ກອງປະຊຸມປຶກສາຫາລືດ້ານການເມືອງ ຄັ້ງທີ 9 ລະຫວ່າງກະຊວງການຕ່າງປະເທດ ຫວຽດນາມ-ລາວ
ກປ.ອອນໄລ - ຕອນບ່າຍວັນທີ 29 ສິງຫາ, ຢູ່ສູນປະຊຸມສາກົນ, ທ່ານ ໂດ໊ຮຸ່ງຫວຽດ ຮອງລັດຖະມົນຕີກະຊວງການຕ່າງປະເທດຫວຽດນາມ ແລະທ່ານ ໂພໄຊ ໄຂຄໍາພິທູນ ຮອງລັດຖະມົນຕີກະຊວງການຕ່າງປະເທດລາວ ໄດ້ເປັນປະທານຮ່ວມກອງປະຊຸມປຶກສາຫາລືດ້ານການເມືອງຂັ້ນຮອງລັດຖະມົນຕີກະຊວງການຕ່າງປະເທດ ຫວຽດນາມ-ລາວ ຄັ້ງທີ 5.
|
|
ທ່ານ ໂດ໊ຮຸ່ງຫວຽດ ຮອງລັດຖະມົນຕີກະຊວງການຕ່າງປະເທດຫວຽດນາມ ແລະທ່ານ ໂພໄຊ ໄຂຄໍາພິທູນ ຮອງລັດຖະມົນຕີກະຊວງການຕ່າງປະເທດລາວ. ພາບ: mofa.gov.vn |
ທີ່ກອງປະຊຸມ, ສອງຝ່າຍໄດ້ຕີລາຄາສັງລວມການພົວພັນ ຫວຽດນາມ-ລາວ; ສະແດງຄວາມພາກພູມໃຈຕໍ່ການພັດທະນາຢ່າງແຂງແຮງ ແລະມີປະສິດທິຜົນໃນຫຼາຍຂົງເຂດຂອງສາຍພົວພັນແບບພິເສດຫວຽດນາມ-ລາວ ໃນໄລຍະຜ່ານມາ, ໃນນັ້ນມີການປະກອບສ່ວນຂອງກະຊວງການຕ່າງປະເທດສອງປະເທດໃນການຊຸກຍູ້ການຢ້ຽມຢາມຂັ້ນສູງ ແລະທຸກຂັ້ນ, ພິເສດແມ່ນການສົມທົບກັນຢ່າງແໜ້ນແຟ້ນ, ປະກອບສ່ວນຜັນຂະຫຍາຍການຢ້ຽມຢາມທາງລັດຖະກິດເຖິງລາວ ຂອງທ່ານ ໂຕເລິມ ປະທານປະເທດຫວຽດນາມ (ເດືອນກໍລະກົດ 2024) ແລະການຢ້ຽມຢາມຫວຽດນາມ ຢ່າງເປັນທາງການຂອງທ່ານ ສອນໄຊ ສີພັນດອນ ນາຍົກລັດຖະມົນຕີລາວ (ເດືອນມັງກອນ 2024) ໃຫ້ເປັນຢ່າງດີ. ສອງຝ່າຍເຫັນດີສືບຕໍ່ສົມທົບກັນກະກຽມບັນດາຢ້ຽມຢາມຂັ້ນສູງ ແລະກົນໄກຮ່ວມມືສອງຝ່າຍທີ່ສຳຄັນລະຫວ່າງສອງປະເທດໃນໄລຍະຈະມາເຖິງໃຫ້ດີ; ພ້ອມກັນນັ້ນ, ສືບຕໍ່ສົມທົບກັນຢ່າງແໜ້ນແຟ້ນກັບບັນດາກະຊວງ, ຂະແໜງການ ແລະທ້ອງຖິ່ນຂອງສອງປະເທດ ເພື່ອແນໃສ່ຊຸກຍູ້ການຜັນຂະຫຍາຍບັນດາຂໍ້ຕົກລົງຂັ້ນສູງ.
|
|
ບັນຍາກາດທີ່ກອງປະຊຸມປຶກສາຫາລືດ້ານການເມືອງ ຄັ້ງທີ 9 ລະຫວ່າງກະຊວງການຕ່າງປະເທດຫວຽດນາມ-ລາວ. ພາບ: mofa.gov.vn |
ຮອງລັດຖະມົນຕີສອງທ່ານ ໄດ້ໃຊ້ເວລາເພື່ອປຶກສາຫາລືບັນຫາສາກົນ ແລະພາກພື້ນທີ່ຕ່າງຝ່າຍຕ່າງມີຄວາມສົນໃຈ; ເຫັນດີນຳກັນວ່າ ໃນສະພາບການໂລກ ແລະພາກພື້ນສືບຕໍ່ມີການຜັນແປຢ່າງສັບສົນ ແລະຍາກທີ່ຈະຄາດຄະເນລ່ວງໜ້າໄດ້, ສອງຝ່າຍຄວນເສີມຂະຫຍາຍມູນເຊື້ອສົມທົບກັນຢ່າງແໜ້ນແຟ້ນ ແລະສະໜັບສະໜູນເຊິ່ງກັນ ແລະກັນຢູ່ບັນດາເວທີປາໄສສາກົນ ແລະພາກພື້ນ, ເປັນຕົ້ນແມ່ນສະຫະປະຊາຊາດ, ອາຊຽນ ແລະບັນດາກົນໄກຮ່ວມມືໃນອະນຸພາກພື້ນໂດຍສະເພາະແມ່ນບັນຫາຍຸດທະສາດທີ່ກ່ຽວຂ້ອງເຖິງສັນຕິພາບ ແລະສະຖຽນລະພາບຢູ່ພາກພື້ນ. ທ່ານຮອງລັດຖະມົນຕີ ໂດ໊ຮຸ່ງຫວຽດ ເນັ້ນໜັກວ່າ ຫວຽດນາມ ສືບຕໍ່ສົມທົບກັນຢ່າງແໜ້ນແຟ້ນ ແລະໜູນຊ່ວຍຝ່າຍລາວ ຢ່າງສຸດຂີດເພື່ອດຳລົງຕຳແໜ່ງປະທານອາຊຽນ ໃນປີ 2024 ປະສົບຜົນສຳເລັດ, ປະກອບສ່ວນສືບຕໍ່ຮັກສາຄວາມສາມັກຄີ, ບົດບາດໃຈກາງຂອງອາຊຽນ.
ສອງຝ່າຍເຫັນດີເປັນເອກະພາບ ຈະຈັດຕັ້ງກອງປະຊຸມປຶກສາຫາລືດ້ານການເມືອງ ຄັ້ງທີ 10 ຢູ່ລາວ ໃນປີ 2025.
|
|
ທ່ານ ບຸ່ຍແທັງເຊີນ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດຫວຽດນາມ ຕ້ອນຮັບທ່ານ ໂພໄຊ ໄຂຄໍາພິທູນ ຮອງລັດຖະມົນຕີກະຊວງການຕ່າງປະເທດລາວ. ພາບ: mofa.gov.vn |
ຕອນບ່າຍວັນດຽວກັນ, ທີ່ສໍານັກງານກະຊວງການຕ່າງປະເທດ, ທ່ານ ບຸ່ຍແທັງເຊີນ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດຫວຽດນາມ ໄດ້ໃຫ້ການຕ້ອນຮັບທ່ານ ໂພໄຊ ໄຂຄໍາພິທູນ, ຮອງລັດຖະມົນຕີກະຊວງການຕ່າງປະເທດລາວ.
ໂດຍ: ທູຈາງ