຮ້າຍຢ້ອນຫຼັງຈາກທາດພິດສີສົ້ມ ຍ້ອນ ອາເມລິກາ ນໍາໃຊ້ເຂົ້າໃນສົງຄາມຢູ່ຫວຽດນາມ”; ຂໍ້ຕົກລົງເລກທີ 118-QĐ/TW ລົງວັນທີ 22 ສິງຫາ 2023 ຂອງຄະນະເລຂາທິການສູນກາງພັກ, ປະກາດໃຊ້ກົດລະບຽບການຈັດຕັ້ງ ແລະການເຄື່ອນໄຫວຂອງສະມາຄົມມະຫາຊົນ ທີ່ ພັກ, ລັດ ມອບໝາຍໜ້າທີ່ໃຫ້ຢູ່ຂັ້ນສູນກາງ ຢ່າງມີປະສິດທິຜົນ... ເອົາໃຈໃສ່ປະຕິບັດວຽກງານໂຄສະນາກ່ຽວກັບໄພພິບັດຈາກທາດພິດສີສົ້ມ ແລະຄວາມມານະພະຍາຍາມຂອງພັກ, ລັດ, ຂອງທົ່ວສັງຄົມໃນການແກ້ໄຂຜົນຮ້າຍຢ້ອນຫຼັງຈາກທາດພິດສີສົ້ມໃຫ້ເປັນຢ່າງດີ ໂດຍຕິດພັນກັບການຍູ້ແຮງຂະບວນການ “ກະທໍາ ເພື່ອຜູ້ປະສົບເຄາະຮ້າຍຈາກທາດພິດສີສົ້ມຫວຽດນາມ” ທີ່ຄະນະກໍາມະການສູນກາງແນວໂຮມປະເທດຊາດຫວຽດນາມ ປຸກລະດົມ.
|
|
 |
|
ການນໍາສູນກາງສະມາຄົມຜູ້ປະສົບເຄາະຮ້າຍຈາກທາດພິດສີສົ້ມ/ດີໂອຊິນຫວຽດນາມ ມອບຂອງຂວັນໃຫ້ຜູ້ປະສົບເຄາະຮ້າຍຈາກທາດພິດສີສົ້ມແຂວງ ເທື່ອທຽນເຫວ້ (ເດືອນມັງກອນ ປີ 2024. ພາບ: qdnd.vn |
ພ້ອມກັບການເອົາໃຈໃສ່ປັບປຸງ, ກໍ່ສ້າງສະມາຄົມ ໃຫ້ໝັ້ນຄົງເຂັ້ມແຂງ, ເອົາໃຈໃສ່ ພັດທະນາສະມາຄົມ, ສາຂາສະມາຄົມ ຢູ່ບັນດາບ່ອນທີ່ມີເງື່ອນໄຂຄົບຖ້ວນ, ອົງການຈັດຕັ້ງສະມາຄົມທຸກຂັ້ນ ສືບຕໍ່ເສີມຂະຫຍາຍ, ຍົກສູງປະສິດທິຜົນບັນດາລາຍການ ທີ່ໄດ້ລົງນາມກັບບັນດາຄູ່ຮ່ວມມືພາຍໃນ ແລະຕ່າງປະເທດ; ເພີ່ມທະວີການນໍາໃຊ້ເຕັກໂນໂລຊີຂໍ້ມູນຂ່າວສານ, ມາດຕະການເຕັກໂນໂລຊີໃໝ່ເຂົ້າໃນການປຸກລະດົມແຫຼ່ງກໍາລັງ. ຖັນແຖວພະນັກງານສະມາຄົມ ຕ້ອງມຸ່ງໄປຫາຮາກຖານ, ກໍາແໜ້ນສະພາບການຂອງຜູ້ປະສົບເຄາະຮ້າຍ ເພື່ອໜູນຊ່ວຍ, ຊ່ວຍເຫຼືອໃຫ້ສອດຄ່ອງ, ມີປະສິດທິຜົນ.
ສະມາຄົມ ສືບຕໍ່ເປີດກວ້າງການພົວພັນຕ່າງປະເທດ, ຍູ້ແຮງການເຄື່ອນໄຫວການທູດປະຊາຊົນ, ເພື່ອຍາດແຍ່ງເອົາການຊ່ວຍເຫຼືອ, ການສະໜັບສະໜູນຂອງເພື່ອນມິດສາກົນ, ທັງຕໍ່ສູ້ທວງເອົາຄວາມຍຸຕິທໍາ, ທັງດຶງດູດ, ປຸກລະດົມແຫຼ່ງກໍາລັງ ເພື່ອເບິ່ງແຍງດູແລ, ຊ່ວຍເຫຼືອຜູ້ປະສົບເຄາະຮ້າຍ ໃຫ້ໄດ້ຫຼາຍກວ່າ, ມີລັກສະນະທີ່ໝັ້ນຄົງກວ່າ.
ຜົນຮ້າຍຢ້ອນຫຼັງຈາກທາດພິດສີສົ້ມ/ດີໂອຊິນ ໂດຍ ອາເມລິກາ ກໍ່ຂຶ້ນ ຢູ່ຫວຽດນາມ ຍັງໜັກໜ່ວງ ແລະຍາວນານ, ມາຮອດປັດຈຸບັນ ໄດ້ມີຜູ້ປະສົບເຄາະຮ້າຍ ຮຸ່ນທີ 4 ແລ້ວ. ເຖິງວ່າ ພັກ, ລັດ, ທຸກຂັ້ນ, ທຸກຂະແໜງການ ໄດ້ເອົາໃຈໃສ່, ປະກາດໃຊ້ນະໂຍບາຍໜູນຊ່ວຍກໍຕາມ, ແຕ່ຜູ້ປະສົບເຄາະຮ້າຍ ແລະຄອບຄົວຜູ້ປະສົບເຄາະຮ້າຍຈາກທາດພິດສີສົ້ມເກືອບທັງໝົດ ຍັງປະສົບຄວາມຫຍຸ້ງຍາກ, ຂາດເຂີນທັງດ້ານວັດຖຸ ແລະຈິດໃຈ, ດັ່ງນັ້ນ ຈຶ່ງມີການຮ່ວມແຮງຮ່ວມໃຈ, ການປະກອບສ່ວນຂອງທົ່ວສັງຄົມ, ການສະໜັບສະໜູນຂອງເພື່ອນມິດສາກົນ ເຂົ້າໃນການຮໍາບາດແຜສົງຄາມ, ບັນເທົາຄວາມເຈັບປວດໃຫ້ຜູ້ປະສົບເຄາະຮ້າຍຈາກທາດພິດ ສີສົ້ມ.
ນັກຂ່າວ: ຂໍຂອບໃຈສະຫາຍ!
ໂດຍ: ໄຊຊະນະ