ຫຼາຍຮູບການໂຄສະນາທີ່ອຸດົມສົມບູນກ່ຽວກັບການເລືອກຕັ້ງສະມາຊິກສະພາແຫ່ງຊາດ ຊຸດທີ XV

8 ພຶດສະພາ 2021 18:43

ກປ.ອອນໄລ - ຜ່ານຫຼາຍຮູບການໂຄສະນາທີ່ອຸດົມສົມບູນ ຄື: ພາບໂຄສະນາ, ປ້າຍໂຄສະນາ-ຄໍາຂວັນ, ແຜງໂຄສະນາ, ລົດໂຄສະນາເຄື່ອນທີ່, ງານວາງສະແດງພາບໂຄສະນາຂະໜາດໃຫຍ່... ນີ້ແມ່ນວຽກງານໂຄສະນາການເລືອກຕັ້ງສະມາຊິກສະພາແຫ່ງຊາດຊຸດທີ XV ແລະສະມາຊິກສະພາປະຊາຊົນ ທຸກຂັ້ນ ອາຍຸການ 2021-2026 ເຊິ່ງທຸກຂະແໜງການ, ທຸກຂັ້ນ ແລະທ້ອງຖິ່ນຕ່າງໆ ຈັດຕັ້ງປະຕິບັດ.

ທ່ານ ເລືອງດຶກຖັ໊ງ, ຮອງຫົວໜ້າກົມວັດທະນະທໍາຮາກຖານ (ກະຊວງວັດທະນະທໍາ, ກິລາ ແລະທ່ອງທ່ຽວຫວຽດນາມ) ໃຫ້ຮູ້ວ່າ, ເພື່ອແນໃສ່ໂຄສະນາໃຫ້ມີປະສິດທິຜົນ ແລະສ້າງບັນຍາກາດເບີກບານມ່ວນຊື່ນ, ສ້າງຄວາມເຊື່ອໝັ້ນໃຫ້ປະຊາຊົນຕໍ່ກັບເຫດການໃຫຍ່ຂອງປະເທດ, ກົມວັດທະນະທໍາຮາກຖານ ໄດ້ຜັນຂະຫຍາຍຈັດສົ່ງ 63 ແບບຮູບພາບໂຄສະນາທີ່ໄດ້ຄັດເລືອກມາຈາກການປະກວດພາບໂຄສະນາການເລືອກຕັ້ງສະມາຊິກສະພາແຫ່ງຊາດ ແລະສະມາຊິກສະພາປະຊາຊົນ ທຸກຂັ້ນ ອາຍຸການ 2021-2026 ໄປຍັງ 63 ແຂວງ, ນະຄອນ. ຜ່ານນັ້ນ, ບັນດາທ້ອງຖິ່ນ ໄດ້ຄັດເລືອກເອົາພາບໂຄສະນາເພື່ອມາວາງສະແດງ, ຈັດພິມເພື່ອໂຄສະນາດ້ວຍຫຼາຍຮູບການເປັນຕົ້ນແມ່ນການຕົບແຕ່ງ, ປະດັບປະດາຢູ່ຕາມຖະໜົນສາຍຕ່າງໆ; ຕໍ່ໜ້າສໍານັກງານ, ອົງການຕ່າງໆ; ລົດໂຄສະນາ.

ຕາມຜູ້ຕາງໜ້າພະແນກວັດທະນະທໍາ ແລະກິລາຮ່າໂນ້ຍແລ້ວ, ການເລືອກຕັ້ງສະມາຊິກສະພາແຫ່ງຊາດຊຸດທີ XV ແລະສະມາຊິກສະພາປະຊາຊົນທຸກຂັ້ນ ອາຍຸການ 2021-2026 ແມ່ນບັ້ນຂົນຂວາຍການເມືອງທີ່ສໍາຄັນ ແລະແມ່ນການດໍາເນີນຊີວິດທີ່ມີປະຊາທິປະໄຕຢ່າງເລິກເຊິ່ງກວ້າງຂວາງໃນໝູ່ປະຊາຊົນທຸກຊັ້ນວັນນະ. ເພື່ອກະກຽມໃຫ້ແກ່ເຫດການສໍາຄັນນີ້, ປັດຈຸບັນ, ຢູ່ຕາມຖະໜົນສາຍຕ່າງໆ ແລະຂົງເຂດທີ່ດໍາເນີນການເລືອກຕັ້ງຂອງນະຄອນຮ່າໂນ້ຍ, ທາງພະແນກວັດທະນະທໍາ ແລະກິລາ ໄດ້ຕົບແຕ່ງ, ປະດັບປະດາປ້າຍໂຄສະນາ, ປ້າຍຄຳຂວັນ, ທຸງຊາດ, ທຸງທິວແນໃສ່ໂຄສະນາ, ປຸກລະດົມ ເພື່ອໃຫ້ການເລືອກຕັ້ງບັນລຸໝາກຜົນສູງສຸດ, ກາຍເປັນວັນບຸນຂອງທົ່ວປວງຊົນ.

ພາບໂຄສະນາຂອງນັກແຕ້ມ ລຶວງອັກຟານ (ຮ່າໂນ້ຍ) ຍາດໄດ້ລາງວັນທີ 1 ໃນການປະກວດຮູບພາບໂຄສະນາການເລືອກຕັ້ງສະມາຊິກສະພາແຫ່ງຊາດຊຸດທີ XV ແລະການເລືອກຕັ້ງສະມາຊິກສະພາປະຊາຊົນ ທຸກຂັ້ນ ອາຍຸການ 2021-2026. ພາບ: qdnd.vn