ທ່ານ ທອງລຸນ ສີສຸລິດ ເລຂາທິການໃຫຍ່, ປະທານປະເທດລາວ ໄດ້ຊົມເຊີຍ ແລະຕີລາຄາສູງທ່ານ ຫງວຽນຊວນຖັງ ແລະຄະນະຜູ້ແທນພັກກອມມູນິດຫວຽດນາມ ມາຢ້ຽມຢາມລາວ ແລະເຂົ້າຮ່ວມກອງປະຊຸມສໍາມະນາທິດສະດີລະຫວ່າງ 2 ພັກ ຄັ້ງທີ XI. ທ່ານ ທອງລຸນ ສີສຸລິດ ເຊື່ອໝັ້ນວ່າ ພາຍໃຕ້ການນຳພາຂອງພັກກອມມູນິດຫວຽດນາມ, ປະຊາຊົນຫວຽດນາມ ຈະສືບຕໍ່ຍາດໄດ້ຜົນງານໃໝ່ຫຼາຍຢ່າງ, ບັນລຸໄດ້ບັນດາເປົ້າໝາຍທີ່ໄດ້ວາງອອກ ເພື່ອແນໃສ່ປະຕິບັດມະຕິກອງປະຊຸມໃຫຍ່ຄັ້ງທີ XIII ຂອງພັກ ຢ່າງມີໄຊ, ກໍຄືຈັດຕັ້ງກອງປະຊຸມໃຫຍ່ ຄັ້ງທີ XIV ຂອງພັກ ເປັນຢ່າງດີ.

leftcenterrightdel
ທ່ານ ທອງລຸນ ສີສຸລິດ ເລຂາທິການໃຫຍ່, ປະທານປະເທດລາວ ຕ້ອນຮັບທ່ານ ຫງວຽນຊວນຖັງ, ກຳມະການກົມການເມືອງ, ຫົວໜ້າສະຖາບັນການເມືອງແຫ່ງຊາດໂຮ່ຈີມິນ, ປະທານສະພາທິດສະດີສູນກາງ. ພາບ: qdnd.vn

ທ່ານ ຫງວຽນຊວນຖັງ ເຊື່ອໝັ້ນວ່າ ພາຍໃຕ້ການນຳພາຂອງພັກປະຊາຊົນປະຕິວັດລາວ, ປະເທດ ແລະປະຊາຊົນລາວ ຈະສືບຕໍ່ບັນລຸໄດ້ຜົນງານໃໝ່ຫຼາຍຢ່າງ, ໃຫຍ່ຫຼວງກວ່າອີກໃນພາລະກິດແຫ່ງການປ່ຽນແປງໃໝ່, ປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກປະຊາຊົນປະຕິວັດລາວ ຢ່າງມີໄຊ.

ທ່ານ ຫງວຽນຊວນຖັງ ຢືນຢັນວ່າ ສອງພັກເວົ້າລວມ ແລະສອງສະພາທິດສະດີສູນກາງຂອງສອງພັກເວົ້າສະເພາະ ຈະສືບຕໍ່ສົມທົບກັນຢ່າງແໜ້ນແຟ້ນ, ເພີ່ມທະວີການແລກປ່ຽນຂໍ້ມູນຂ່າວສານທິດສະດີ, ແບ່ງປັນບົດຮຽນໃນວຽກງານຄົ້ນຄວ້າທິດສະດີ, ສະຫຼຸບພາກປະຕິບັດ, ປະກອບສ່ວນປະຕິບັດມະຕິກອງປະຊຸມໃຫຍ່ຂອງແຕ່ລະພັກຢ່າງມີໄຊ ກໍຄືກະກຽມຈັດຕັ້ງກອງປະຊຸມໃຫຍ່ທຸກຂັ້ນໃຫ້ສຳເລັດ ກ້າວໄປເຖິງກອງປະຊຸມໃຫຍ່ ຄັ້ງທີ XIV ຂອງພັກກອມມູນິດຫວຽດນາມ ແລະກອງປະຊຸມໃຫຍ່ ຄັ້ງທີ XII ຂອງພັກປະຊາຊົນປະຕິວັດລາວ.

ທ່ານເລຂາທິການໃຫຍ່, ປະທານປະເທດລາວ ສະແດງຄວາມເອົາໃຈໃສ່ ແລະຕີລາຄາສູງຕໍ່ຫົວຂໍ້ຂອງກອງປະຊຸມສຳມະນາທິດສະດີລະຫວ່າງສອງພັກ; ເຊື່ອໝັ້ນວ່າ ໝາກຜົນຂອງກອງປະຊຸມສໍາມະນາຄັ້ງນີ້ ຈະຊ່ວຍໃຫ້ບັນດາອົງການຄົ້ນຄວ້າທິດສະດີຂອງຫວຽດນາມ ແລະລາວ ໃນວຽກງານເປັນເສນາທິການໃຫ້ການນຳພັກ, ລັດ ກ່ຽວກັບການວາງແນວທາງ, ແຜນນະໂຍບາຍ, ນະໂຍບາຍ ກໍຄືໃນການຊີ້ນຳຕົວຈິງກ່ຽວກັບບັນຫາກໍ່ສ້າງພື້ນຖານເສດຖະກິດເອກະລາດ, ເປັນເຈົ້າຕົນເອງໃນສະພາບເຊື່ອມໂຍງເຂົ້າກັບສາກົນຢ່າງເລິກເຊິ່ງກວ້າງຂວາງ.

ໂດຍ: ຈາງຫງວຽນ