ຫວຽດນາມ ປະກອບສ່ວນຢ່າງຕັ້ງໜ້າເຂົ້າໃນການເຄື່ອນໄຫວຂອງ ສປຊ ກ່ຽວກັບບັນດາແຮ່ທາດທີ່ຈຳເປັນເພື່ອໃຊ້ເຂົ້າໃນການຫັນປ່ຽນພະລັງງານ

ທ່ານ Nozipho Joyce Mxakato-Diseko ເອກອັກຄະລັດຖະທູດອາຟຣິກາໃຕ້ ແລະທ່ານ Ditte Juul Jorgensen ຫົວໜ້າກົມໃຫຍ່ພະລັງງານຂອງຄະນະກໍາມາທິການເອີຣົບ - ເປັນປະທານຮ່ວມຂອງຄະນະທີ່ປຶກສາ ໄດ້ແຈ້ງໃຫ້ຊາບກ່ຽວກັບການເຄື່ອນໄຫວຂອງຄະນະທີ່ປຶກສາດ້ວຍເປົ້າໝາຍສ້າງກົດລະບຽບດ້ວຍຄວາມສະໝັກໃຈກ່ຽວກັບແຮ່ທາດທີ່ຈຳເປັນເພື່ອໃຊ້ເຂົ້າໃນການຫັນປ່ຽນພະລັງງານ, ອັບເດັດເນື້ອໃນຂອງກອງປະຊຸມທີ່ໄດ້ດຳເນີນ ພ້ອມກັບແຜນການເຄື່ອນໄຫວທີ່ຈະມາເຖິງ.

ທ່ານ ດັ້ງຮ່ວາງຢາງ ເອກອັກຄະລັດຖະທູດ, ຫົວໜ້າຄະນະຜູ້ຕາງໜ້າຫວຽດນາມ ປະຈຳ ສປຊ ກ່າວຄຳເຫັນທີ່ກອງປະຊຸມ. ພາບ: ສໍານັກຂ່າວສານຫວຽດນາມ.

ຜູ້ຕາງໜ້າບັນດາປະເທດສະມາຊິກສະຫະປະຊາຊາດ ສະແດງຄວາມຊົມເຊີຍເຊິ່ງຄະນະທີ່ປຶກສາໄດ້ແຈ້ງໃຫ້ຊາບກ່ຽວກັບການເຄື່ອນໄຫວຂອງຄະນະ, ສະແດງໃຫ້ເຫັນບຸລິມະສິດຂອງຕົນໃນບັນຫາຂຸດຄົ້ນແຮ່ທາດທີ່ຈຳເປັນ ແລະການຫັນປ່ຽນພະລັງງານ, ພ້ອມທັງສະເໜີໃຫ້ຄະນະທີ່ປຶກສາສືບຕໍ່ແຈ້ງໃຫ້ບັນດາປະເທດສະມາຊິກຮັບຊາບກ່ຽວກັບກິດຈະກໍາເຄື່ອນໄຫວຂອງຕົນຢ່າງເປັນປະຈໍາ.

ກ່າວຄຳເຫັນທີ່ກອງປະຊຸມ, ທ່ານ ດັ້ງຮ່ວາງຢາງ ເອກອັກຄະລັດຖະທູດ, ຫົວໜ້າຄະນະຜູ້ຕາງໜ້າຫວຽດນາມ ປະຈຳ ສປຊ ໄດ້ຕີລາຄາສູງຕໍ່ຄວາມມານະພະຍາຍາມຂອງປະທານສອງທ່ານ ແລະຄະນະເລຂາໃນການບໍລິຫານການເຄື່ອນໄຫວຂອງຄະນະທີ່ປຶກສາ, ໂດຍເນັ້ນໜັກວ່າ ຫວຽດນາມ ໄດ້ປະກອບສ່ວນຢ່າງຕັ້ງໜ້າເຂົ້າໃນການປຶກສາຫາລືຂອງຄະນະທີ່ປຶກສາ ແລະຢາກຊຸກຍູ້ເພື່ອໃຫ້ມີໝາກຜົນລະອຽດອອກມາໃນໄລຍະສອງສາມເດືອນຕໍ່ໜ້ານີ້. ຫວຽດນາມ ພວມຢູ່ໃນວິວັດການຜັນຂະຫຍາຍຂໍ້ຕົກລົງການພົວພັນຄູ່ຮ່ວມມືກ່ຽວກັບການຫັນປ່ຽນດ້ານພະລັງງານຢ່າງຍຸດຕິທຳ ແລະການເຄື່ອນໄຫວຂອງຄະນະທີ່ປຶກສາສາມາດໜູນຊ່ວຍຄວາມມານະພະຍາຍາມຂອງການກະທໍາກ່ຽວກັບດິນຟ້າອາກາດຂອງຫວຽດນາມ ເພື່ອໃຫ້ເປັນປະເທດພວມພັດທະນາໃນວິວັດການຫັນປ່ຽນ.

ທ່ານ ດັ້ງຮ່ວາງຢາງ ເນັ້ນໜັກວ່າ ຫວຽດນາມ ສະໜັບສະໜູນເປົ້າໝາຍການເຄື່ອນໄຫວຂອງຄະນະທີ່ປຶກສາໃນການສ້າງປະມວນກົດລະບຽບດ້ວຍຄວາມສະໝັກໃຈກ່ຽວກັບແຮ່ທາດທີ່ຈຳເປັນເພື່ອໃຊ້ເຂົ້າໃນການຫັນປ່ຽນພະລັງງານ ແລະຫວັງວ່າ ບັນດາປະເທດຈະເຂົ້າຮ່ວມປະກອບສ່ວນ ແລະສະໜັບສະໜູນການເຄື່ອນໄຫວຂອງຄະນະທີ່ປຶກສາໃນໄລຍະຈະມາເຖິງ.

ໂດຍ: ຈາງຫງວຽນ