Viettel ໄດ້ຮັບໃບຢັ້ງຢືນ ISO ສູງສຸດກ່ຽວກັບເຕັກໂນໂລຊີຮັບຮູ້ໃບໜ້າ
ກປ.ອອນໄລ - ຫວ່າງແລ້ວນີ້, ລະບົບຮັບຮູ້ໃບໜ້າ - Viettel eKYC ຂອງກຸ່ມບໍລິສັດອຸດສາຫະກໍາ-ໂທລະຄົມມະນາຄົມກອງທັບ (Viettel) ໄດ້ຮັບໃບຢັັ້ງຢືນສາກົນ ISO 30107-3 ກ່ຽວກັບການຮັບຮູ້ໃບໜ້າ (FaceID) ລະດັບ 2 ຂອງອົງການອອກໃບຢັ້ງຢືນ ISO ແຖວໜ້າໂລກ Tayllorcox. ເປັນອັນວ່າ, ມາຮອດປັດຈຸບັນ , Viettel ເປັນວິສາຫະກິດທໍາອິດ ແລະໜຶ່ງດຽວຢູ່ຫວຽດນາມ ໄດ້ຮັບໃບຢັ້ງຢືນລະດັບ 2, ແລະກໍ່ແມ່ນລະດັບສູງສຸດ.
ລະບົບຊີວະມິຕິ (biometrics) Viettel eKYC ຄົ້ນພົບບັນດາການກະທໍາສໍ້ໂກງດ້ວຍການປອມຕົວໃບໜ້າ 2D, 3D ຢ່າງເດັດຂາດ. ລະບົບນີ້ ໂດຍສູນບໍລິການຂໍ້ມູນ ແລະປັນຍາປະດິດ Viettel (Viettel AI) ພັດທະນາ. ຕາມການຕີລາຄາ, Viettel eKYC ໄດ້ຮັບການຕີລາຄາແມ່ນບັນລຸລະດັບຊັດເຈນຢ່າງເດັດຂາດຕໍ່ໜ້າບັນດາຮູບການປອມຕົວ 2D ແລະ 3D, ເຊິ່ງບໍ່ສາມາດຫຼົງລືມລະຫວ່າງໃບໜ້າຜູ້ນໍາໃຊ້ ແລະບັນດາຮູບການປອມຕົວອື່ນ, ຮັບປະກັນຄວາມປອດໄພຕ້ານການປອມຕົວຊີວະມິຕິໃບໜ້າ.
ຢູ່ລະດັບ 1, ບັນດາລະບົບຊີວະມິຕິ ສາມາດຄົ້ນພົບບັນດາກໍລະນີປອມ 2D ໂດຍພື້ນຖານ ຄື: ຖ່າຍຮູບໃບໜ້າຜ່ານໜ້າຈໍ່, ໃບໜ້າພິມໃນເຈ້ຍ, ໃບໜ້າພິມໃນບັດ... ໃນຂະນະນັ້ນ, ບັນດາລະບົບຊີວະມິຕິ ບັນລຸລະດັບ 2, ຄື: Viettel eKYC ສາມາດຄົ້ນພົບບັນດາກໍລະນີສໍ້ໂກງທີ່ແນບນຽນກວ່າແບບ 3D ຄື ໜ້າກາກ silicon, ໃບໜ້າຟື້ນຟູດ້ວຍເຄື່ອງສະແກນສະເພາະ, video deepfake... ແລະພ້ອມແລ້ວທີ່ຈະຮັບມືກັບບັນດາກໍລະນີສໍ້ໂກງຊີວະມິຕິ ທີ່ມີລະດັບສັບສົນກວ່າ.
|
|
ລະບົບຮັບຮູ້ໃບໜ້າ - Viettel eKYC. ພາບ: ເຈິ່ນທໍ້. |
ທ່ານ ຫງວຽນແມ້ງກຸ໋ຍ ຫົວໜ້າສູນບໍລິການຂໍ້ມູນ ແລະປັນຍາປະດິດ Viettel (Viettel AI) ໃຫ້ຮູ້ວ່າ “Viettel ໃຫ້ຄໍາໝັ້ນສັນຍາຈະຄົ້ນຄວ້າ ແລະພັດທະນາບັນດາເຕັກໂນໂລຊີທັນສະໄໝທີ່ສຸດໃນຂົງເຂດປັນຍາປະດິດ ເພື່ອຊ່ວຍບັນດາວິສາຫະກິດ ແລະປະຊາຊົນ ເຂົ້າເຖິງບັນດາມາດຕະການທີ່ມີປະໂຫຍດ, ໃນນັ້ນມີການຢັ້ງຢືນ ແລະກໍານົດຊື່ລູກຄ້າເອເລັກໂຕນິກ-ບໍລິການສໍາຄັນທີ່ໄດ້ ນໍາໃຊ້ໃນຫຼາຍບໍລິການດີຈີຕອນ”.
Viettel ແມ່ນຄູ່ຮ່ວມມືທາງການຂອງກະຊວງຕໍາຫຼວດ ໃນການສະໜອງບໍລິການຢັ້ງຢືນບັດປະຈໍາຕົວຊິບ. Viettel eKYC ເຊື່ອມຕໍ່ກັບພື້ນຖານຂໍ້ມູນແຫ່ງຊາດ ກ່ຽວກັບບັດປະຈໍາຕົວໃນວິວັດການຢັ້ງຢືນ ແລະກໍານົດຊື່ເອເລັກໂຕນິກ, ກວດກາແບບອັດຕະໂນມັດ, ຄົ້ນພົບ ແລະສະກັດກັ້ນທຸກກໍລະນີປອມຕົວ ຫຼື ສໍ້ໂກງຊີວະມິຕິ ພຽງໃນສອງສາມວິນາທີເທົ່ານັ້ນດ້ວຍຄວາມຊັດເຈນສູງ.
Viettel eKYC ພວມໄດ້ຮັບການນໍາໃຊ້ໃນວິຊາສະເພາະຕ່າງໆ ຄື: ການອອກລາຍເຊັນດີຈີຕອນ. ເຊັນສັນຍາເອເລັກໂຕນິກ; ໄລ່ຄ່າແຮງງານດ້ວຍໃບໜ້າ; ຄວບຄຸມຄວາມປອດໄພດ້ວຍໃບໜ້າ; ເປີດບັນຊີ, ອອກບັດ, ປະເມີນຜົນ ແລະປະເມີນບ້ວງເງິນກູ້ຢືມໃຫ້ແກ່ຫຼາຍທະນາຄານ; ຄວບຄຸມການສໍ້ໂກງ, ຫຼອກລວງໃນສິນເຊື່ອ; ກໍານົດຊື່ລູກຄ້າ, ຢັ້ງຢືນລູກຄ້າໃນປະກັນໄພ ແລະໂທລະຄົມ... ແຕ່ປີ 2020 ມາຮອດປັດຈຸບັນ, ບໍລິການຢັ້ງຢືນ ແລະກໍານົດຊື່ເອເລັກໂຕນິກ Viettel eKYC ໄດ້ຮັບການປະມວນໃນລະບົບຂອງຫຼາຍວິສາຫະກິດ ເຊິ່ງໄດ້ຊ່ວຍຫຼຸດຜ່ອນເອກະສານກວ່າ 80% ແລະປະຢັດເວລາໄດ້ກວ່າ 70% ເພື່ອສໍາເລັດລະບຽບການ.
ນອກຈາກນີ້, Viettel eKYC ຍັງແມ່ນ platform ຢັ້ງຢືນຊີວະມິຕິຂອງແອັບ Viettel Money, ຊ່ວຍລູກຄ້າ 25 ລ້ານກວ່າຄົນເຮັດທຸລະກໍາການເງິນຢ່າງປອດໄພ.
ໂດຍ: ໄຊຊະນະ