ນັກຂ່າວ: ຂໍຮຽນທ່ານຮອງລັດຖະມົນຕີ ຂໍທ່ານໃຫ້ຮູ້ຜົນຂອງກອງປະຊຸມສຸດຍອດ GMS ຄັ້ງທີ 8, ກອງປະຊຸມສຸດຍອດ ACMECS ຄັ້ງທີ 10 ແລະ ກອງປະຊຸມສຸດຍອດ CLMV ຄັ້ງທີ 11?

ທ່ານຮອງລັດຖະມົນຕີ ຟ້າມແທັງບິ່ງ: ໂດຍແມ່ນບັນດາເຫດການທີ່ມີຄວາມໝາຍສຳຄັນພິເສດຕໍ່ການຮ່ວມມືອະນຸພາກພື້ນແມ່ນ້ຳຂອງ, ກອງປະຊຸມສຸດຍອດ GMS ຄັ້ງທີ 8, ກອງປະຊຸມສຸດຍອດ ACMECS ຄັ້ງທີ 10 ແລະ ກອງປະຊຸມສຸດຍອດ CLMV ຄັ້ງທີ 11 ໄດ້ຮັບຜົນສຳເລັດຢ່າງຈົບງາມ. ທີ່ກອງປະຊຸມຕ່າງໆ, ບັນດາການນຳໄດ້ກຳນົດ 3 ທິດທາງສຳຄັນໃຫ້ການຮ່ວມມືອະນຸພາກພື້ນ.

ທີໜຶ່ງ, ນຳການຮ່ວມມືອະນຸພາກພື້ນແມ່ນ້ຳຂອງເຂົ້າຂະບວນການພັດທະນາຂອງໂລກ. ກຳນົດອະນາຄົດຂອງບັນດາປະເທດແມ່ນ້ຳຂອງແມ່ນຕິດພັນກັບຄວາມສາມາດປ່ຽນແປງໃໝ່ປະດິດສ້າງ, ການປະຕິວັດ ອຸດສາຫະກຳ 4.0, ຄວາມຄືບໜ້າດ້ານວິທະຍາສາດ ແລະເຕັກໂນໂລຊີ, ບັນດາກອງປະຊຸມຢັ້ງຢືນການຮ່ວມມື GMS, ACMECS ແລະ CLMV ຕ້ອງວາງຈຸດສຸມເຂົ້າໃນການຫັນເປັນດີຈີຕອນ, ຍົກສູງຄວາມສາມາດປ່ຽນແປງໃໝ່ປະດິດສ້າງຂອງສະມາຊິກ ແລະສ້າງຂອບນະໂຍບາຍທີ່ເໝາະສົມ.

ທີສອງ, ເພີ່ມທະວີກຳລັງແຮງພາຍໃນຂອງບັນດາພື້ນຖານເສດຖະກິດ. ດ້ວຍເປົ້າໝາຍຍົກສູງກຳລັງບົ່ມຊ້ອນ ແລະຄວາມສາມາດຂອງບັນດາພື້ນຖານເສດຖະກິດ, ຂອບການຮ່ວມມື GMS, ACMECS, CLMV ຕ້ອງໃຫ້ບຸລິມະສິດແກ່ການຊຸກຍູ້ການຫັນເປັນອຸດສາຫະກຳ, ທັນສະໄໝ, ພັດທະນາຂະແໜງອຸດສາຫະກຳຜະລິດ ແລະໂຄງປະກອບພື້ນຖານໂຄງລ່າງລວມທັງການຄົມມະນາຄົມ, ພະລັງງານ ແລະໂທລະຄົມມະນາຄົມ, ການພັດທະນາຊັບພະຍາກອນມະນຸດ; ສຸມໃສ່ເພີ່ມທະວີການເຊື່ອມຈອດດ້ານເສດຖະກິດ ເພື່ອເປີດກວ້າງ ຂອບຂະໜາດ, ມຸ່ງໄປເຖິງອະນຸພາກພື້ນສະໜິດຕິດພັນ ແລະພັດທະນາ.

ທີສາມ, ປັບປຸງຄວາມສາມັກຄີ ແລະຄວາມສະໜິດຕິດພັນລະຫວ່າງບັນດາປະເທດສະມາຊິກ ເພື່ອພ້ອມກັນຮັບມືກັບບັນດາສິ່ງທ້າທາຍລວມ. ດ້ວຍທັດສະນະທີ່ວ່າ “ຢາກໄປໄກຕ້ອງໄປພ້ອມກັນ”, ບັນດາການນຳໄດ້ຢືນຢັນການພົວພັນຮ່ວມມືມິດຕະພາບ ແລະຄວາມສາມັກຄີລະຫວ່າງບັນດາປະເທດສະມາຊິກ; ໄດ້ເຫັນດີເປັນເອກະສັນພ້ອມກັນປະຕິບັດຄວາມຄາດຫວັງລວມ ແລະວິໄສທັດລວມກ່ຽວກັບອະນາຄົດທີ່ສົດໃສດ້ວຍຄວາມຕັດສິນໃຈລວມ, ທັດສະນະລວມ ແລະການກະທຳລວມ. ສາມັກຄີ ແລະຮ່ວມມືຂະຫຍາຍໄປທົ່ວອາຊຽນ ແລະກັບບັນດາຄູ່ຮ່ວມພັດທະນາໃນທົ່ວໂລກ ເພື່ອເພີ່ມກຳລັງແຮງ ແລະແຜ່ຂະຫຍາຍຜົນປະໂຫຍດ.

leftcenterrightdel
ທ່ານນາຍົກລັດຖະມົນຕີ ຟ້າມມິງຈິ໊ງ ກ່າວຄຳເຫັນທີ່ກອງປະຊຸມສຸດຍອດການຮ່ວມມືອະນຸພາກພື້ນແມ່ນ້ຳຂອງເປີດກວ້າງ (GMS) ຄັ້ງທີ 8. ພາບ: dangcongsan.vn

3 ກອງປະຊຸມ ໄດ້ຮັບຮອງເອົາເອກະສານສຳຄັນຫຼາຍສະບັບ ເຊັ່ນ: ຍຸດທະສາດປ່ຽນແປງໃໝ່ປະດິດສ້າງ ເພື່ອພັດທະນາ GMS ຮອດປີ 2030 ແລະຖະແຫຼງການຮ່ວມຂອງບັນດາການນໍາຮ່ວມມື GMS, ACMECS ແລະ CLMV. ບັນດາການນຳໄດ້ມອບໝາຍໃຫ້ບັນດາລັດຖະມົນຕີ, ເຈົ້າໜ້າອະວຸໂສ ແລະນັກຊ່ຽວຊານ ເພື່ອສ້າງ ແລະຜັນຂະຫຍາຍບັນດາໂຄງການ ແລະລາຍການແທດຈິງ ແລະມີລັກສະນະເປັນໄປສູງໃນບັນດາຂົງເຂດຮ່ວມມືບຸລິມະສິດ.

ເນື່ອງໃນໂອກາດນີ້, ທ່ານນາຍົກລັດຖະມົນຕີ ຟ້າມມິງຈິ໊ງ ໄດ້ມີການປຶກສາຫາລືຢ່າງເລິກເຊິ່ງກວ້າງຂວາງກັບຄູ່ຕໍາແໜ່ງ ລາວ ແລະກຳປູເຈຍ ກ່ຽວກັບບັນດາມາດຕະການຊຸກຍູ້ການຮ່ວມມື 2 ຝ່າຍ ແລະ 3 ປະເທດໃນໄລຍະພັດທະນາໃໝ່. ການນຳຂັ້ນສູງຂອງ 3 ປະເທດໄດ້ເຫັນດີເປັນເອກະສັນຍູ້ແຮງການຜັນຂະຫຍາຍບັນດາຂົງເຂດຮ່ວມມືຍຸດທະສາດກ່ຽວກັບພື້ນຖານໂຄງລ່າງ, ການເຊື່ອມຕໍ່ຄົມມະນາຄົມ, ພະລັງງານ, ການເງິນ ແລະ ການພົບປະແລກປ່ຽນປະຊາຊົນ.

ນັກຂ່າວ: ທ່ານສາມາດແບ່ງປັນກ່ຽວກັບການປະກອບສ່ວນອັນພົ້ນເດັ່ນຂອງຫວຽດນາມ ທີ່ກອງປະຊຸມໄດ້ບໍ?

ທ່ານຮອງລັດຖະມົນຕີ ຟ້າມແທັງບິ່ງ: ດ້ວຍແຜນການເຄື່ອນໄຫວເຕັມ ແລະຕໍ່ເນື່ອງໃນໄລຍະ 3 ວັນເຄິ່ງ, ທ່ານນາຍົກລັດຖະມົນຕີ ຟ້າມມິງຈິ໊ງ ພ້ອມດ້ວຍຄະນະໄດ້ຢືນຢັນຄວາມເປັນເຈົ້າການ, ຕັ້ງໜ້າ ແລະມີຄວາມຮັບຜິດຊອບຂອງຫວຽດນາມໃນການປະກອບສ່ວນກໍ່ສ້າງອະນຸພາກພື້ນແມ່ນ້ຳຂອງ, ພ້ອມທັງປະກອບສ່ວນປັບປຸງ ການພົວພັນຮ່ວມມືມິດຕະພາບກັບປະເທດເຈົ້າພາບຈີນ ແລະຄູ່ຮ່ວມມື. ການປະກອບສ່ວນອັນພົ້ນເດັ່ນຂອງຫວຽດນາມ ໄດ້ສະແດງໃຫ້ເຫັນຜ່ານ 3 ຈຸດຄືດັ່ງລຸ່ມນີ້:

ທີໜຶ່ງແມ່ນ, ມີຂໍ້ສັງເກດຢ່າງຊັດເຈນ ແລະທັນການກ່ຽວກັບລັກສະນະຈຳເພາະພົ້ນເດັ່ນຂອງສະພາບແວດລ້ອມແຫ່ງການພັດທະນາ ແລະບັນດາທ່າອ່ຽງໃຫຍ່, ຈາກນັ້ນຊ່ວຍກໍານົດບົດບາດ ແລະພາລະກຳຂອງແຕ່ລະກົນໄກໃນສັງກາດໃໝ່.

ທີສອງແມ່ນ, ຊີ້ອອກບັນດາຫຼັກການ ແລະທິດນຳສຳຄັນເພື່ອຊຸກຍູ້ການຮ່ວມມືຢ່າງໃຫ້ມີປະສິດທິຜົນກວ່າ ແລະຕອບສະໜອງຄວາມຮຽກຮ້ອງຕ້ອງການຂອງສະມາຊິກໃຫ້ດີກວ່າ.

ທີສາມແມ່ນ, ຫວຽດນາມ ໄດ້ປະກອບສ່ວນຢ່າງລະອຽດ ແລະແທດຈິງໃຫ້ບັນດາກົນໄກຮ່ວມມື. ທີ່ກອງປະຊຸມ, ທ່ານນາຍົກລັດຖະມົນຕີ ປະກາດວ່າ ຫວຽດນາມ ຈະປະກອບ 10 ລ້ານໂດລາສະຫະລັດໃຫ້ແກ່ກອງທຶນພັດທະນາ ACMECS ແລະສືບຕໍ່ຜັນຂະຫຍາຍລາຍການທຶນສຶກສາ, ຮັບນັກສຶກສາຈາກກຳປູເຈຍ, ລາວ, ມຽນມາ ມາຮ່ຳຮຽນ ແລະຄົ້ນຄວ້າຢູ່ ຫວຽດນາມ.

ນັກຂ່າວ:  ບັນດາການເຄື່ອນໄຫວຂອງທ່ານນາຍົກລັດຖະມົນຕີ ຟ້າມມິງຈິ໊ງ ກັບ ສປ ຈີນ ມີໝາກຜົນຄືແນວໃດ, ຂໍຮຽນທ່ານຮອງລັດຖະມົນຕີ?

ທ່ານຮອງລັດຖະມົນຕີ ຟ້າມແທັງບິ່ງ: ໃນການຢ້ຽມຢາມໄປປະຕິງານຄັ້ງນີ້, ທ່ານນາຍົກລັດຖະມົນຕີ ຟ້າມມິງຈິ໊ງ ມີລາຍການເຮັດວຽກທີ່ອຸດົມສົມບູນ, ດ້ວຍ 19 ການເຄື່ອນໄຫວສອງຝ່າຍ. ທີ່ການເຈລະຈາ ແລະພົບປະແລກປ່ຽນ, ສອງຝ່າຍໄດ້ບັນລຸຄວາມຮັບຮູ້ລວມທີ່ສຳຄັນກ່ຽວກັບການສືບຕໍ່ຜັນຂະຫຍາຍ, ຫັນຄວາມຮັບຮູ້ຮ່ວມຂັ້ນສູງເປັນລະອຽດ, ຊຸກຍູ້ການພົວພັນລະຫວ່າງຫວຽດນາມ ກັບຈີນ, ໃນນັ້ນມີ ບັນດາທ້ອງຖິ່ນຂອງຈີນ, ນັບມື້ນັບພັດທະນາຢ່າງມີປະສິດທິຜົນ, ແທດຈິງ ແລະຍືນຍົງ, ໄດ້ສະແດງໃຫ້ເຫັນຢ່າງຈະແຈ້ງໃນ 4 ດ້ານ:

ທີໜຶ່ງແມ່ນ, ເພີ່ມທະວີຄວາມໄວ້ເນື້ອເຊື່ອໃຈດ້ານການເມືອງລະຫວ່າງສອງຝ່າຍ, ເສີມຂະຫຍາຍບົດບາດກໍານົດທິດສຳຄັນຕໍ່ການພັດທະນາການພົວພັນສອງຝ່າຍ.

ທີສອງແມ່ນ, ສືບຕໍ່ເຮັດໃຫ້ການຮ່ວມມືແທດຈິງໃນທຸກຂົງເຂດຢ່າງເລິກເຊິ່ງ, ປັບປຸງພື້ນຖານດ້ານວັດຖຸໃຫ້ແກ່ການພົວພັນສອງຝ່າຍ.

ທີສາມແມ່ນ, ເພີ່ມທະວີການພົບປະແລກປ່ຽນປະຊາຊົນ, ປັບປຸງພື້ນຖານສັງຄົມຂອງການພົວພັນຂອງສອງປະເທດກວ່າອີກ.

ທີສີ່, 2 ຝ່າຍເຫັນດີຄວບຄຸມຄວາມບໍ່ລົງລອຍກັນໃຫ້ດີ, ບໍ່ໃຫ້ສົ່ງພົມສະທ້ອນເຖິງການພົວພັນອັນດີງາມລະຫວ່າງສອງພັກ ແລະ 2 ປະເທດ. ພ້ອມກັນນັ້ນ, ສົມທົບກັນຢ່າງແໜ້ນແຟ້ນໃນວຽກງານຄຸ້ມຄອງ ແລະ ປົກປັກຮັກສາຊາຍແດນຕາມ ເອກະສານ 3 ສະບັບກ່ຽວກັບຊາຍແດນທາງບົກ ແລະບັນດາຂໍ້ຕົກລົງທີ່ກ່ຽວຂ້ອງ, ສົມທົບກັນຈັດຕັ້ງບັນດາກິດຈະກຳເຄື່ອນໄຫວສະເຫຼີມສະຫຼອງ 25 ປີແຫ່ງວັນເຊັນສົນທິສັນຍາວ່າດ້ວຍຊາຍແດນທາງບົກ ແລະ 15 ປີແຫ່ງວັນເຊັນເອກະສານນິຕິກຳ 3 ສະບັບ ວ່າດ້ວຍຊາຍແດນທາງບົກໃນປີ 2024.

ນັກຂ່າວ: ຂໍຂອບໃຈທ່ານຮອງລັດຖະມົນຕີ!

ໂດຍ: ທະນາພອນ