ຮ່າໂນ້ຍ ສູ້ຊົນປີ 2021 ທັງໝົດ 382 ຕາແສງໃຫ້ບັນລຸມາດຕະຖານຊົນນະບົດໃໝ່
ກປ.ອອນໄລ - ປີ 2021, ນະຄອນຮ່າໂນ້ຍ ກໍານົດສືບຕໍ່ສ້າງໂຄງປະກອບຂະແໜງ ກະສິກຳຄືນໃໝ່ດ້ວຍການສືບຕໍ່ພັດທະນາຊົນນະບົດ, ກໍ່ສ້າງຊົນນະບົດໃໝ່; ສູ້ຊົນປີ 2021 ທັງໝົດ 382 ຕາແສງໃຫ້ບັນລຸມາດຕະຖານຊົນນະບົດໃໝ່, ມີ 20 ຕາແສງໃຫ້ບັນລຸການຍົກລະດັບມາດຕະຖານຊົນນະບົດໃໝ່ ແລະ 5 ຕາແສງໃຫ້ບັນລຸການເປັນແບບຢ່າງມາດຕະຖານຊົນນະບົດໃໝ່, 3 ເມືອງໃຫ້ບັນລຸມາດຕະຖານຊົນນະບົດໃໝ່ຕື່ມອີກ, ຍົກອັດຕາບັນລຸມາດຕະຖານຊົນນະບົດໃໝ່ໃຫ້ໄດ້ 72,2%; ລາຍຮັບຂອງຊາວກະສິກອນແມ່ນຈາກ 58 ລ້ານດົ່ງ/ຄົນ/ປີຂຶ້ນໄປ.
ພ້ອມກັນນັ້ນ, ຍູ້ແຮງການຜະລິດຕາມລະບົບຕ່ອງໂສ້ເຊື່ອມຕໍ່, ລະບົບຕ່ອງໂສ້ມູນຄ່າ, ຮູບແບບການນຳໃຊ້ກະສິກຳເຕັກໂນໂລຢີສູງ, ສ້າງຕັ້ງສູນ "ອຸດສາຫະກຳ - ບໍລິການຊົນນະບົດ" ແລະໂຮງງານປຸງແຕ່ງຜະລິດຕະພັນກະເສດ, ບັນດາຜະລິດຕະພັນມີບາໂຄ້ດ ເພື່ອຊອກຫາຕົ້ນກໍາເນີດທາງເອເລັກໂຕນິກ. ສູ້ຊົນໃຫ້ອັດຕາຜະລິດຕະພັນກະເສດໝູນໃຊ້ເຕັກໂນໂລຢີສູງ ກວ່າ 40%; ມູນຄ່າເພີ່ມໃນຂະແໜງກະສິກຳແມ່ນຫຼາຍກ່ວາ 4,2%.
|
|
ພາບປະກອບຈາກ vietnamnet.vn. |
ດ້ານອື່ນ, ເພີ່ມການສ້າງໂຄງປະກອບແນວພັນພືດທີ່ມີຜົນຜະລິດ, ມີສະມັດຕະພາບ ແລະມີຄຸນນະພາບສູງ, ພ້ອມກັນນັ້ນກໍ່ຈຳກັດພື້ນທີ່ດິນທີ່ຖືກປະຖິ້ມເປົ່າຫວ່າງ ແລະຂຸດຄົ້ນເນື້ອທີ່ດິນຢູ່ຕາມແຄມແມ່ນໍ້າຢ່າງມີປະສິດທິຜົນ. ພັດທະນາການລ້ຽງສັດດ້ວຍການນໍາໃຊ້ແນວພັນທີ່ມີຜົນຜະລິດ, ມີສະມັດຕະພາບ ແລະມີຄຸນນະພາບສູງຕິດພັນກັບຄວາມປອດໄພທາງສະບຽງອາຫານ ແລະໂລກລະບາດ. ປະຕິບັດການຫັນປ່ຽນເຂດດິນທີ່ເປັນບວກເປັນຂຸມ ແລະຕໍ່າໄປເປັນຮູບແບບການປູກເຂົ້າ - ລ້ຽງປາ; ເນື້ອທີ່ປູກລ້ຽງມີປະມານ 24.000 ເຮັກຕາ, ໃນນັ້ນເນື້ອທີ່ກະສິກຳແມ່ນກວມເອົາຫຼາຍກວ່າ 50%, ປະລິມານການຜະລິດ 124 ພັນໂຕນ. ນອກຈາກນັ້ນ, ກໍ່ປະຕິບັດໂຄງການ “ຮ່ວມສໍາພັນ 4 ເຮືອນ”, ຍູ້ແຮງການບໍລິໂພກອຸປະໂພກຜະລິດຕະພັນກະເສດຜ່ານສັນຍາໃຫ້ເປັນຢ່າງດີ; ສ້າງເຄືອຂ່າຍຕະຫລາດຂາຍຍົກ ແລະຕະຫລາດຊົນນະບົດ.
ໂດຍ: ທະນາພອນ