ຄະນະພະນັກງານແມ່ຍິງກອງທັບປະຊາຊົນລາວ ຢ້ຽມຢາມ, ພົບປະແລກປ່ຽນຢູ່ກອງພົນນ້ອຍລົດຕັງ 201

ບັນຍາກາດທີ່ການພົບປະແລກປ່ຽນ. ພາບ: qdnd.vn

ຕ້ອນຮັບ ແລະເຮັດວຽກກັບຄະນະມີທ່ານພັນເອກພິເສດ ນາງ ຫງວຽນທິ ທູຮ່ຽນ, ຫົວໜ້າຫ້ອງການສະຫະພັນແມ່ຍິງກອງທັບ, ກົມໃຫຍ່ການເມືອງກອງທັບປະຊາຊົນຫວຽດນາມ; ທ່ານພັນເອກພິເສດ ໂດ໋ຮ່າຮວ່ານ, ຮອງຫົວໜ້າຫ້ອງການເມືອງເຫຼົ່າຮົບລົດຕັງ-ຍານເກາະ; ການນໍາບັນດາພະແນກ, ຂະແໜງການທີ່ກ່ຽວຂ້ອງຂອງກອງບັນຊາການເຫຼົ່າຮົບ; ການນໍາກອງພົນນ້ອຍລົດຕັງ 201, ປະທານສະຫະພັນແມ່ຍິງຮາກຖານບັນດາອົງການ, ກົມກອງໃນເຫຼົ່າຮົບ.

ຄະນະພະນັກງານແມ່ຍິງກອງທັບປະຊາຊົນລາວ ມອບຂອງຂວັນເປັນທີ່ລະນຶກໃຫ້ການນໍາກອງພົນນ້ອຍລົດຕັງ 201. ພາບ: qdnd.vn

ທີ່ການເຮັດວຽກ, ຄະນະພະນັກງານແມ່ຍິງກອງທັບປະຊາຊົນລາວ ໄດ້ຮັບຟັງການນໍາກົມການເມືອງ, ການນໍາກອງພົນນ້ອຍ ແນະນໍາໂດຍສັງເຂບກ່ຽວກັບ 65 ປີແຫ່ງການກໍ່ສ້າງ, ສູ້ຮົບ ແລະເຕີບໃຫຍ່ຂະຫຍາຍຕົວຂອງທະຫານລົດຕັງ-ຍານເກາະ, ປະຫວັດຄວາມເປັນມາ, ມູນເຊື້ອຂອງກອງພົນນ້ອຍລົດຕັງ 201, ຂີດໝາຍພົ້ນເດັ່ນໃນວຽກງານແມ່ຍິງ ແລະຂະບວນການແມ່ຍິງຂອງເຫຼົ່າຮົບ, ບັນດາຮູບແບບໃໝ່, ວິທີເຮັດທີ່ມີຫົວຄິດປະດິດສ້າງ, ການເຄື່ອນໄຫວພົ້ນເດັ່ນຂອງແມ່ຍິງກອງພົນນ້ອຍ.

ຜູ້ແທນຖ່າຍຮູບລວມ. ພາບ: qdnd.vn

ກ່າວຄໍາເຫັນທີ່ການເຮັດວຽກ, ທ່ານພົນຈັດຕະວານາງ ໄພວອນ ອິນທະບຸດ ໄດ້ຂອບໃຈຕໍ່ການຕ້ອນຮັບອັນອົບອຸ່ນ ແລະສົມກຽດຂອງເຫຼົ່າຮົບ ແລະການນໍາກົມກອງ, ພ້ອມທັງປາດຖະໜາວ່າ ແມ່ຍິງກອງທັບສອງປະເທດ ເວົ້າລວມ, ເວົ້າສະເພາະແມ່ນແມ່ຍິງກອງທັບປະຊາຊົນລາວ ແລະເຫຼົ່າຮົບລົດຕັງ-ຍານເກາະ ຈະສືບຕໍ່ແລກປ່ຽນ, ແບ່ງປັນບົດຮຽນເພື່ອໃຫ້ການເຄື່ອນໄຫວວຽກງານແມ່ຍິງໄດ້ຮັບການເສີມຂະຫຍາຍ, ເຂົ້າສູ່ລວງເລິກ, ແທດຈິງ, ບັນລຸໄດ້ຜົນງານຫຼາຍຢ່າງໃນໄລຍະຈະມາເຖິງ, ຕອບສະໜອງຄວາມຮຽກຮ້ອງຕ້ອງການຂອງໜ້າທີ່ໃນສະພາບການໃໝ່. 

ຄະນະພະນັກງານແມ່ຍິງກອງທັບປະຊາຊົນລາວ ລົງເບິ່ງຕົວຈິງຮູບແບບ “ຕໍ່ກໍາລັງແຮງຢູ່ສະໜາມຫັດແອບ” ຂອງສະຫະພັນແມ່ຍິງ ກອງພົນນ້ອຍລົດຕັງ 201. ພາບ: qdnd.vn

ທີ່ກົມກອງ, ຄະນະໄດ້ຢ້ຽມຊົມຫ້ອງມູນເຊື້ອຂອງກອງພົນນ້ອຍ; ເຂດເພີ່ມພູນຜະລິດຜົນ; ລົງເບິ່ງຕົວຈິງຮູບແບບ “ຕໍ່ກໍາລັງແຮງຢູ່ສະໜາມຫັດແອບ” ຂອງແມ່ຍິງກົມກອງ; ພົບປະແລກປ່ຽນສິລະປະວັດທະນະທໍາ, ແຂ່ງຂັນກິລາມິດຕະພາບ ແລະແລກປ່ຽນບົດຮຽນການເຄື່ອນໄຫວວຽກງານແມ່ຍິງລະຫວ່າງກອງພົນນ້ອຍລົດຕັງ 201 ແລະຄະນະພະນັກງານແມ່ຍິງກອງທັບປະຊາຊົນລາວ. ນີ້ແມ່ນການເຄື່ອນໄຫວທີ່ມີຄວາມໝາຍ, ຜ່ານນັ້ນປະກອບສ່ວນຍົກສູງລະດັບຄວາມຮູ້, ທັກສະວຽກງານວິຊາສະເພາະໃຫ້ແກ່ຖັນແຖວພະນັກງານແມ່ຍິງທຸກຂັ້ນໃນເຫຼົ່າຮົບ; ເພີ່ມທະວີການພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດ ແລະການຮ່ວມມືຮອບດ້ານລະຫວ່າງກະຊວງປ້ອງກັນປະເທດຫວຽດນາມ ແລະກະຊວງປ້ອງກັນປະເທດ ລາວ.

ໂດຍ: ໄຊຊະນະ