ຊຸກຍູ້ການຮ່ວມມືດ້ານເສດຖະກິດ ແລະການຄ້າລະຫວ່າງຫວຽດນາມ ແລະ ການາດາ
ກປ.ອອນໄລ - ຕອນເຊົ້າວັນທີ 25 ມີນາ, ຢູ່ຮ່າໂນ້ຍ, ຄະນະກຳມະການແຫ່ງລັດກ່ຽວກັບຊາວຫວຽດນາມ ອາໄສຢູ່ຕ່າງປະເທດ (ກະຊວງການຕ່າງປະເທດ) ໄດ້ສົມທົບກັບສະມາຄົມນັກທຸລະກິດ ຫວຽດນາມ - ການາດາ (VCBA) ຈັດຕັ້ງ “ເວທີປາໄສດໍາເນີນທຸລະກິດ: ເພີ່ມທະວີການພົວພັນເສດຖະກິດຫວຽດນາມ - ການາດາ ໃນຂອບເຂດສັນຍາຄູ່ຮ່ວມມືຮອບດ້ານ ແລະກ້າວໜ້າຂ້າມປາຊີຟິກ (CPTPP).
ກ່າວຄຳເຫັນໄຂກອງປະຊຸມ, ທ່ານ ຫງວຽນແມ້ງດົງ ຮອງຫົວໜ້າຄະນະກຳມະການແຫ່ງລັດກ່ຽວກັບຊາວຫວຽດນາມ ອາໄສຢູ່ຕ່າງປະເທດ ໃຫ້ຮູ້ວ່າ: ໃນຊຸມປີຜ່ານມາ, ຄຽງຄູ່ກັບການເຕີບໃຫຍ່ເຂັ້ມແຂງ, ການຢັ້ງຢືນຖານະບົດບາດຂອງປະຊາຄົມຊາວຫວຽດນາມ ຢູ່ຕ່າງປະເທດນັ້ນ, ຖັນແຖວນັກທຸລະກິດຫວຽດນາມ ຢູ່ຕ່າງປະເທດກໍ່ພັດທະນາຢ່າງບໍ່ຢຸດຢັ້ງ.
|
|
ບັນດາຜູ້ແທນເຂົ້າຮ່ວມເວທີປາໄສ. ພາບ: ສໍານັກຂ່າວສານຫວຽດນາມ |
ຕີລາຄາສູງຫົວຂໍ້ຂອງເວທີປາໄສຄັ້ງນີ້, ທ່ານຮອງຫົວໜ້າ ຫງວຽນແມ້ງດົງ ຫວັງວ່າ ນີ້ຈະແມ່ນກາລະໂອກາດເພື່ອປະກອບສ່ວນໂດຍກົງເຂົ້າໃນການຫັນຄວາມສາມາດບົ່ມຊ້ອນ ແລະເປົ້າໝາຍຂອງສອງປະເທດໃນຂອບເຂດຄູ່ຮ່ວມມືຮອບດ້ານ ກໍ່ຄືສັນຍາ CPTPP ໃຫ້ປະກົດຜົນເປັນຈິງ.
ສະນັ້ນ, ເວທີປາໄສບໍ່ພຽງແຕ່ຊຸກຍູ້ການຮ່ວມມືດ້ານເສດຖະກິດ ແລະບັນດາກາລະໂອກາດເຊື່ອມຕໍ່, ການແລກປ່ຽນການຄ້າລະຫວ່າງວິສາຫະກິດ, ນັກທຸລະກິດຫວຽດນາມ ແລະການາດາ ເທົ່ານັ້ນ, ຫາກຍັງມີຄວາມໝາຍສຳຄັນສຳລັບປະຊາຄົມນັກທຸລະກິດ, ວິສາຫະກິດຂອງສອງຝ່າຍໃນການແບ່ງປັນຂໍ້ມູນຂ່າວສານທີ່ແທດຈິງກ່ຽວກັບສະພາບການຢູ່ຫວຽດນາມ ເຖິງປະຊາຄົມຊາວຫວຽດນາມ ຢູ່ການາດາ ແລະເພື່ອນມິດຄູ່ຮ່ວມມືຂອງການາດາ.
ທີ່ເວທີປາໄສ, ບັນດາຜູ້ແທນໄດ້ປຶກສາຫາລື, ແນະນຳຄວາມສາມາດບົ່ມຊ້ອນ ແລະກາລະໂອກາດອັນໃຫຍ່ຫຼວງໃນຂົງເຂດສົ່ງອອກຜະລິດຕະພັນຂອງຫວຽດນາມ ໄປຍັງຕະຫຼາດການາດາ ແລະອາເມລິກາເໜືອ (ຜ່ານປະເທດການາດາ). ຜູ້ແທນບາງຄົນໄດ້ແບ່ງປັນກາລະໂອກາດຮ່ວມມື, ຊຸກຍູ້ການສົ່ງອອກສິນຄ້າຈາກ ຫວຽດນາມ ໄປການາດາ ໃນບັນດາຂົງເຂດຄື: ກໍ່ສ້າງ, ຕໍ່າແຜ່ນຕັດຫຍິບ, ເກີບໜັງ, ເຄື່ອງເຟີນີເຈີ, ເຫຼັກກ້າ, ເຄື່ອງຈັກ, ອຸປະກອນໄຟຟ້າ...
ສະມາຄົມ VCBA ໄດ້ຮັບການສ້າງຕັ້ງໃນເດືອນ ຕຸລາ ປີ 2022 ພາຍໃຕ້ການຊີ້ນໍາ ແລະຮ່ວມເດີນທາງຂອງກົງສູນໃຫຍ່ຫວຽດນາມ ປະຈຳ Vancouver - ການາດາ ແນໃສ່ເຕົ້າໂຮມ, ເຊື່ອມຕໍ່ເຄືອຂ່າຍນັກທຸລະກິດຫວຽດນາມ ແລະ ການາດາ ທີ່ມີຄວາມມຸ່ງມາດປາດຖະໜາຢາກດໍາເນີນທຸລະກິດ, ລົງທຶນຢູ່ສອງປະເທດ ແລະປະກອບສ່ວນຊຸກຍູ້ການພົວພັນດ້ານເສດຖະກິດສອງຝ່າຍ.
ໂດຍ: ຈາງຫງວຽນ