ຫວຽດນາມ-ລາວ ປັບປຸງນໍ້າໃຈມິດຕະພາບ ແລະການຮ່ວມມືຮອບດ້ານ

ທ່ານ ຫງວຽນມິງເຕິມ ເອກອັກຄະລັດຖະທູດຫວຽດນາມ ປະຈໍາ ລາວ ຖ່າຍຮູບພ້ອມກັບຜູ້ແທນ. ພາບ: ສໍານັກຂ່າວສານຫວຽດນາມ

ທ່ານ ຫງວຽນມິງເຕິມ ເອກອັກຄະລັດຖະທູດຫວຽດນາມ ປະຈໍາ ລາວ ເຂົ້າຮ່ວມ ແລະແບ່ງປັນກ່ຽວກັບຄວາມໝາຍປະຫວັດສາດ, ຜົນງານ 80 ປີແຫ່ງການພັດທະນາປະເທດຊາດ ແລະສາຍພົວພັນແບບພິເສດ ຫວຽດນາມ-ລາວ. ເຂົ້າຮ່ວມເຫດການມີທ່ານນາງ ວິລະວອນ ພັນທະວົງ, ຮອງຫົວໜ້າຄະນະໂຄສະນາອົບຮົມສູນກາງພັກປະຊາຊົນປະຕິວັດລາວ; ການນໍາບັນດາຫົວໜ່ວຍຂຶ້ນກັບພ້ອມດ້ວຍຜູ້ຕາງໜ້າບັນດາກະຊວງ, ຂະແໜງການ ແລະອົງການທີ່ກ່ຽວຂ້ອງຂອງລາວ ເປັນຈໍານວນຫຼວງຫຼາຍ.

ທ່ານ ຫງວຽນມິງເຕິມ, ເອກອັກຄະລັດຖະທູດຫວຽດນາມ ປະຈໍາ ລາວ ແບ່ງປັນທີ່ເຫດການກ່ຽວກັບຄວາມໝາຍປະຫວັດສາດຂອງການປະຕິວັດເດືອນສິງຫາ ແລະວັນຊາດ ສສ ຫວຽດນາມ, ໝາກຜົນຂອງຫວຽດນາມ ພາຍຫຼັງ 80 ປີ, ພິເສດແມ່ນພາຍຫຼັງເກືອບ 40 ປີແຫ່ງການປ່ຽນແປງໃໝ່. ພາບ: ສໍານັກຂ່າວສານຫວຽດນາມ

ທີ່ເຫດການ, ທ່ານເອກອັກຄະລັດຖະທູດ ຫງວຽນມິງເຕິມ ເນັ້ນໜັກເຖິງມູນເຊື້ອຄຽງບ່າຄຽງໄຫຼ່ຂອງສອງພັກ, ສອງຊາດໃນທຸກສະຖານະການ, ປະກອບສ່ວນເພີ່ມພູນຄູນສ້າງນໍ້າໃຈມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະການຮ່ວມມືຮອບດ້ານຫວຽດນາມ-ລາວ. ທ່ານຢໍ້າຄືນຂີດໝາຍປະຫວັດສາດອັນສໍາຄັນ, ຈາກໄຊຊະນະການປະຕິວັດເດືອນສິງຫາ, ໄຊຊະນະໃນການຕໍ່ສູ້ຕ້ານພວກລ່າເມືອງຂຶ້ນ, ຈັກກະພັດ ຈົນຮອດຜົນການປ່ຽນແປງໃໝ່ນັບແຕ່ປີ 1986 ແລະທີ່ຕັ້ງຂອງຫວຽດນາມໃນປະຈຸບັນ ແມ່ນໜຶ່ງໃນບັນດາພື້ນຖານເສດຖະກິດ ທີ່ຂະຫຍັນຂັນເຄື່ອນແຖວໜ້າຂອງພາກພື້ນ, ດ້ວຍສາຍພົວພັນການຕ່າງປະເທດທີ່ເປີດເຜີຍ.

ຜູ້ແທນເຂົ້າຮ່ວມເຫດການ. ພາບ: ສໍານັກຂ່າວສານຫວຽດນາມ

ທ່ານເອກອັກຄະລັດຖະທູດ ຫງວຽນມິງເຕິມ ເນັ້ນໜັກວ່າ “ຊັບສົມບັດອັນລໍ້າຄ່າ” ແມ່ນສາຍພົວພັນຫວຽດນາມ-ລາວ ໂດຍປະທານ ໂຮ່ຈີມິນ, ປະທານ ໄກສອນ ພົມວິຫານ ແລະປະທານ ສຸພານຸວົງ ທຸ້ມເທເຫື່ອແຮງເພີ່ມພູນຄູນສ້າງ, ການນໍາລຸ້ນຕ່າງໆ ແລະປະຊາຊົນສອງປະເທດສືບຕໍ່ຮັກສາໄວ້. ໃນສະພາບການພາກພື້ນ ແລະໂລກມີການຜັນແປ, ສອງຝ່າຍຄວນເພີ່ມທະວີການຮ່ວມມືໃນການໂຄສະນາ, ສຶກສາອົບຮົມກ່ຽວກັບມູນເຊື້ອ, ເສດຖະກິດ, ການຄ້າ, ການລົງທຶນ, ວັດທະນະທໍາ ແລະຮັກສາສັນຕິພາບ, ສະຖຽນລະພາບ, ການພັດທະນາແບບຍືນຍົງ.

ທ່ານນາງ ວິລະວອນ ພັນທະວົງ, ຮອງຫົວໜ້າຄະນະໂຄສະນາອົບຮົມສູນກາງພັກປະຊາຊົນປະຕິວັດລາວ ມອບດອກໄມ້ຂອບໃຈທ່ານເອກອັກຄະລັດຖະທູດ ຫງວຽນມິງເຕິມ ກ່ຽວກັບຂໍ້ມູນຂ່າວສານທີ່ໄດ້ແບ່ງປັນທີ່ເຫດການ. ພາບ: ສໍານັກຂ່າວສານຫວຽດນາມ

ການໂອ້ລົມສົນທະນາສິ້ນສຸດລົງໃນບັນຍາກາດມິດຕະພາບທີ່ເຕັມໄປດ້ວຍນໍ້າໃຈສະຫາຍ, ປັບປຸງຄວາມໄວ້ເນື້ອເຊື່ອໃຈ ແລະຄວາມສະໜິດຕິດພັນລະຫວ່າງສອງພັກ, ສອງລັດ ແລະປະຊາຊົນສອງປະເທດ ຫວຽດນາມ-ລາວ.

ໂດຍ: ທູຈາງ